Мен фақат сув ташиб бергандим
“Зиндон хотиралари” туркумидан
Мен фақат сув ташиб бергандим
بسم الله الرحمن الرحىم
Тушнинг даҳшатидан чўчиб уйғондим. Терга ботибман. Зонадаги золимлар қийноқлари ҳозиргача тушга кириб таъқиб қилади…
Ассалому алайкум азиз ўқувчи! Йигирма йиллик зона дахшатлари ортда қолганига ҳам, алҳамдулиллаҳ 4 йил бўлибди. Аммо даҳшатли тушлар туфайли ҳар замонда зиндонга қайта “кириб чиқаман”. Бугун ҳам ўша сим девор ортига ҳар доимгидек сиз азиз ўқувчим билан бирга “сайр” қиламиз. Лекин сиз ўқувчимизга оғир йиллар хотираларидан ҳикоя қилишдан аввал эслатиб ўтаман, дини учун қамалган азизлар 25 йилдирки, ҳануз Ўзбекистон қамоқларида сақланмоқда. Кеча қўлимга теккан мактубдан билдимки, аввалги золим президент Каримов давридаги зона қийноқлари бугунги раҳбарият даврида ҳам яна қайта бошланган кўринади. Фикримизни юртимиздаги мактаб ва бошқа ўқув масканларидаги ҳижобга қарши таъқиблар, интернет тармоғи орқали ўзаро жўнатмалар туфайли жазога тортишлар тасдиқлаб турибди. Озодликдаки динимизга, муслим ва муслималарга шундай таъқиблар бўлаётган экан, тиконли сим ортидаги зулм тегирмонида тазйиқлар бўлиши табиий.
Демак, Ўзбекистон ҳукумати халқимиз кўп асрлардан бери эътиқод қилиб келадиган Ислом динига нисбатан душманона кайфиятдан воз кечолмаяпти. Сабаби аниқ, ҳукумат учун динга қандай муомала қилишни таълим бериб, диктовка қилаётганлар – мустамлакачи кофир “оғалари”. Улар эса, шубҳасиз Аллоҳ ва Росули ﷺ ҳамда мўминларнинг душманлари ҳисобланади.
Камина навбатдаги зиндон воқеасини бошлар эканман, ўзлари мусулмонлик даъвосида бўлган ҳукумат ходимлари нега “Роббим Аллоҳ” деган муслим ва муслималарни ҳозиргача қамоқларда ушлаб турганига ва ҳануз мусулмонларни турли сохта баҳоналар билан қамоққа тиқаётганига ҳайратда эканимни яна бир бора эслатиб ўтаман. Уларга ич-ичимдан, “Эй Худо хайрингни бергурлар, бу қилмишларинг очиқчасига динга қарши кураш эканини ва мусулмон ака-ука, опа-сингилларингга қарши қўллаётган бу тазйиқларинг – Аллоҳга қарши бориш бўлиб, бу жирканч ишинг билан нафақат ўзинг, балки бутун зурриётинг оқибатини қанчалар хатарга қўяётганинг ва улар шаънини нақадар булғаётганингни наҳотки англамаётган бўлсанглар” дегим келади.
Сиз азизлар ҳам бир мусулмон киши сифатида қамоқларда умри ўтаётган мазлумлар тақдирига бефарқ бўлмаслигингиз бўйнингиздаги бир вожибдир. Қуйида эсланадиган зиндон аҳлининг аксари ҳали-ҳануз симлар ортида эканини ҳеч қачон унутманг. Улар чорак асрдан буён ўз ғояларида собит турар эканлар, бу барчамиз учун очиқ-ойдин хитоб – зиндон аҳлининг сўзсиз амалий ХИТОБИДИР! Сиз 25 йиллик зиндон аҳлининг бу хитобини ўша азизлар кўтариб чиқаётган буюк ғоя – Исломий ҳаётни қайта бошлаш ғоясини чуқур ўрганмоғингизга бўлган хитоб, дея қабул қилинг!
Навбатдаги хотира Навоий 64/46 зонадаги 2008 йиллардан ҳикоя қилади.
Ёз охирида Жаслиқ зонасидан бу ерга бир неча маҳкумларни этап қилиб келтиришди. Улардан бири 35 ёшлар чамасидаги озғин, гавдали йигит эди. У барча билан тез киришиб кетди. Аммо кечга яқин бу йигитимиз сменадан энди қайтган маҳкумлардан бирини дўппослай бошлади. Сонияларда рўй берган бу ҳолатга ҳеч ким тушунмасди. Ажабланарлиси, калтак-тепкилардан яхшигина улушини олган анави киши ҳам дин ишлари билан қамалганлардан эди. Аслида у умуман бизларга аралашмайдиган ва ҳатто намози ҳам “хушим келди” кўринишида чала эди… Қизиқ? Нега бугун у янги йигит келибоқ айнан ўша чаланамозни дўппослади? Бунақа тўполон қилиш ортида ўта жиддий сабаб борлигини ҳамма сезиб турган бўлса-да, аниқ сўз айтувчи йўқ эди. Жаслиқдан келган укамизнинг ўзидан билиш мумкин эди-ю, лекин уни ўша заҳотиёқ зона назоратчилари изоляторга олиб кетишди. Аксига олиб, биродарнинг мушт зарби ва тепкиларидан “яхшигина қиёфа”га кирган маҳкум ҳам ҳеч кимнинг саволига жавоб бермади. Тинчим бузилди, бу ишнинг сабабини билмагунимча шу аҳволда қолдим. Бироздан кейин зона радиосидан ётоғимиз ССПсини (ментларга ишловчи аристон) штабга чақира бошлашди. У шошилинч кетаётиб аристонларга кўзини қисиб: “Сейчас всё узнаем”, деди. Кутдим, анча кеч келди. У ётоқда кўп йиллардан бери ССП бўлиб ишлаётган Панфил исмли қари ўрис эди. У бу исмни фамилиясига кўра олган бўлиб, асл исми Андрейлигини деярли барча унутганди.
Хуллас ўша ўриснинг паст овозда айтган гаплари менга ниманидир англатгандек бўлди. У, его ***дять только ваши которые придут из Жаслыка. По моему он там что то натворил, деди. Унинг бу гапидан кейин ўша калтакланувчига қизиқишим янада ортди. Ва ҳар икки тарафга жон сақлаш учун хизмат қилувчи Панфилни ишга солиб сирини ўргандим. Унинг айтишича, Жаслиқда бир биродарни устидан қайноқ сув қуйиб қийноққа солишганда, бу исқирт ошхонадан чойнакларда сув ташиб берган экан…
– Ўша биродарнинг исмини сўрадингми?
– Музаф! Да, он сказал так! Этого биродара имя был Музаф!
Мен бор-йўқ ҳолатда бир нуқтага тикилиб қолдим. Наҳотки, Музаффар аканинг қатлида шу аблаҳнинг ҳам иштироки бўлса…? Шу ҳолатда қанча ўтирдим билмайман, хаёлимни “тезоб” лақабли ҳазилкаш укамиз бузди. У аввал амал қилиб кейин ҳукмини ўрганадиган шошқалоқроқ бўлгани учун шундай “исм”ни орттириб олганди. Одати бўйича елкамга туртиб:
“Ҳа ака, чойи тўкилиб кетган аристондек ер сузиб ўтирибсиз, нима гап?” деган ҳазилига бироз ғашим келиб, анави ССПнинг хабарини борича айтгандим, ҳай-ҳайлаганимга қарамай, калтак зарбидан энди ўзига келаётган ҳалиги кимсани бира тўла оғир тумбочка билан уриб сулайтириб қўя қолди. Яна ҳамма саросимада. Ахир бир кунда иккинчи бор калтакланган “сув ташувчи” устида кечган бугунги воқеа ҳақиқатдан ажабланарли эди. Воқеадан тез хабар топган ходимлар уни бошқа баракка, яъни биродарлар йўқ баракка ўтказиб юборишди. Анави “тезоб” укамизни ҳам изоляторга ёпишди. Мен шошқалоқнинг феълини била туриб воқеани унга ошкор қилганимдан ўзимни айбдор ҳис қилсам-да, аммо ич-ичимдан қандайдир ҳузурланиш туйгандек бўлдим. Айниқса, калтакланаётганда унинг мен фақат сув ташиб бергандим холос, деган гаплари анчагача қулоғимдан нари кетмай жаранглаб турди. Шу ўринда салафларимиздан (Аллоҳ уларни раҳматига олсин) ўта ибратли, гўзал бир панд-насиҳатни эслаб ўтаман:
Буюк мужтаҳид олим Имом Аҳмад бин Ҳанбал раҳимаҳуллоҳ зиндонбанд қилинганида, зиндон ходимларидан бири у кишига:
– Мен бу ерда ишлаётганим учун золимнинг зулмига ёрдам бераётган бўлмайманми, деб сўраганида:
– Золимнинг таомини пишириб, либосларини тикиб бераётганлар… унинг ёрдамчилари бўлади, сен эса золимнинг ўзисан, деб жавоб берган эканлар. Азизлар, хулоса ўзингиздан, албатта.
وَسَيَعْلَمُ الَّذِينَ ظَلَمُوا أَيَّ مُنقَلَبٍ يَنقَلِبُونَ
– “Золим кимсалар эса яқинда қандай оқибатга қараб кетаётганларини билиб қолурлар”. (Шуаро:227)
(Қайноқ сув қуйиб шаҳид қилинган биродаримни эслатган – ўша хотиралардан)
Ҳизб ут-Таҳрир Ўзбекистон матбуот бўлими аъзоси Зайниддин
03.06.2023й
