Ҳафталик муҳим воқеалар таҳлили
Ҳафталик муҳим воқеалар таҳлили
بسم الله الرحمن الرحيم
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (O'zLiDeP 05.07.2023й): Шавкат Мирзиёев Швецияда Қуръони Карим ёқиб юборилганини ёвуз ҳаракат деб атади ва кескин қоралади. Бу ҳақда президентликка номзод сифатида Тошкентлик сайловчилар билан учрашувда тўхталиб ўтди.
Изоҳ: Шу вақтгача кофирлар томонидан неча марта Ислом Умматининг муқаддасотларига, жумладан Қуръони Каримга ва Росулуллоҳ ﷺ шаънларига нисбатан таҳқирлаш, қуюшқондан чиқарадиган даражада ҳурматсизлик, ал-Ақсо масжидига яҳудийларнинг босқини каби жиноятлар қилинган бўлса, бунга нисбатан расмий Тошкентнинг бирор танқид ёки эътироз билдирганини гувоҳи бўлмадик. Энди эса сайловлар арафасида халқ олдида Мирзиёевнинг мана бундай чиқишини кўряпмиз. Хўш, шунча вақтдан бери индамай келинаётган ишга нега энди ҳозир эътибор бериб қолинди?! Нима ўзгарди?! Ақли расо инсонлар учун буни тушуниш қийин эмас, албатта. Зеро, ҳозир мусулмонлар устида турган режимлар мусулмонларнинг ҳис-туйғулари билан ўйнашиб, керак бўлиб қолганда “ислом ҳимоячиси тўнини” кийиб олишади-да, гўёки дин учун оташин баёнотлар бериб, ўзларига “очко ишлашга” уринишади. Аслида уларнинг сиёсатига енгилгина назар ташласангиз ҳам, улар на Ислом ва на мусулмонлар манфаатини кўзламаётганини кўрасиз. Агар Қуръоннинг ёқилишига нисбатан билдирилаётган эътироз чиндан ҳам Ислом муқаддасотлари ҳимояси учун бўлаётган бўлса, ҳеч бўлмаганда ўша жиноятга шароит қилиб берган ва уни фикр эркинлиги, дея хаспўшлаётган ўша давлат билан орадаги дипломатик алоқаларни қайта кўриб чиқиш, товарларига бойкот эълон қилиш каби чораларни қўллаган ёки ҳеч бўлмаса ултиматум қўйилган бўлар эди. Бундан ташқари, бу танқиддан асосий мақсад Ислом муқаддасотларини ҳимоя қилиш бўлганида эди, табиийки Аллоҳнинг манҳажини ҳаётга олиб келиш йўлида ҳаракат қилаётганларга қарши узлуксиз курашлар олиб борилмаган бўларди. Шунинг учун халқимиз бундай арзон обрў олишга қаратилган гап-сўзларга алданиб қолмаслиги лозим. Зеро, мусулмонларнинг Исломий туйғуларини қитиқлайдиган қуруқ гапларга ишониб, қаноатланиб юравериш куфр тузуми умрини узайтиришга хизмат қилади холос.
Хабар (kun.uz 06.07.2023й): “AZIYA INVEST FAVORIT” МЧЖ билан Тошкент шаҳри, Яшнобод тумани, Иззат кўчасида қурилиши режалаштирилган уйлардан бирини сотиб олиш бўйича шартнома тузган бир гуруҳ фуқаролар Kun.uz’га мурожаат қилиб, орадан бир ярим йилдан кўпроқ вақт ўтганига қарамай қурилиш ишлари ҳали бошланмаганидан шикоят қилишди.
Изоҳ: Маълумотларга кўра, “AZIYA INVEST FAVORIT” МЧЖ мингдан ортиқ одамга 300 млрд. (26 млн. доллардан кўпроқ) сўмдан ортиқ зарар етказган. Айтилишича, бундан аввал ҳам одамлар ушбу МЧЖ устидан шикоят қилиб ички хавфсизлик идораларига мурожаат қилишган, лекин шикоятлар эътиборсиз қолдириб келинган. Ҳукумат ҳар доимгидек одамларнинг муаммоларига улар ҳамма ёққа жар солишиб, “тинчликни” бузишгандан кейингина эътибор беришга мажбур бўляпти. Дарҳақиқат, уй-жой қурилиши борасидаги фирибгарликлар ошгандан ошиб бораётганига қарамай, ҳукумат бу борада бирор чора кўраётгани йўқ. Жамиятимизда Ислом мафкураси ҳукмрон бўлиб, қонунлар манбаси ҳам Ислом Шариати бўлганида эди, одамларнинг мол-мулки ҳам тўлиқ ҳимоя билан таъминланган бўларди. Исломнинг кўп эмас, биргина бай(савдо)га доир ҳукмига амал қилмаслик ортидан қанча одамлар бор-будидан айрилиб, хонавайрон бўляпти. Бу ўринда тарк қилинаётган ҳукм – киши ўзи молик-эга бўлмаган нарса устида савдо қилиши ёки ижарага бериши ножоизлиги масаласи эди. Демак, Исломнинг иқтисодий низоми татбиқ қилиниши натижасида соғлом иқтисодиёт барпо бўлади ҳамда уй-жой, емоқ-ичмоқ ва кийим-кечак каби инсоннинг бирламчи ва зарурий эҳтиёжлари ҳар бир шахсга тўлиқ таъминланади. Одамлар фақат Ислом белгилаб берган мулкка эгалик қилишнинг ҳалол сабаб-йўллари орқали мулк йиғадилар ва шундай қилиб, мазкур можарога ўхшаш жуда кўп муаммолар келиб чиқишининг олди олинади. Табиийки, Исломда давлат бундан бошқа ҳар қандай ножоиз йўлларни тақиқлайди ва бу тақиқни бузганлар эса, ким бўлишидан қатъий назар қонуний жазога тортилади.
Хабар (kun.uz 06.07.2023й): Тошкентда “Янги Ўзбекистон: тараққиёт, инновация ва маърифат” халқаро шериклик ташаббуслари ҳафталиги тадбирлари давомида, Олий Мажлис Қонунчилик палатаси спикер ўринбосари Акмал Саидов чиқиш қилди. Акмал Саидов Ўзбекистондаги тергов ва жазони ижро этиш муассасаларида содир бўлаётган қийноқ ҳамда ўлим ҳолатлари ҳақида гапираркан, бу бутун дунёда учрайдиган муаммо эканини таъкидлади.
Изоҳ: Ҳукумат позициясини билдирувчи бу мулозим қийноқ ва ўлим ҳолатлари фақат Ўзбекистонда эмас, демократик давлатларда ҳам сақланиб қолаётган муаммо, деб тўғри айтди. Қийноқ қўлланишда давом этаётган ва ўлим хабарларининг кети узилмаётган бир пайтда, Акмал Саидовнинг бундай совуққон чиқиш қилиши, бир томондан, ҳукуматнинг ўз халқига нисбатан зулм ва зўравонлиги ҳали бери бартараф этилмаслигини ойдинлаштирса, бошқа бир томондан, муаммонинг асл илдизи бугунги бузуқ тузумда эканлигини ўзлари ҳам эътироф этаётганини кўрсатади. Чунки демократик тузум ҳали айбдорлиги исботланмаган гумонланувчига нисбатан инсон қадри ва шаънини оёқ ости қилувчи, ҳаёти-соғлигини хавф остига қўювчи руҳий ва жисмоний босимлар қўллашга рухсат беради. Натижада бу тузум ҳимоячилари бўлмиш терговчилар жиноятни фош қилиш учун бу жирканч усулларни қўллаш жараёнида ваҳшийлашиб кетишади. Тузумнинг ёзилмаган бу қоидаси орган ходимларини жиноятни очаман деб жиноятга қўл уришларига, тергов қийноқларидан ўлмай қутилган гумонланувчиларнинг узоқ йиллар руҳий ва жисмоний кемтиклик асоратлари билан яшашларига олиб келади. Бу ёвуз тузум мусулмонлар ва бутун инсоният устидан улоқтирилмас экан, қийноқ ва ўлим ҳолатлари – Акмал Саидов эътироф этганидек – глобал муаммолигича қолиб кетаверади.
Хабар (uznews.uz 07.07.2023й): Наманган вилояти Наманган шаҳрида яшовчи вояга етмаган қиз Республикада фаолияти тақиқланган диний ташкилотга тегишли бўлган ақидапарастлик ғояларини ижтимоий тармоқларга тарқатган. Суд ҳукмига кўра,Ўз. Рес. ЖКнинг тегишли моддаларига асосан, унга яшаш жойидан чиқиш чекланган ҳолда 2 йил муддатга озодликни чеклаш жазоси тайинланди.
Изоҳ: Афсуслар бўлсинки, Бухорий, Хоразмийлардек етук раббоний олимлар етишиб чиққан юртга мусулмонлар ўз динини ўрганишига қарши юзсизларча курашадиган, Аллоҳни эмас, кофир мустамлакачи хўжайинларини рози қилиш сиёсатини юргизадиган сиёсий элита ҳукмронлик қилиб келяпти. Бу элитанинг ягона мақсади – ўз курсисини сақлаб қолиш бўлиб, бу йўлда улар “ёт ва бузғунчи ғояларни тарқатиш”га қарши кураш ниқоби остида халқимизнинг эътиқодига қарши боришдан ҳам тап тортмайдилар. Хабарда айтилган судловда ҳам – аввалдан бўлиб келаётганидек – ёш муслима қизни жиноятчига чиқаришдек разил ишга қўл урилди. Бу муслима синглимизнинг “жинояти” – ақидапарастликка асосланган, жамоат хавфсизлигига таҳдид солувчи материал тарқатгани эмиш! Аслида бундай абсурд, ақлга сиғмайдиган ва ҳеч бир мантиққа тўғри келмайдиган “пашшадан фил ясаш” қабилидаги айбловлар билан бегуноҳ одамларни жазога тортиш ҳукумат учун нақадар шармандали-а! Ваҳоланки, мана шу ҳукумат жон-жаҳди билан татбиқ қилишга уринаётган демократия биз мусулмонлар учун етти ёт бегона ғоя, бегона мафкура эмасми?! Агар “ёт ғоя, жамоат хавфсизлигига таҳдид солиш ва яна бир қанча бало-баттар” жиноятлар билан жазога тортиш керак бўлса, биринчи навбатда мана шу ҳукумат ва хавфсизлик органлари мулозимларини жазога тортиш лозим. Чунки ҳукумат мусулмон халққа бегона бўлган демократияни тиқиштиряпти ва хавфсизлик органларини ўз сиёсатини юргизишда асосий қуролга айлантириб олди. Шунинг учун халқимиз бундай телба-тескари сиёсатга рози бўлиб, бош эгиш ва ҳадеб ён бераверишдан тўхтаб, ўзи эътиқод қиладиган Исломни ҳокимият тепасига олиб келиш учун фикрий ва сиёсий курашга бефарқ бўлмасдан, аксинча дастак бериши лозим бўлади. Зеро, бу – Аллоҳ таолонинг бугунги кундаги қатъий талаблари ичида энг асосийларидан биридир.
Хабар (Qalampir.uz 09.07.2023й): Афғонистондаги “Толибон” муваққат ҳукуматининг чегара ва қабилавий ишлар вазирлиги делегацияси Ўзбекистонга келиб, расмийлар билан чегара хавфсизлиги масалаларини муҳокама қилди. Хабарда айтилишича, “Толибон” ҳукумати ўзбекистонлик ҳамкасбларига исёнчи гуруҳларнинг Афғонистон ҳудудидан Ўзбекистонга қарши фойдаланишига йўл қўймасликка ваъда берган.
Изоҳ: Исёнчи гуруҳлар дейилганида, энг аввало, ИШИД назарда тутилади албатта. АҚШнинг Марказий Осиёга тобора кўп аҳамият қаратаётгани сир эмас. АҚШ ва Ғарб расман тан олинмаган Толибон ҳукумати билан Ўзбекистон, Туркия, Қатар каби мамлакатлар орқали муомала қилмоқда. “Терроризмга қарши кураш” АҚШнинг бу минтақада ўз нуфузини ёйиш стратегиясидир. 8 июнь куни Саудия Арабистони пойтахтида АҚШ давлат котиби Энтони Блинкен иштирокида ИШИД террорчилик гуруҳига қарши кураш коалициясининг вазирлар йиғилиши бўлиб ўтгани ҳақида учрашув якунлари бўйича қабул қилинган қўшма коммюникега таяниб ТАСС хабар берган эди. Ар-Риёдда бўлиб ўтган йиғилишда Тожикистон ва Ўзбекистонни кузатувчи сифатида иштирок этишига келишиб олинган. Россия президентининг Афғонистон бўйича махсус вакили, Россия ташқи ишлар вазирлигининг Осиё бўйича иккинчи департаменти директори Замир Қобулов бундай деган эди: “АҚШ ҳозирги афғон маъмурларининг мухолифлари билан алоқа ўрнатишга уринмоқда ва террорчи ташкилот “ИШИД”га ҳомийлик қилмоқда… Қўшма Штатлар Афғонистонда тинчлик ўрнатилишини истамайди ва ҳаракатлари мамлакатдаги вазиятни беқарорлаштиришга ҳамда Марказий Осиё давлатлари ва Россияга қарши қаратилган террорчиларни молиялаштирмоқда” (РИА Новости 20 январ 2023й). Хулоса қилиш мумкинки, АҚШнинг мақсади Афғонистонни доимий хавф манбаи сифатида кўрсатиш билан бирга Ислом билан бошқариш мана шундай оқибатларга олиб келади, деган тасаввурни беришдир.
Ҳизб ут-Таҳрир Ўзбекистон матбуот бўлими аъзоси Форуқ
10.07.2023й
