بسم الله الرحمن الرحيم

Саудия Арабистони сафаридан кўзланган мақсад

Шавкат Мирзиёев бошчилигидаги Ўзбекистон делегацияси 2 кунлик давлат ташрифи билан Саудия Арабистонида бўлди. Президентга бир неча таниқли раҳбарлар ҳамроҳлик қилган ва сафарнинг ютуғи сифатида иқтисодий битимлар кўрсатилган бўлса-да, ахборот тарқатувчи расмий ва норасмий манбалар фақат президент шахсини ва Ўзбекистон муфтиси ва бир неча расмий уламолар ҳамроҳлигида ўтган умра зиёратини ёритди. Бу ҳаракатларни кузатган одам бу Умра сафари президентнинг обрўсини ошириш учун ўйлаб топилган пиар эканлигига амин бўлади. Чунки Қорақалпоғистон ҳодисалари холис ўрганилмагани ва унга алоқадорликда гумонланиб юзлаб инсонларнинг ҳамон ҳибсда қолаётгани, шунингдек кадрлар сиёсати билан боғлиқ муаммолар ҳамда янги конституцияга ўзгартириш ва қўшимчалар киритишни тасдиқлаш мақсадида ўтказилиши режаланган референдум билан боғлиқ муаммолар ва бошқа ички инқирозлар президентнинг обрўсини тушириб юборди. Буни Мирзиёевнинг ўзи ҳам яхши сезиб тургани учун матбуот вакиллари билан учрашувларида ўз сиёсатини очиқчасига мадҳ қиляпти. Шунингдек, у бу сийқаси чиққан услублар билан халқ ишончини қозониб бўлмаслигини ҳам тушуниб етган. Шунинг учун халқни тўлқинлантириш ва эртанги кунга умид уйғотиш учун Умра режаси тузилди. Шундай қилиб, 2 йил давомида кечиктириб келинган сафар 8 август куни президентнинг ташқи сиёсат бўйича махсус вакили Абдулазиз Комиловнинг Саудия Арабистони ташқи ишлар вазири шаҳзода Файсал бин Фарҳон билан ўтказган телефон мулоқоти ортидан амалга ошди.

Мирзиёевнинг махсус ўрнатилган камералар қаршисида намоз ўқиб дуо қилганини Ислом ғалабаси деб гумон қилиш ёки Исломга кенг йўл очилишидан мужда деб талқин қилиш катта хатодир. Чунки Ислом инсоннинг ўзи билан, унинг Роббиси ҳамда бошқа инсонлар билан бўлган алоқаларини тартибга солувчи мукаммал аҳком-қонунлари билан давлат ва жамият ишларини ҳам ўз ичига олган. Исломдаги Умра ибодати эса ҳар қандай мусулмон бажарадиган суннат ибодат бўлиб, унинг адо этилиши давлат ёки жамият ишларидаги ўзгаришга олиб келмайди. Шу сабаб Мирзиёев саййидимиз Муҳаммад алайҳиссаломга салавот ва саломлар айтиб «Ҳужраи саодат»ни зиёрат қилгач, Саудия Арабистони подшоҳлигининг йирик компаниялари ва молиявий тузилмалари раҳбарлари билан учрашув ўтказди. Мирзиёев саудиялик тадбиркорлар билан учрашувда уларни Ўзбекистондаги йирик банклар, саноат ва инфратузилмаларни хусусийлаштиришда қатнашишга чақирди. Шунингдек, ташриф давомида Тошкентда Ислом тараққиёт банки ваколатхонаси очилиши маълум қилинди.

Кўриниб турганидек, ҳукумат Умра зиёрати орқали одамларнинг туйғулари билан ўйнашди ва айни пайтда Аллоҳга қарши бориб, фоизли тижоратни кенгайтиришга ва стратегик соҳаларни ҳорижликларнинг шахсий мулкига айлантириш билан халқ тақдирини хатарга қўйишда давом этяпти. Ўзбек ҳукумати Саудия Арабистони билан алоқаларни кучайтириш орқали Американи рози қилишга уринмоқда. Бу билан эса Ўзбекистон иқтисоди, таълим ва ижтимоий соҳалар, сўнгра барча секторлар тўлалигича ваҳший капитализм чангалига топширади. Энг даҳшатлиси, халқимиз ҳақ билан ноҳақни ажрата олмай қолади. Ҳукумат бундай қадамларни ташлар экан, бирор мусулмон ўлкани ўзига модел қилиб олмаяпти. Чунки кечагина Ўзбекистонга ибрат қилиб кўрсатилган Туркия каби давлатлар бугун даҳшатли инқирозларни бошидан кечирмоқда. Ўзбекистон ҳукумати ўзи тушиб қолган демократия ботқоғида яшаб қолиш учун мажбурият юзасидан шундай қарорлар қабул қиляпти.

Хулоса қилиб шуни айтамизки, Мирзиёев ҳукумати референдумни муваффақиятли ўтказиш орқали ўз сиёсатини мустаҳкамлашга ва куфр демократияни кенг ёйиб Ўзбекистонни секуляр давлатга айлантиришга жиддий киришмоқда. Бу кураш аввалгидек дағаллик ва зўравонлик билан амас, балки замон талабига кўра халқнинг фикр ва туйғуларини исталган йўналишга солиш, яъни сиёсий манипуляция йўллари билан олиб борилади.

 Ҳукуматнинг бундай хиёнат қилишига, сўнг зулм йўлига ўтишига халқимиздаги ғоявий ва сиёсий бўшлиқ имкон беряпти. Бу бўшлиқ Исломни фақат ибодат ва аҳлоқдан иборат дин деб тушунишдан ҳамда Исломни сиёсий тузум эканлигини қабул қилмаслик оқибатида пайдо бўлди. Шуни алоҳида таъкидлаш лозимки, сарой уламолари ва уларнинг китоблари Шариат аҳкомларидан фақат ибодат ва одоб ахлоқ ҳукмларига чекланиб, мусулмонларнинг Исломий дунёқарашини кенгайтирмайди. Қисқача айтганда, Исломни тўлиқ эмас, балки фақат бир қисмини акс эттиради, холос. Зотан, Ислом ўлкалари мана шундай таълим дастурлари ва демократик қонунлар татбиқи натижасида динидан ажратилиб, қолоқ ва қашшоқ давлатчаларга айлантирилди. Шунинг учун биз ҳам ўзимиздаги инқироз ва муаммолардан батамом қутулиш ҳамда ҳақиқий маънода юксалиш учун фасод демократиядан воз кечишимиз ва Аллоҳ Субҳанаҳу ва Таоло нозил қилган дин асосида яшашимиз зарур. Аллоҳ Таоло айтади:

﴿فَإِمَّا يَأْتِيَنَّكُم مِنِّي هُدًى فَمَنِ اتَّبَعَ هُدَايَ فَلاَ يَضِلُّ وَلاَ يَشْقَى + وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى﴾

– “Бас, сизларга Мен тарафдан ҳидоят келганида ким Менинг ҳидоятимга эргашса, йўлдан озмас ва бахтсиз бўлмас. Ким Менинг эслатмамдан юз ўгирса, бас, албатта унинг учун танг-бахтсиз ҳаёт бўлур ва Биз уни қиёмат кунида кўр ҳолда тирилтирурмиз”.                                                                   (Тоҳа:123-124)

Ҳизб ут-Таҳрирнинг марказий медиа офиси учун Ислом Абу Халил – Ўзбекистон