Трампга ҳаддини ким билдириб қўяди?!

بسم الله الرحمن الرحيم

Босқинчи (Исроил)нинг Ғазода 15 ойга яқин вақт мобайнида уюштирган тажовуз ва қатлиомлари ортидан, ўт очишни тўхтатиш тўғрисида имзоланган келишувни бузаётган бир пайтда, Ислом душмани Трамп Ғазо секторини эгаллаб, уни туризм марказига айлантириш учун қайта қуришини ва у ернинг мусулмон аҳлини қўшни давлатларга сургун қилишини айтди. 15 ойдан бери фақат танқид билангина чекланиб, бирор амалий ишга қўл урмаган 57 та мусулмон мамлакатлар ҳукмдорлари яна ўша ролни ўйнашга, яъни Трампга ҳаддини билдириб қўйиш ўрнига, унга мақтовлар ёғдиришгагина ярашмоқда. Бундай вазиятда Ҳизб ут-Таҳрир йигитлари мусулмонлар устидаги ҳукмдорлардан ҳисоб талаб қилиб, капиталист такаббур Трампга ва босқинчи (Исроил)га керакли жавоб қандай бўлишини айтиш учун кўчаларга чиқишди.

Жорий йилнинг 15-16 феврал кунлари Ҳизб ут-Таҳрир Туркия вилояти аъзолари мамлакатнинг турли шаҳарларида “Трампга ҳаддини ким билдиради?!” номи остида норозилик акцияси ва матбуот анжуманлари ўтказишди. Ҳар бир шаҳарнинг марказий гавжум жойларида ёки улардаги АҚШ элчихонаси ё консуллиги олдида ўтказилган бу акцияларда даъватчи йигитлар ўзига хос чиқишлар билан ҳукуматга ва халқ оммасига оташин хитоблар йўллашди. Бу чиқишларда ақлдан ўчмайдиган, қалбларга кириб бориб инсонни ларзага келтирадиган кучли чақириқлар айтилди. Чунки бу нидолар иймон аҳлининг қалбидан отилиб чиққан фарёдлари бўлиб, уни фақат Ислом ва мусулмонлар муаммоларидан ғафлатда юрган жоҳилларгина англамаслиги мумкин. Бу чиқишлар интернет тармоқларида борлиги ва уларни битта мақолага жойлаш имконсиз бўлгани учун бу жойда келтирмадик. Биз фақат охирги Халифалик пойтахти бўлган Истанбулда ўтказилган тадбир тафсилотларини келтириш билан чекланамиз. Шунга ҳам диққатни қаратмоқ керакки, бундай акция ва тадбирлар Исломий сиёсий фикрларни билдириш ва уни етказиш услубларидан бири бўлиб, бундай услуб ва воситалар оммага Исломни етказиш ҳамда уни ҳаётда татбиқ қилишга умматни ҳаракатлантириш мақсадида амалга оширилади.

Ҳизб ут-Таҳрир Туркия вилоятининг Истанбул шаҳридаги аъзолари 15 феврал куни АҚШ элчихонаси олдида ўтказган норозилик акцияси ва матбуот анжуманида қуйидаги фикрларни билдиришди:

Ҳукумат ва жамоатчиликка йўлланган хитобда, Американинг Яқин Шарқ режалари ва босқинчи (Исроил) билан муносабатларни нормаллаштириш масаласини муваффақиятсизликка учратган 7 октябрдаги Ақсо тўфонининг аҳамияти урғуланди. Дунёнинг энг илғор ҳарбий қуролларига эга (Исроил) армияси бир гуруҳ иймонли, шижоатли жамоага тезкор қаршилик кўрсата олмагани, куфр кучлари қанчалик ҳайбатли кўринмасин, журъатли мўминлар қаршисида мағлуб бўлишга маҳкумлиги айтилди. Бу борада талаб қилинган иш босқинчи (Исроил) вужудига қарши бирон мусулмон армиясини сафарбар қилишдир. Шунда Муборак Заминнинг яҳудий ифлослигидан тозаланиши вақт масаласи бўлиб қолади…

Кейин (Исроил)нинг Ғазодаги босқини ва ваҳший қатлиомларига қарши на араб давлатлари тепасидаги ҳокимлар, на Эрон режими ва на Туркия ҳукумати бирор амалий қадам ташламаганига диққат қаратилди. Баёнотда мусулмон ўлкаларидаги раҳбарлар Трампни табриклаш учун ўзаро мусобақа қилишгани, ундан хорларча Яқин Шарқда тинчлик ва барқарорликни таъминлашини умид қилганларини эслатилган ҳолда шундай дейилди: Эсланг! Минглаган мисрликларни қамоққа олиниши, аёл-қизларнинг зўрланиши ва қатл қилиниши жинояти тепасида турган Абдулфаттоҳ Сисини “менинг энг севимли диктаторим” деган шу Трамп эмасмиди?! Эрдўғонга “аҳмоқлик қилма” деб пастга уриб, бутун дунёга шарманда қилган ҳам ўша Трамп эмасмиди?!

Матбуот анжуманида давлат раҳбарига ва ҳокимларга хитобан шундай дейилди: “Эй раҳбарлар! Сизнинг орангизда ҳақиқий эр кишилар йўқми?! Ичингизда дунё манфаатларини қўлининг терси билан суриб ташлаб, ёлғиз Аллоҳнинг ризоси ва Охиратни қозониш учун Трампга ҳаддини билдириб қўядиган бирорта дуруст одам йўқми?! Қуръони Карим таъбири билан айтганда: Орангизда ақл-ҳуши жойида, тузукроқ бирорта одам ҳам йўқми?!”

Баёнотнинг сўнггида мустамлакачи Америкага ва унинг такаббур раҳбари Трампга хитобан қуйидагилар айтилди:

“Эй Трамп! Биз сени жасоратлантираётган нарса устимиздаги раҳбарларнинг сукути ва қўрқоқлиги эканлигини жуда яхши биламиз. Сен ҳам шуни яхши билиб ол ва ҳеч қачон эсингдан чиқарма: Ислом Умматининг Фаластин ерларига бўлган садоқати, Фаластиннинг бир қаричидан ҳам воз кечмайман, деган Халифа Абдулҳамиднинг садоқати кабидир. Бизнинг бу юртга бўлган соғинчимиз эса, Қуддус ишғол остида бўлиб турар экан, ўзига кулишни ҳаром қилган Салоҳиддин Айюбийнинг соғинчи кабидир. Истаган режангни тузиб, хоҳлаган макрингни ишга солсанг ҳам, Фаластиннинг ҳар бир қарич тупроғи Исломникидир ва Исломники бўлиб қолади. Аллоҳнинг нусрати билан мусулмонлар Рошид Халифаликни тиклагач, малайлар ва иттифоқчилар билан биргаликда ишғол қилганларинг Ислом диёрларидан улоқтириласизлар!”

Матбуот баёноти ўқилиши ортидан Ақсо Илм ва Давлат Маркази (АКМЕР) раҳбари, ёзувчи Ҳамза Эр чиқиш қилди ва қуйидаги фикрларни айтди: 15 ойдир Ғазода содир бўлган ҳодисаларга қаралса, бу масала Араб-(Исроил) ёки Фаластин мавзуси эмаслиги ўз исботини топди. Биз қабул қилолмаган энг оғир нарса (Исроил) уюштирган қатлиомларни очиқчасига қўллаб-қувватлаган АҚШ ва унинг такаббур президенти Трампнинг 2 миллиард мусулмон олами кўзига тик қараган ҳолда Ғазо аҳлини юртларидан сургун қилиш “жасорат”ини кўрсатганидир. Асл уялиш керак бўлган нарса ҳам мана шудир. Бизнинг курашимиз тавҳид кураши эканлигини, ботилнинг устидан ғолиб келиш кураши эканлигини ва ўтмишда фиръавнлар қандай мағлубиятга учраганини Трампга кўрсатиб қўйиш заруратга айланди. Ҳамза Эрнинг нутқидан кейин “Армиялар Ақсога!”, “Мана бу ер (яъни АҚШ элчихонаси) қотиллар уяси!”, “Халифалик тиклансин, Америка йўқ бўлсин!” шиорлари остида дастур якунланди.

Мақола сўнггида шуни таъкидлаймизки, Халифаликнинг йўқлиги мусулмонларни бугунги хорликка олиб келди ва бу ҳолат янада ёмонлашишда давом этмоқда. Ҳатто энг муқаддас жойларимизни инсониятнинг энг жирканч тоифалари эгаллаш ҳаракатига тушишди. Бундай хорликни тўхтатиш учун мусулмонлар ҳар хил ихтилофларни четга суриб бирлашишлари зарур. Турли босимларга қарамай, Ҳизб ут-Таҳрир ўтказган ушбу акцияда қатнашган холис кишилардан Ўзбекистон мусулмонлари ҳам ибрат олишлари керак. Зеро, Аллоҳнинг нусрат-ғалабаси Ислом атрофида бирлашган ихлосли кишиларгагина насиб этади. Аллоҳ таоло дейди:

وَأَطِيعُوا اللَّهَ وَرَسُولَهُ وَلَا تَنَازَعُوا فَتَفْشَلُوا وَتَذْهَبَ رِيحُكُمْ ۖ وَاصْبِرُوا ۚ إِنَّ اللَّهَ مَعَ الصَّابِرِينَ

– “Ва Аллоҳ ҳамда Унинг пайғамбарига итоат қилингиз ва (ўзаро) талашиб-тортишмангизки, у ҳолда сустлашиб, куч-қувватингиз кетур. Сабр-тоқат қилингиз! Албатта, Аллоҳ сабр қилгувчилар билан биргадир”. (Анфол:46)

Ҳизб ут-Таҳрир Ўзбекистон матбуот бўлими аъзоси Абдураҳмон

22.02.2025й