Ургутдаги халқ норозилиги агар мусулмонлар хоҳласалар, тузумни ўзгартиришга қодир эканликларини яна бир карра исботлади

بِسْمِ اللهِ الرَّحْمٰنِ الرَّحِيم

Хабар: Ижтимоий тармоқларда Самарқанд вилоятининг Ургут туманида аҳоли норозилиги акс этган видеолар тарқалди. Озодликка маълум бўлишича, Ургутнинг Ғўс қишлоғида бир гуруҳ аҳоли вакиллари Телеграм орқали "ўз шаънларига ҳақоратли сўзлар ишлатгани" даъво қилинган шахсни жазолашни талаб қилишган.

ИИБ маълумотига кўра, ғўсликларни ҳақорат қилган шахс ҳибсга олинган. Унинг кечирим сўраган видеоси тармоқларга жойлаштирилган. Ғўсликларга кўра, жамоат тартибини сақлаш учун ИИБ, махсус кучлар ва ҳарбийлар жалб қилинган. Ҳодиса пайти бир неча ғўслик жароҳат олгани ва ўнлаб йигит ҳибсга олингани айтилмоқда.

Ҳодисага гувоҳ бўлган ғўсликларнинг Озодликка айтишича, воқеа аслида 3 кун аввал бошланган:

“21 июль куни Ургут тумани марказида яшовчи бир йигит ғўсликларни жуда ёмон ҳақорат қилди. Жуда уят сўзларни ишлатиб сўкинган. Шу куни ғўсликлар у йигитнинг кимлигини, адресини аниқлашди. Эртасига, яъни 22 июль куни унинг уйига боришди. Лекин унга хабар берилган экан, уйидан қочиб кетибди. Кейин одамлар ҳокимият олдига бориб, ҳақорат қилган йигитни жазолашни талаб қилишди”.

Ҳодисанинг бошқа гувоҳларига кўра, жаҳл отига минган оломонни тинчлантириш учун туман ИИБ бўлими қўшимча куч чақиртирган:

“ОМОН ҳам шу ерда эди. ДХХ ҳам шу ерда эди. Военний формадагилар ҳам бор эди. Бир нечта бронетранспортерни кўрдим. Кимдир танклар ҳам борлигини айтди. Одамлар жуда нервний эди. Ҳамма ўша ҳақорат қилган одамни жазолашни талаб қилишди”. (Озодлик, 23.07.2021й)

Изоҳ: Ушбу ҳодиса бир неча фактларни юзага чиқарди. Биринчидан, умматнинг ҳали тирик эканлигини, ҳозирги заиф ҳолатида ҳам улкан ўзгаришлар ясашга қодирлигини яна бир бора исботлади. Халқнинг ғайрат-шижоати борлигини, бир ишда уюшиб, мақсад сари биргаликда ҳаракат қилишга лаёқатли эканлигини ҳам кўрсатди. Иккинчидан эса, ҳукуматнинг нақадар қўрқоқ эканлиги яна бир бора фош бўлди. Бир неча юз ёки минг кишилик одамларни тинчлантириш учун ҳатто қўшимча куч ҳам ташлади. Бу эса, ҳукумат халқнинг ҳаракатга келиб, ўз ҳаққини талаб қилиб чиқишидан ўта қўрқишини англатади. Албатта, мавжуд режим ўз жиноятларини жуда яхши билади, одамларга зулм қилишда ҳар қандай чегараларни бузиб ўтиб кетганини ҳам жуда яхши билади, ўзининг ёмон бошқаруви юртни қай аҳволга олиб келганини ва ҳолат тобора оғирлашаётганини ич-ичидан ҳис қилиб турибди. Шунинг учун ҳам бир кун келиб мана шу мазлум халқ ундан ҳисоб талаб қилишидан ўлимдан қўрққандек қўрқади.  

Бироқ мулоҳаза қилиниши зарур бўлган энг муҳим нарса шуки, одамлар ўз иззат-нафсини ҳимоя қилиб бир ожиз шахсга қарши чиқди. Бундай ишни бир одам ҳам қила олади, яъни биргина шахсни якка ҳолда хоҳлаган одам тийиб қўя олади. Бу ёқда бутун бошли халқнинг ҳақ-ҳуқуқлари топталяпти, Ислом ҳукмлари татбиқ бўлишига эътиборсизлик қилиняпти, ҳатто улар оёқости бўляпти. Иззат-нафс учун ҳаракатга келаётган халқ, аҳамияти ундан минг чандон юқорироқ бўлган ишларга ҳаракат қилишда нега сусткашлик қиляпти? Демак, бу борада ҳали қилинадиган зарур ишлар борлиги ойдинлашмоқда. Аниқроғи, уммат Ислом ҳукмларининг татбиқ этилиши энг муҳим ва тақдирий масала эканлигини англаб, ўзига холис ва онгли сиёсий етакчиликни раҳбар қилиб олиб, унинг бошқаруви остида ҳаракат қилишни бошлаши билан ўзининг тўғри йўлини топади. Уммат ўзининг ғайрат-шижоати, ақлий ва жисмоний қувватини мана шу ишга йўналтира олса ҳақиқий ва туб ўзгариш ясашга эришади.

Ҳизб ут-Таҳрирнинг Ўзбекистондаги матбуот бўлими аъзоси Фаррух

27.07.2021й