Росулуллоҳ ﷺни таҳқирлаш ортидаги ёвуз мақсадлар
Росулуллоҳ ﷺни таҳқирлаш ортидаги ёвуз мақсадлар
بِسْمِ اللهِ الرَّحْمٰنِ الرَّحِيم
Сўнгги пайтларда Ҳиндистонда мусулмонларга нисбатан зўравонликлар ортгани кузатилмоқда. Иқтидордаги халқ партияси (BJP) расмийларининг Ислом дини ва Росулуллоҳ ﷺни ҳақорат қилиши ортидан тинч намойишга чиққан мусулмонларни хавфсизлик кучлари ваҳшийларча ўққа тутган. Юзлаган намойишчилар ҳибсга олиниб аёвсиз калтакланган. Мусулмонларни бостиришнинг янги воситаси сифатида уларнинг яшаш жойларига ўт қўйилиб, уйлари ва ишхоналари булдозерлар билан бузиб ташланган. Ҳиндистондаги вазият ўрганилса, мусулмонлар устидаги бундай зулмлар олдиндан тузилган режа асосида систематик равишда олиб борилаётгани аён бўлади. Чунки сиёсатчилар халқнинг муҳим қатламининг қадриятларини билмаслиги ва расмий баёнотлар қандай оқибатларга олиб келишини ангмаслиги мумкин эмас. Бундан ташқари, ҳинд ҳукумати ҳеч қандай сабабсиз ҳам мусулмонларга тазйиқ ўтказиб келаётгани маълум. Мисол учун, 2020 йилнинг 26 апрель куни ҳукумат партияси расмийси Ҳиндистонга коронавирусни мусулмонлар олиб келди, дея иддао қилган эди. Мазкур ёлғон ва бўҳтондан иборат ҳақоратловчи чиқишдан сўнг мусулмонларга нисбатан босимлар янада кучайди. Ҳатто коронавирусга чалинган мусулмонларни шифохоналарга қабул қилмаслик тўғрисида топшириқ берилди. Бундан ташқари, уч кишидан ортиқ гуруҳ бўлиб тўпланишга қўйилган чекловлар асос олиниб, жума намози ва ифтор вақтида мусулмонларнинг бир жойда йиғилишига тақиқ қўйилди. Ваҳоланки, бу пайтда Бомбейда ўтказилган кинофильмлар кўригида ҳамда оммавий варрак фестивалида минглаб инсонлар бир жойда жамланишди. Коронавирус хавфи пасайгандан кейин ҳам очиқ майдонларда жамоат намози ўқилишини давлат мулкидан изнсиз фойдаланиш дея баҳоланиб намозхонларга қарши ҳинду экстремист гуруҳлар тарафидан ҳужумлар уюштирилди.
Ҳиндистон аҳолисининг 1/7 (еттидан бир) қисмини ташкил қилувчи мусулмонларнинг тарих давомида оммавий қирғинларга учраганига, руҳий ва жисмоний босимлар остида яшаётганига ҳамда давлатнинг зуғуми, хатарига қарамай Росулуллоҳ ﷺнинг шаънини ҳимоя қилиб чиқишлари таҳсинга лойиқдир. Уларнинг бир ёқадан бош чиқариб, қадриятлари учун оёққа турганларининг сири Аллоҳ ва Росули ﷺга бўлган муҳаббатларидир. Уларнинг динимиз борасидаги жасоратидан руҳланиб, репрессияга учраганида эса, уларнинг ҳимояси ва Пайғамбаримизнинг шаъни учун қўзғалмаётган биз мусулмонлар ҳақида нима дейиш мумкин?
Ҳиндистонлик олимлардан илмий даражани тасдиқловчи ижозаларни олиб келувчи имомларимизнинг Росулуллоҳ ﷺ ва Ҳиндистонлик мусулмонлар ҳимояси учун ҳаракатга келмагани, аксинча халқимизни бошқа тарафга йўналтираётганлари қўрқинчли ҳолатдир. Аслида имомлар динимизни ва Росулуллоҳ ﷺни кимлар, нима сабабдан ҳақорат қилаётганини, бундан қандай мақсадлар кўзланганини, бундай ҳолатда Аллоҳ бизга нимани амр этишини баён қилишлари зарур эди. Афсуски, улар ўзлари эгаллаб турган, Росулуллоҳ ﷺдан омонат қолган минбарга ҳиёнат қилишиб, давлат ва уммат ўртасида воситачилик қилиш учун ёлланган хизматчига айланишди. Шу сабабдан уларнинг ҳутбалари-ю маърузалари ҳукумат сиёсатини тарғиб қилишга қаратилган. Сайтларида эса, “Бой бўлишни хоҳлайсизми?”, “Ўздан кечиб, ўзгага айланинг!”, “Одобнинг аҳамияти” каби қатор мақолалар билан Исломни шахсий ибодатлар ва амалларга чеклаб талқин қилишади. Ҳиндистондан олинган қайғули хабарларни Ислом нуқтаи назаридан ёритмай, хабар агентлиги каби қуруқ янгиликни чоп этишди. Сўнггида эса, ўша расмийларнинг лавозимидан озод этилганини урғулаб, гўё жиноятчилар жазосини олди қабилида халқимизни овутувчи изоҳлар ёзишди.
Мушрик ва кофирлар уларнинг ботил эътиқодларини фош қилгани, мазлум халқларни адолатли ёруғ ҳаётга чорлагани учун Исломга ва Росулуллоҳ ﷺга душманлик қилишади. Нарендра Моди етакчилигидаги мушрик ҳукумат Пайғамбаримиз ﷺни ҳақорат қилиш орқали мусулмонларнинг иймони ва тақвосига зарба беришни, бу билан Ислом даъвати йўлини тўсишни мақсад қилган. Агар мусулмонлар Росулуллоҳ ﷺга ва у кишининг муборак суннатларига бефарқ умматга айланса, уларни исталган қонунлар билан бошқариш мумкин бўлиб қолади. Ҳиндистон ва унга қўшни ўлкалардаги мусулмонларнинг бундай ҳужумларга қарши майдонларга чиқишлари, ифлос қаламлар ва оғизларни вақтинчага тийиб қўйиши мумкин. Аммо инсонларнинг қалбларини иймон билан суғорган буюк хулқ эгаси бўлмиш Росулуллоҳ ﷺни ҳақиқий маънода таниш ва у кишига эҳтиром кўрсатиш Исломий давлат тиклансагина амалга ошади. Ана ўшанда Ислом муқаддасотларига, хусусан Пайғамбаримиз ﷺнинг муборак номларига тил текизган –агар юрак ютиб шу ишга ботинса – ҳар қандай кимсанинг тилини суғуриб олади.
Ҳизб ут-Таҳрирнинг Ўзбекистондаги матбуот бўлими аъзоси Абдураҳмон
24.06.2022й
