«Киберхавфсизлик» ниқоби остидаги рақамли инквизиция: Телефонларга мажбуран тиқиштирилаётган «Қўриқчи» кимнинг манфаатига хизмат қилмоқда?

بِسْمِ اللهِ الرَّحْمٰنِ الرَّحِيمِ

Сўнгги ҳафталарда республика бўйлаб кузатилаётган воқеалар ичида мусулмон халқининг шахсий дахлсизлиги, эътиқодий муҳити ва кундалик ҳаётига тўғридан-тўғри хавф солаётган жиддий жараён — ИИВ, ЙПХ ва Миллий гвардия кучлари томонидан аҳолининг қўл телефонларини оммавий текшириш ва уларга «APK Қўриқчи» («Киберпатрул») иловасини мажбуран ўрнатиш кампанияси бўлмоқда.

Гавжум савдо марказлари ва бозорларнинг ер ости йўлларидан тортиб, ишлаб чиқариш корхоналари, поликлиникалар, мактаблар, масжидлар ва ҳатто виртуал зиёрат марказларигача формали ҳамда фуқаролик кийимидаги ходимлар одамларнинг смартфонларини тўхтатиб текширмоқда. Бу жараён шунчаки техник чора-тадбир эмас, балки мустамлакачилик занжирини халқнинг шахсий ҳаётигача суқилиб киришга қаратилган тизимли ҳаракатдир.

Расмий доиралар мазкур иловани гўёки банк карталарини ўғирловчи вирусли файллардан аҳолини ҳимоя қилиш воситаси сифатида тарғиб қилмоқда. Бироқ давлатнинг бу «ғамхўрлиги» нега мажбурлов, дўқ-пўписа ва оммавий рейдлар орқали амалга оширилмоқда?

Ҳақиқат шундаки, маҳаллий идоралар ишлаб чиққан ушбу дастур смартфон тизимига ўрнатилгач, қурилма хотираси, контактлар рўйхати, фото-видео файллар, микрофон, ёзишмалар ва географик жойлашувга чекланмаган рухсат олади. Бу эса мазкур илова орқали фуқаронинг телефонидаги ҳар бир маъруза, Қуръон оятлари тафсири ёки мустақил сиёсий фикрларни автоматик тарзда сканер қилиб, тўғридан-тўғри махсус хизматлар серверларига етказиб туриш имконини беради.

Энг ачинарлиси, Миллий гвардиянинг қуролланган ходимлари мактаб синфхоналарига бостириб кириб, синф ўқувчиларининг қўлидан телефонларини тортиб олган ҳолда ушбу кузатув тизимини мажбуран ўрнатган. Вояга етмаган ёшлар, масжидга келган намозхонлар ва даволанишга келган аёлларнинг телефонларини очиқчасига титкилаш — инсоннинг шахсий дахлсизлигини оёқости қилувчи тоталитар полициячи режимларга хос ёндашувдир. Бу Шинжонда уйғур мусулмонларига қарши қўлланилган Хитой назорат лагерлари моделининг Ўзбекистондаги тўғридан-тўғри нусхасидир.

Ислом шариати инсоннинг шахсий ҳаёти, сирлари ва мулкини мутлақ дахлсиз деб эълон қилган. Давлат ёки унинг куч ишлатар тизимлари бўлсин, ҳеч кимга мусулмонларнинг хат-хабарларини пойлаш, уларнинг хонадони ёки шахсий алоқа воситаларига айғоқчилик қилиш ҳуқуқи берилмаган. Аллоҳ субҳанаҳу ва таоло марҳамат қилади:

يَا أَيُّهَا الَّذِينَ آمَنُوا اجْتَنِبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ ۖ وَلَا تَجَسَّسُوا وَلَا يَغْتَبْ بَعْضُكُمْ بَعْضًا

«Эй иймон келтирганлар! Гумоннинг кўпидан четланинглар! Чунки баъзи гумонлар гуноҳдир. Жосуслик қилманглар ва баъзингиз баъзингизни ғийбат қилмасин!»  (Ҳужурот:12)

Росулуллоҳ ﷺ ўз ҳадисларида бундай тажовузни қаттиқ қоралаб: «Ким бир қавмнинг суҳбатига улар ёқтирмаган ҳолда қулоқ тутса, Қиёмат куни унинг қулоқларига эритилган қўрғошин қуйилади», деб огоҳлантирганлар (Бухорий ривояти).

Ҳукуматнинг ўз фуқароларини ёппасига шубҳа остига олиб, уларнинг телефонини мажбуран титкилаши ва назорат дастурларини ўрнатиши шаръан ҳаром бўлган тажассус (айғоқчилик) жиноятидир.

Тошкент режимининг асл қўрқуви: Фикрий ва сиёсий уйғониш

Мазкур оммавий назорат кампанияси бошқа воқеалар фонида авж олаётгани бежиз эмас:

• Таълим муассасаларида қизларнинг рўмоли бўйича маъмурий босимлар ва рўмолни кўкракни ёпмайдиган қилиб, орқадан боғлаш талаблари давом этмоқда;
• Тиббиёт марказлари ва корхоналарда намоз ўқиган ишчи-ходимлар ишдан бўшатиш билан таҳдид қилинмоқда;
• Кўчаларда соқолли ёшлар “ов” қилиниб, мажбуран соқоли қирилмоқда;
• Масжид имомлари зиммасига ёш намозхонларнинг сиёсий ва эътиқодий қарашларини текшириш бўйича 70 баллик тизим асосида назорат қилиш мажбурияти юклатилмоқда.

Буларнинг барчаси битта ҳақиқатни кўрсатади: режим халқнинг Ислом сари интилаётганидан, ёшлар орасидаги сиёсий ва фикрий уйғониш кучайиб бораётганидан хавотирда. Мафкуравий майдонда ҳақ сўзга қарши тура олмаган режим эндиликда рақамли дастурлар («APK Қўриқчи»), кўчалардаги минглаб сунъий интеллект камералари («Қалқон») ва ДХХ тазйиқлари орқали жамият устидан мутлақ полиция назоратини ўрнатишга уринмоқда.

Бир томондан ташқи мустамлакачиларга юрт бойликлари пешкаш  қилинаётган бўлса, иккинчи томондан юрт ичида оддий мусулмонларнинг намози, кийими ва телефони қамоқхона назорати остига олинмоқда. Бу — ташқи кучлар қаршисида муте, ўз халқи олдида шер бўлишдек тобе режимларга хос хусусиятдир.

Тарих гувоҳки, ҳеч бир зулм машинаси ва ҳеч қандай электрон кишанлар мусулмонларнинг қалбидаги иймон нурини ва ҳақ сўзни бўға олмаган. Совет Иттифоқининг қонли КГБси эплай олмаган ишни, бугунги рақамли назорат иловалари асло уддалай олмайди.

Мусулмонлар ўз шахсий дахлсизликлари, дини ва эътиқодини бундай тажовузлардан ҳимоя қилишлари шаръий мажбуриятдир. Яъни — халқ қўрқув ва сукут гирдобидан чиқиб, ўз ҳуқуқларини Шариат мезонлари асосида талаб қилиши ҳамда инсонларни бандаларнинг зулмидан Аллоҳнинг адолатига олиб чиқувчи, шахс дахлсизлиги ва қадр-қимматини тўлиқ кафолатловчи пайғамбарлик минҳожи асосидаги Рошид Халифаликни барпо этиш сари ҳаракат қилишидир.

Иззатуллоҳ

03.11.2026й