Мирзиёевнинг Американи хурсанд қилган ташаббуси

بِسْمِ اللهِ الرَّحْمٰنِ الرَّحِيم

Хабар: Жорий йилнинг 16-20 май кунлари Тошкент, Самарқанд ва Бухоро шаҳарларида «Декларациялар мулоқоти» халқаро форуми ўтказилди. Тадбир Ўзбекистон Президенти ҳузуридаги Стратегик ва минтақалараро тадқиқотлар институти, АҚШ Глобал жалб қилиш институти, Вазирлар Маҳкамаси ҳузуридаги Дин ишлари бўйича қўмита, Жаҳон иқтисодиёти ва дипломатия университети, Халқаро Ислом академияси, Ўзбекистон Республикаси Президенти ҳузуридаги Давлат бошқаруви академияси ҳамда Самарқанд ва Бухоро вилоятлари ҳокимиятлари томонидан ташкил этилди.

Унда Европа, Осиё, Яқин Шарқ, Африка мамлакатлари ва АҚШ етакчи дин уламолари, илоҳиётшунослар, ҳуқуқшунослар ва Ўзбекистон томонидан турли конфессиялар вакиллари, дин олимлари, уламолар, тегишли вазирлик ва идоралар мутахассислари ҳамда бошқа расмий вакиллар қатнашди. Форум якунида “Бухоро декларацияси” ҳужжати конференция иштирокчилари томонидан бир овоздан қабул қилинди. (Дунё.инфо)

Изоҳ: АҚШнинг неоконсерваторлардан иборат сиёсий қатлами томонидан тузилган «Декларациялар мулоқоти» форуми Ўзбекистонда иккинчи бор ўтказилмоқда. Илк форум 2019 йилда Тошкентда ўтказилган эди. Иккинчи форум эса, мамлакатнинг учта муҳим шаҳрида ўтказилди. «Декларациялар мулоқоти» лойиҳасининг ғояси конфессиялараро тотувлик, диний бағрикенглик ва бошқа бир қатор шиорлар воситасида бутун дунё динларини битта асосга солиш билан Америка қўлидаги ягона динни ташкил қилишдир. Америка «Декларациялар мулоқоти» форумлари орқали Ислом диёрларида «Динлараро диалог», «давлатлар ва динлараро консенсусни ривожлантириш», «Мўътадил ислом» лойиҳаларига чақиради. Шунингдек, демократиянинг виждон эркинлиги меъёрларига зид келувчи диний ва миллий урф-одатлардан воз кечишни талаб қилади. Форумнинг очилишида сўзга чиққан Американинг Ўзбекистондаги элчиси Дэниел Розенблюм «полиция томонидан соқол қўйганлар соқолини мажбурлаб олиб ташланиши муаммоси» ҳақида гапириб, бундан Америка хурсанд эмаслигини билдирди. Элчининг фикрларига конференцияда иштирок этган АҚШ Давлат департаменти собиқ катта маслаҳатчиси Нокс Темзнинг гаплари изоҳ бўлди. У «динни эркин амалга оширишни ҳимоя қилиш зарур. Акс ҳолда можаро, беқарорлик, терроризм (яъни Ислом) кучаяди» деди.

Америка ва Ғарб давлатлари динни ҳаётдан, давлатдан ажратиш мафкурасини ижро қилишда христиан, яҳудий динлари билан зиддиятда эмас. У динларни бекор қилган Ислом билан эса доимий уруш ҳолатида. Чунки Исломнинг асоси ҳисобланган Қуръон ва Суннат фақат ўқиладиган китоблар эмас, балки мукаммал тузумни ташкил қиладиган ҳаётий қонунларнинг манбасидир. Америка Исломни ўзига бўйсундириш учун Исломни демократлаштиришга уриниб келади. Шунинг учун «Декларациялар мулоқоти» форумида реал таҳдид сифатида Ислом кўрсатилди. Бу анжуман ҳам Исломнинг сиёсийлигини беркитиш йўлларини қидириш учун уюштирилгани маълум бўлади. Буни халқаро форумнинг якуний ҳужжати ҳисобланган «Бухоро декларацияси» бандлари ҳам тасдиқлаб турибди:

– Дин ёки эътиқодга асосланган зўравонлик, муросасизлик ҳаракатларининг кучайишини қоралаш, ахборот макони, жумладан ижтимоий тармоқларда диний муросасизлик ва камситиш ташвиқотини олдини олишга алоҳида эътибор қаратиш;

– Диний таълимнинг экстремизм ва терроризмнинг олдини олиш, эътиқод эркинлигини таъминлашнинг муҳим омили сифатидаги аҳамиятига диққат қаратиш;

– Диний бинолар, зиёратгоҳларнинг (яъни ширк ўчоқларининг) тарихий ва маданий аҳамиятини ҳисобга олган ҳолда уларни асраб-авайлаш.

Билдирилган фикрлар ва ҳукуматга юкланган мажбуриятлардан маълум бўладики, бу форум мусулмонларни мўътадиллаштириш, Исломни куфрга мойиллаштириш, алалоқибат Исломни ўзгартириш учун ташланган навбатдаги қадамдир. Аслини олганда, Исломнинг мавжудлиги бошқа динларни бекор қилади. Бу борлиқнинг Яратувчиси Аллоҳ Таоло рози бўладиган дин Ислом динидир.

﴿إِنَّ الدِّينَ عِندَ اللهِ الإِسْلاَمُ﴾

– “Албатта Аллоҳ наздида мақбул бўладиган дин фақат Исломдир”.  (Оли Имрон:19)

﴿وَمَن يَبْتَغِ غَيْرَ الإِسْلاَمِ دِيناً فَلَن يُقْبَلَ مِنْهُ﴾

– “Кимда-ким Исломдан ўзга дин истаса, бас (унинг “дини” Аллоҳ ҳузурида) ҳаргиз қабул қилинмайди”.                            (Оли Имрон:85)

Бутун мавжудотни яратган Аллоҳ ягонадир, Унинг буйруқ-қайтариқлари жам бўлган муқаддас дин ҳам биттадир. Амалдаги ҳақ дин бўлган Исломни ботил динларга тенг кўриш ва мусулмонларнинг кофирлар, мушриклар, атеистлар билан ўзаро тенглик, дўстлик ва ҳамжиҳатликни эълон қилишлари куфрдир. Аллоҳ ва Расули ﷺга улкан ҳиёнат ҳисобланган, мустамлакачи Америка учун эса, ҳисобсиз манфаат келтирадиган бундай форумни ўтказиш таклифи Ўзбекистон ҳукуматидан чиқди. Мирзиёевнинг бундан мақсади Американи рози қилиш билан президентлик муддатини узайтиришга қаратилган конституциявий ўзгаришларни муваффақиятли амалга оширишдир.

Дарҳақиқат, Ислом динига гуруҳ-гуруҳ бўлиб кириш ҳодисаси ҳам Ислом дини сиёсий вужудга эга бўлганидан кейингина амалга ошганди. 1924 йил 3 март санасида Исломнинг тириклик қуввати бўлган сиёсий жиҳати, яъни Ислом давлати йўқ қилингач, Ислом ғарибликка юз тутди. Масжидга чекланган дин ҳолида ҳам Ислом турли ҳужумларга нишон бўлишдан тўхтамаяпти. Биргина Рамазон ойини бошлаш ва Ҳайит намозини Аллоҳ буюрганидек адо қилишга ҳам ҳукуматлар тўсқинлик қиляпти. Бундай хорликдан қутулишнинг ягона йўли уйғонишдир. Уйғониш учун эса, мусулмонлар барча ишларини Исломий ақида асосига қуришлари, муаммоларига ечимни Исломдан олишлари ва бутун Уммат тақдирини ҳал қилувчи масалани ечиш учун жамоа, гуруҳ ёки ҳизб шаклида фаолият кўрсатишлари зарурдир.

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

02.06.2022й

+1

0