Ҳафталик муҳим воқеалар таҳлили
Ҳафталик муҳим воқеалар таҳлили
بسم الله الرحمن الرحيم
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (daryo.uz 02.08.2023й): Ўзбекистонда қанча эркак кўп хотинлик жиноятини содир этгани очиқланди. Бу ҳақда Олий суд матбуот котиби хабар берди. Унга кўра, 2018-2022 йиллар давомида жиноий кодекснинг 126-моддасида (кўп хотинли бўлиш) назарда тутилган жиноятни содир этганлик учун 34 нафар шахс судланган бўлиб, уларга тегишли жазо тайинланган.
Изоҳ: Шундай мазмундаги хабарни Kun.uz сайти ҳам тарқатган эди. Бироқ мусулмон халқимиз олдида юзи шувут бўлишдан хижолат бўлди шекилли, уни ўчириб ташлади. Кўпхотинлик Қуръон Карим Нисо сураси 3 ва 129 оятларида шаръий ҳукм сифатида аниқ белгилаб қўйилган. Маълумки, ижтимоий ҳаётда фарзанд кўрмаслик, аёлнинг касал бўлиши, аёллар сони эркаклар сонидан кўп бўлиб, мувозанат бузилиши, уруш ва қўзғолонларда кўпроқ эркакларнинг ҳалок бўлиши ва ҳоказо муаммолар юзага келади. Ислом шу муаммоларга ечим сифатида кўпхотинликка рухсат бериб қўйди. Ўзбекистон ҳукумати эса, Аллоҳ нозил қилган шаръий ҳукмга амал қилишни жиноят, деб эълон қилмоқда. Мирзиёев бўлиб ўтган бир йиғинда “бу қонунда загс ҳужжатига эга бўлмаган шахсларга шаръий никоҳ ўқиган ҳар қандай муллага, у агар валломат бўлсаям, жиноий жазо беришни қабул қиламиз” деган эди. Ваҳоланки, ҳукумат масалан ЛГБТ каби жирканч бузуқликни жиноят деб ҳисобламайди. Аксинча, уни “инсон ҳуқуқлари” деган баҳона остида оқлашга, ҳатто ҳимоя қилишга уринади. Юртимизда тунги клублар, массаж салонлари ниқоби остидаги фоҳишахоналар инсонларни, айниқса ёш ўғил-қизларни фаҳш ботқоғига тортмоқда. Бунга 18 июлда Тошкентнинг Чилонзор ва Учтепа туманлари ҳудудидаги Заргарлик кўчасида юз берган жанжал ҳам ёрқин мисол бўлади. Маълумки, Ислом ва мусулмонларга кек-адоватли мустамлакачи Ғарб ва Америка Ислом аҳкомларини нишонга олиб, Исломни турли йўллар билан хунук қилиб кўрсатишга бор кучини сарфламоқда. Ғарбда бундай бузуқлик ва фаҳш ишлар сабабли аҳоли сони кескин камайиб, ҳатто “қари европа” деган номни олгани ҳам ҳаммага маълум. Шунинг учун кофир Ғарб мусулмонлар сони кўпайиб бораётганига ҳасад қилиб, уларни ҳам капитализмнинг фаҳш ботқоғига тортишга уринмоқда. Мирзиёев режими эса, мусулмонларнинг шаръий никоҳ асосида ҳалол-пок яшашларига қарши курашиб, ўша мустамлакачи кофир хўжайинларининг ноғорасига ўйнамоқда. Биз мусулмонлар – бу режим шаръий ҳукмларни жиноят деб қанчалик жар солмасин – шариат “ҳасан-гўзал” деган ишни гўзал, шариат “қабиҳ-хунук” деган ишни қабиҳ, деб билишимиз вожиб. Зотан, барча муаммонинг энг гўзал ечими фақат Исломдадир.
Хабар (kun.uz 02.08.2023й): Андижон ва Сирдарё вилоятлари бош солиқчилари, шунингдек 26 та солиқ идоралари раҳбарлари ишдан олинди. Яна қатор амалдорларга ҳайфсан берилди.
Изоҳ: Мазкур йиғилишда Шавкат Мирзиёев биринчи ярим йилликда республикада солиқ тушумлари 107,5 фоизга ўсганини қайд этди. Бироқ солиқ тушумлари юқорилаганига қарамай, солиқ соҳасидаги бир қанча мулозимлар ишдан олинди. Маълумки, 10-26 июль кунлари ХВЖ ва ОТБ фискал департаменти вакиллари ТАДАТ орқали Ўзбекистон солиқ маъмуриятини баҳолаши маълум қилинган эди. Балки ушбу кадрлар алмашинувига мустамлакачи Америка қўлидаги мазкур молиявий ташкилотларнинг берган хулосалари ҳам таъсир қилгандир. Чунки ҳукумат бундай ташкилотлардан қарз олар экан, давлат иқтисоди ва молия-солиқ тизими уларнинг назоратига ўтиб қолади. Ҳукумат капиталистик иқтисод низомини жорий қилар экан, солиқчилар халқдан кўпроқ пул ундирмагани учун жазоланишяпти. Чунки бундай тузумда давлат бюджетининг 70-90 фоизи халққа солинадиган мажбурий солиқлар ҳисобига таъминланади. Солиқ имтиёзлари эса, ҳукуматга яқин кишиларнинг бизнеслари ва уларга ҳамкор йирик хорижий компанияларга жорий қилинади. Давлат томонидан ундирилган солиқлар қўшни икки мусулмон халқларни бир-биридан ажратувчи чегараларни мустаҳкамлаш, халқни қўрқувда ушлаб турувчи куч ишлатар тизимларни таъминлаш, Ғарб таълим дастурларини кенг жорий қилиш, турли кўнгилочар маданий ва спорт тадбирларини ўтказиш каби фисқ-фасодга хизмат қилувчи ишларга сарфланади. Давлат солиқларининг энг катта улуши зиммасига тушаётган оддий халқ эса, эрта-ю кеч меҳнат қилишга, хорижга иш излаб кетишга, ҳатто ўз гўдагини ёки ички органларини сотишга мажбур бўляпти. Шунинг учун мусулмон халқимиз Ислом тузумини ҳаёт майдонига олиб келиш учун жиддий фаолият қилиши зарур.
Хабар (uza.uz 02.08.2023): 26 та солиқ инспекцияси ва икки вилоят ДСБ раҳбарлари ишдан олинди. 16 та туман-шаҳар ҳокимларининг 1-ўринбосарлари лавозимидан олинди.
Изоҳ: Ушбу ишдан бўшатиш ҳақидаги қарорлар 2 август куни Мирзиёев раислигида бўлиб ўтган видеоселектор йиғилишида қабул қилинган. Бундан аввалроқ Мирзиёев Фарғона вилоятига ташрифи давомида 40 нафар ҳоким ёрдамчисини, вилоят ИИБ бошлиғи ҳамда ички ишларнинг турли лавозимдаги раҳбарлари ва прокурорларини ишдан олган эди. Раҳбарларни бундай кенг кўламда ишдан олишга икки асосий сабаб бор. Биринчиси, халқдаги ҳукуматга нисбатан норозилик кайфиятини пасайтириш. Иккинчиси, халқ эътиборини татбиқ қилинаётган бузуқ демократик тузумдан шахсларга буриш. Яъни юртимизни муаммоларга ботириб қўйган тузум эмас, балки шахслардир, агар раҳбарлар тўғри ишласа муаммолар ҳам бартараф бўлади, деган фикрни бериш. Халқимиз устида бундай чалғитувчи сиёсат аввалдан юргизиб келиняпти. Вақти-вақти билан халқ норозилигини пасайтириш ва барча хато-камчиликларни шахсларга юклаб, уларни қурбон қилиш сиёсати ҳукуматнинг чалғитиш услубларидан бирига айланиб бўлган. Афсуски, одамлар бундай сиёсатга алданиб келишяпти. Ҳақиқат шуки, барча муаммолар манбаси устимизда татбиқ қилинаётган демократик тузумдир. Бундай тузум шароитида раҳбарлар, вазирлар ва ҳатто президент алмашса ҳам ҳеч қандай ўзгариш бўлмайди. Аксинча, бундай чоралар анави бузуқ тузумнинг умрини узайтириб, унинг яшаб қолиши учун замин яратади холос. Халқимиз эса, яна янги раҳбарлар, вазирлардан умид қилиб, вақтни бекорга бой беради. Шунинг учун бундай алданаверишни бас қилиб, эътиборни ҳақиқий ўзгаришлар амалга ошадиган ишга, яъни демократик тузумни илдизи билан қўпориб ташлаб, ўрнига Ислом тузумини олиб келишга қаратиш зарур. Зеро, Росулуллоҳ ﷺ: “Мусулмон бир тешикдан икки марта чақтирмайди”, — дея марҳамат қилганлар.
Хабар (kun.uz 04.08.23й): 2023 йил биринчи ярмида ҳуқуқни муҳофаза қилувчи органлар ходимлари томонидан ҳаракатланиш эркинлиги чекланган ёпиқ муассасаларда сақланаётган шахсларга нисбатан руҳий, психологик, жисмоний ёки бошқача тарзда босим ўтказилганлиги юзасидан омбудсманга 125 та шикоят келиб тушган.
Изоҳ: Ўзбекистонда конституцион ислоҳотлар туфайли бир мунча янгиликлар қабул қилинган бўлса-да, қонун ижрочилари – тергов, суд тизимларидаги ходимлар эски ишлаш услубидан қутула олишмаяпти. Чунки куч ишлатар тизим ходимларига аввалдан қонунга биноан эмас, раҳбарлар кайфиятига кўра ишлаш қон-қонига сингиб кетган. Энди омбудсманга келиб тушган шикоятларда акс этган қийноқларга келсак, тергов тизимидаги бу ҳуқуқбузарликлар дарёдан бир томчи холос. Чунки Аллоҳнинг динига даъват қилганлари учунгина қамалган мазлумларнинг оилалари ўз яқинларининг чорак асрдан бери тергов, суд ва зоналарда турли зулмлар қурбонига айлангани, қийноқларда қатл қилингани, қамоқ муддати тугагач, яна янги муддат қўшилиб, ҳануз озод этилмаётганидан на омбудсманга ва на бошқа бирор ташкилотга шикоят қилишдан аллақачон воз кечганлар. Раҳбарларнинг алмашиши, тизимдаги “ислоҳотлар” шунчаки йиғлаган гўдакка хўрозқанд тутқазиб қўйилгандек гап. Бу – қуруқ алдов ва ўткинчи юпатишдан ўзга нарса эмас. Асосий айб – бугунги демократия деб аталмиш тузумда. Исломдан бошқа ҳар қандай тузумдан адолат кутиш, чўлдаги саробдан сув излаш билан баробар.
Ҳизб ут-Таҳрир Ўзбекистон матбуот бўлими аъзоси Абдураҳмон
07.08.2023й
