Ҳафталик муҳим воқеалар таҳлили
Ҳафталик муҳим воқеалар таҳлили
بسم الله الرحمن الرحيم
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (қалампир.уз 27.04.2023й): Ўзбекистонда 1 миллионга яқин аҳоли камбағалликдан чиқарилиб, камбағаллик даражаси 17 фоиздан 14 фоизга туширилди. Бу ҳақда Халқаро конгресс марказида ўтказилган иккинчи Тошкент халқаро инвестиция форумида Президент Шавкат Мирзиёев маълум қилди.
Изоҳ: Ислом бирор муаммони ҳал қилаётганда, унга инсон муаммоси, уни ҳал этишга муҳтож, деган эътиборда қарайди. Чунки Ислом қашшоқлик муаммосини жуда аниқ белгилаган ҳамда уни ҳал этиш учун туб ечимлар ишлаб чиққан. Ислом мол ва манфаатларни фуқаронинг ҳар бир шахсига тақсимланмаганини муаммо, деб билади. Яъни муаммо мамлакатнинг камбағаллиги эмас, шахсларнинг камбағаллигидир. Шунинг учун биз Халифалик давлатини бутун тарихи мобайнида, ҳатто оғир даврларида ҳам кўчаларида тиланчилик қилган гадойлар бўлмаганини, у ўз фуқароларини озиқ-овқат, кийим-кечак, уй-жой, таълим, даволаниш ва хавфсизлик каби барча асосий эҳтиёжларини таъминлаб қўйганини гувоҳ бўламиз. Бу мусулмонларнинг ғамхўр давлати бўлган Халифалик соясида яшаган замонларда бўлган. Ҳозирги тузумда эса, камбағаллик муаммоси, деб кўтарилаётган масала ва унга берилаётган ечимлар асосидан бошлаб нотўғри бўлиб, ҳар бир шахснинг эҳтиёжларини қондиришга ҳеч қандай алоқаси йўқ.
Хабар (uza.uz 27.04.2023й): Ташқи савдо ва рақобат муҳитини янги босқичга олиб чиқиш, янги-янги бозорларга кириш мақсадида Ўзбекистон Жаҳон савдо ташкилотига тезроқ аъзо бўлмоқчи. Бу ҳақда Халқаро конгресс марказида ўтказилган иккинчи Тошкент халқаро инвестиция форумида Президент Шавкат Мирзиёев айтиб ўтди. “Алоҳида таъкидлаб ўтмоқчиман, Жаҳон савдо ташкилоти талаблари ислоҳотларимиз мазмунига тўла мос ва биз ушбу нуфузли ташкилотга тезроқ аъзо бўлиб киришдан манфаатдормиз”, — деди Президент.
Изоҳ: Ушбу ташкилотнинг ҳаммага аён бўлган мақсадлари бор, бироқ бу ташкилотлар яширадиган бош мақсадлар ҳам бор. У ҳам бўлса, қашшоқ ва ривожланаётган давлатларда капиталистик давлатлар ва йирик ширкатлар учун бозорлар очиш, шу орқали айни бозорларни назорат қилиб, уларнинг устидан ҳукмронлик қилишдир. Масалан, Ғарб статистик маълумотларига кўра, ривожланаётган мамлакатлардаги бевосита хорижий инвестициялар фойдасининг 80 фоиздан ортиғи 20 та бой давлатларга кетмоқда. Бунинг оқибатида, айни кичик давлатлар ўз бюджетлари камомадини бартараф этиш ва бозорларини ҳимоя қилиш учун улкан кредитларга муҳтож бўладилар. Кейин кредитлар Жаҳон Банки ва Халқаро Валюта Фондидан ўтказиб берилади. Шундай қилиб, бу давлатлар оғир қарз ва кредитлар тузоғига тушади, охир бориб, сиёсий жиҳатдан айни мустамлакачи давлатлар иродасига тобе давлатларга айланишади. Мирзиёев ҳам шу йўлдан бориб, юртимиз аҳолисини янада қашшоқлаштирадиган ташкилотга аъзо бўлишга шошиляпти.
Хабар (president.uz 28.04.2023й): Ўзбекистон Республикаси Президенти Шавкат Мирзиёев Тошкент халқаро инвестиция форуми доирасида Европа Иттифоқининг санкциялар бўйича махсус вакили Дэвид О’Салливан бошчилигидаги делегация билан учрашув ўтказди. “Биз учинчи давлатларга, хусусан, Ўзбекистонга нисбатан санкциялар қўллаш ниятида эмасмиз, шунингдек, Ўзбекистоннинг ривожланишига, унинг бошқа давлатлар, жумладан, Россия билан савдо алоқаларига халақит бериш истаги ҳам йўқ”, деган Дэвид О’Салливан.
Изоҳ: Дэвид О’Салливан Ўзбекистонга ташриф буюриб, Мирзиёев билан учрашув ўтказишини бир огоҳлантириш сифатида кўриш мумкин. Чунки Дэвид О’Салливан айтганидек, G7 ва АҚШнинг ушбу санкцияларидан ягона мақсад Россиянинг Украинага қарши уруш олиб бориш қобилиятига путур етказишдан иборат эмас, балки жумладан ушбу санкциялар баҳонасида Ўрта Осиё иқтисодини Россия иқтисодидан ажратиб олиб, уни Ғарб иқтисоди билан боғлашга эришишдир. Сўнгги вақтларда Ўрта Осиё давлатларининг Россияга экспорт ҳажми каррасига ўсиб кетгани ҳақида хабарлар тарқаётгани ҳам шунга далолат қилади. Бу Ғарбнинг ушбу минтақа давлатларига Россия билан иқтисодий алоқаларни давом эттириш қимматга тушиши мумкинлиги борасидаги сигналидир. Шунингдек, ушбу учрашувда О’Салливан ЕИнинг GSP+ преференциялар тизими доирасида Ўзбекистон ва ЕИ ўртасида савдо ҳажми, қўшма корхоналар ва инвестиция лойиҳалари сони ошиб бораётганини қайд этган. Бу ҳам Ўзбекистон иқтисодини Россияникидан узиш борасидаги қадамлардан бири ҳисобланади.
Хабар (кун.уз 29.04.2023й): Шавкат Мирзиёевнинг қарори билан 27 январ куни Бишкекда имзоланган келишув тасдиқланди. Унга кўра, Ўзбекистон ва Қирғизистон фуқаролари икки мамлакат чегарасини ID-карта ёрдамида кесиб ўтиши мумкин бўлади. Шу тариқа, Қирғизистон – Ўзбекистон фуқаролари хорижга чиқиш паспортисиз чиқиши мумкин бўлган биринчи давлатга айланади.
Изоҳ: Икки мусулмон халқни ўртасига сохта чегара тортиб, ундан кириб чиқишни қаттиқ назорат остига олиб, кирган-чиққан одамларни сарсону саргардон қилиб, пулини шилиб…, сўнг баъзи енгилликлар бериш энди катта ютуқ саналадиган бўлиб қолди. Ваҳоланки, Ислом мусулмонларга алоҳида давлатчаларга бўлиниб яшашни ҳаром қилганди. Мусулмонларни бирлиги, яхлитлигини бузишга уринганларни дарҳол қатл қилишга буюрганди. Бироқ мусулмонлар устида турган хоин ҳукуматлар буни ўзларига ҳалол қилиб олишди. Бу ҳам етмаганидек, кофир Ғарб ва Россиянинг чегараларни мустаҳкамлаш борасидаги талабларини сўзсиз бажариб келишяпти. Зеро, мусулмонлар – улар қайси ирқ, миллат бўлишидан қатъий назар – бир-бирига дўст-биродардирлар, ҳақиқий душман анави кофир мустамлакачи давлатлардир. Ҳақиқий хавф ана шу душманларимиздан келади, асло мусулмонлардан эмас.
Ҳизб ут-Таҳрирнинг Ўзбекистондаги матбуот бўлими аъзоси Форуқ
01.05.2023й
