Мутолаага вақтингиз борми?!

بِسْمِ اللهِ الرَّحْمٰنِ الرَّحِيم

Зар қадрини заргар билади, вақт қадрини ким билади?

Аввало, шуни айтиб ўтмоқчиманки, бу мақолада вақт қадрини кимлар билиши тўғрисида мулоҳаза юритиш қасд қилингани йўқ. Қасд қилинган мақсад шуки, балки бу фикр-мулоҳазалар сабаб сиз ҳам вақт қадрини биладиган инсонлар қаторига қўшилишга ҳаракат қилишни бошлаб юборарсиз. Лекин бу иш мен вақт қадрини биладиган одамман, деб мақтаниш учун эмас, балки ўзингизга берилган умрни бекорга сарфламаслик учун бўлиши лозим албатта.

Тўғри, вақт, умр, тирикликнинг қадри ҳақида жуда кўп гапирилади, ҳатто бу мавзу озгина меъдага ҳам тегиб, у ҳақида гапирилса кўпчилик унчалик эътибор бермайдиган ҳолат мавжуд. Қисқача айтганда, зерикарли мавзулардан бири сифатида қабул қилинади. Мен ҳам сизга вақтнинг қадри тўғрисида узундан-узун ваъз ўқимоқчи эмасман, гапни қисқа қиламан. Сизга оддий бир ишни таклиф қиламан, агар сиз шунга вақтингизни қизғанмасангиз ва ўзингиз учун зарур, деб билсангиз албатта. Агар аксинча бўлса, унда ўқишни шу ерда тўхтатаверинг, чунки бу ёғи сиз учун зерикарли бўлиб қолади.

Демак, давомини ўқишга қарор қилган экансиз, юқоридаги таклифимни билдираман. Эътибор беринг, фақат қариялар вафот этяптими ёки янги туғилган чақалоқларга ҳам, ёш, навқирон йигит-қизларга ҳам ўлим келяптими? Ўлим ёш танлаяптими? Албатта йўқ. Демак, сизнинг ёшингизни ўлим учун аҳамияти йўқ. Яна эътибор беринг, фақат беморлар қазо қиляптими ёки бақувват, соғлом одамларнинг бошига ҳам қазо келяптими? Ўлим одамни соғлигига қараяптими? Албатта йўқ. Демак, сизнинг соғлигингизни ўлим учун ҳеч қандай аҳамияти йўқ. Эътиборингизни яна бир нарсага қаратинг, фақат бу дунё ҳаётидаги ишларини тугатиб бўлган одамлар ўляптими ёки ҳали бирон иш қилишга улгурмаган одамлар ҳам ўляптими? Ўлим ишларнинг чала қолиб кетаётгани билан ҳисоблашяптими? Албатта йўқ. Демак, сизнинг бугунги ва келажакдаги режалаштирган ишларингиз билан ўлимнинг умуман иши йўқ. Эътибор беришда давом этадиган бўлсангиз, ўлим тўғрисидаги кўп ҳақиқатлар ойдинлашади.

Ўлимни эслатишдан мурод шуки, у умрни кутилмаганда тўхтатиб, узиб қўядиган нарса эканлигидир. Айнан ўлим сиз кутмаган вақт, жой, шароитда келади. Шунинг учун ҳам ўлимни тез-тез эслаб туриш вақт қадрини билиш учун энг кучли туртки бўлса ажабмас. Энди нега вақт қадрини билишим керак, нега бу шунчалик зарур, деяётган бўлсангиз, шундай жавоб бераман: Сизга умрни берган, ҳар бир сонияни тақдим этаётган Яратувчингиз учун У берган шу умрдан қанчасини сарфлаётганингиз тўғрисида ўйлаб кўришнинг вақти келмадимикин? Агар бу ҳақида ўйлаган бўлсангиз ва буни канда қилмаётган бўлсангиз ҳамда шунга биноан яшаётган бўлсангиз, сиздан Аллоҳ рози бўлсин. Агар аксинча бўлса, демак, савол ўз кучида қолади: Аллоҳ учун, Аллоҳнинг дини учун бир кунда қанча вақтингизни ажратяпсиз? Ҳеч қандай оқлашлар, баҳоналарсиз ҳақиқат юзига тик боқиб, фақат ўзингиз учун бир ўйлаб кўринг, бошқаларга билдиришингиз шарт эмас. Бу тўғрида мулоҳаза юритишнинг муҳимлиги шундаки, сиз ҳали тирик экансиз, вақтингиз бор экан, ўлим уни тўхтатиб, узиб қўйишидан олдин ўз ҳаётингиз тўғрисида бир хулосага келиб олинг. Яъни сиз Яратувчингизни розилигини олиш учун яшаяпсизми ёки…?

Бу фикр-мулоҳазаларни охиригача сабр билан ўқиб, вақтингизни сарфлаб, озгина бўлса-да фойда олган бўлсангиз, демак, мен ҳам вақтимни бекорга сарфламабман, бу билан кўзлаган мақсадимга эришган бўламан.

Ҳизб ут-Таҳрирнинг Ўзбекистондаги медиа офиси. Фаррух  

11.11.2019й