Қуръон ёқилиши атрофидаги сиёсий ишлар

بسم الله الرحمن الرحيم

21 январ куни Стокгольмдаги Туркия элчихонаси яқинида “Қаттиқ келишув” сиёсий партияси етакчиси Расмус Палудан тарафидан Қуръони Карим намойишкорона ёқилди. Ўнг қанот сиёсатчи Палудан Қуръонни ёқиш ва Пайғамбаримиз Муҳаммад алайҳиссаломни жамоатчилик кўз ўнгида таҳқирлаш учун расмий рухсат олганини бир кун олдин ижтимоий тармоқларда эълон қилган эди. Демократик қонунларга кўра, эътироз билдириш ҳуқуқигагина эга мусулмонлар ўз эътирозларини билдиришди. Аммо интернет тармоқларида жонли ёйинланган бу манфур жиноят ўз вақтида, 30 га яқин полициячи қўриқлови ҳамда Дания Миллий разведка бошқармасининг етти нафар фуқаро кийимидаги зобити назорати остида амалга оширилди. Шундан сўнг машҳур популист ва шоумен Ражаб Тоййиб Эрдўған Қуръон ёқилишини кескин қоралаб чиқди. Маълумки, Қуръон ёқилишидан бир ҳафта олдин Швецияда намойишчилар тарафидан Эрдўған макети бўйнидан осиб қўйилган эди. Намойишчиларнинг бу қилмиши юзасидан Туркиядан Швецияга ҳеч қандай жавоб бўлмади. Мана шу ишнинг алами ҳамда қасддан Туркия элчихонаси ёнида Қуръон ёқилгани ва бадбахт Палуданнинг “Туркияга зарба бердим” деган сўзи Эрдўған ҳукуматини кўринишда Қуръонни, аслида эса ўзининг сиёсий нуфузини мустаҳкамлаб олиши учун кескин чиқишлар қилишига имкон пайдо қилди. Амалда эса, Туркия Швецияга қарши на сиёсий-иқтисодий ва на бошқа турдаги жазо чораларини қўллади. Фақат Туркия Швециянинг НАТОга қабул қилиниши борасида аввалда қўйган ветосига содиқ қолишини урғулаш ва иккита учрашувни бекор қилиш билан чекланди. Маълумки, Швеция (Америка истагига кўра) Туркия аъзо бўлган НАТОга қўшилиш учун ариза топширган эди. Расмий Анқара Швециядан, у ерда сиёсий мақом олган курд мухолифатчилар гуруҳини террористик ташкилотлар рўйхатига киритишни ва уларни Туркияга экстрадиция қилишни талаб қилди. Мазкур талаблар бажарилмаса Швециянинг НАТОга киришига Туркия тўсиқ бўлиши айтилди. Бироқ воқега қаралса, Туркия нафақат халқаро сиёсатда, балки ички сиёсатда ҳам Америка истакларига қарши бормаслиги маълум бўлади. Биргина мисол, Туркияда узоқ йиллар жосуслик қилганликда айбланган роҳиб Крейг Брансон қатор моддалар бўйича судланганига қарамай, Вашингтон талабига кўра Туркиядан Америкага юборилган эди. Сурия масаласида ҳам Эрдўған ҳукумати Американинг сиёсий ечимини амалга ошириш учун ҳаракат қилиб келяпти. Шунинг учун айтиш мумкинки, Швециянинг НАТОга қўшилишига Туркиянинг қарши туриши ёки рози бўлиши Америка талабларига боғлиқ ишдир.

Демократияни нажот йўли деб билган адашган мусулмонлар “Эрдўған ҳукумати Қуръон ҳимоясида Швецияга сиёсий босим қиляпти” деган фикрда. Агар бу фикр тўғри бўлса, нега Туркия Палудан партиясини расман рўйхатга олган Данияга сиёсий босим қўлламаяпти? Чунки Палудан Швециядан сўнг Данияда муборак жума куни, масжид олдида, полиция ҳимояси остида Қуръонни ёқди ва ёқишда давом этишини айтди. Шунингдек, Голландия парламент биноси қаршисида ҳокимият рухсати билан “Пегида” ҳаракати етакчиси Қуръони Каримни йиртиб оёқ ости қилди. Бу ҳодисалар Швециядаги воқеадан бир неча кун ўтиб рўй берди. Шунга қарамай, Эрдўған ҳукумати Дания ва Голландияга қарши одатдаги (ожиз халққа хос) қоралаш чиқишини ҳам қилмади! Туркия ва бошқа мусулмон мамлакатлар раҳбарлари Швециядаги ҳодисани қоралашди. Уларнинг қўлида кучли армиялар ва миллионлаган мусулмонлар иродаси мавжудлигига қарамай, қўлидан бирор иш келмайдиган заиф инсонлар каби қоралаш билан кифояланишди. Бу ҳокимлар Ислом қадриятлари ҳимояси йўлида амалий қадам ташламагани куфр оламини ғурурлантириб, уларни Қуръон ва Пайғамбар алайҳиссаломни таҳқирлашга шижоатлантиряпти. Хоин раҳбарларнинг қоралаш акциясига “исломий” деб номланган ташкилотларнинг қўшилгани, улар тутган йўлни Исломнинг йўли, деб тушуниб қолишга олиб келяпти. Шубҳасиз, бундай позиция мусулмонларнинг Исломий туйғуларини сўндиради ва дини борасида бефарқ бўлишга олиб боради. Бундан ҳам даҳшатлиси, Аллоҳнинг муқаддас каломи ва Саййидимиз Муҳаммад алайҳиссаломнинг шаъни топталишига мусулмонларни тоқат қилишга ўргатади.

Мусулмонлар устидан татбиқ қилинаётган демократик тузум уруш, нотинчлик ва турли фожиаларни келтириб чиқарди. Оқибатда мусулмонлар бошпана излаб Европагача боришга мажбур бўлишди. Бундан ташқари, Ислом дунё бўйлаб энг тез ёйилаётган дин бўлиб турибди. Ғарбда Исломни қабул қилаётганлар сони ортиши ҳамда “юқори туғилиш кўрсаткичлари” орқали мусулмонлар сони ўсаётгани куфр давлатларини Ислом муқаддасотларига ҳужум қилишига сабаб бўляпти. Ғарб сиёсатчилари ва зиёлилари Қуръон ва Расулуллоҳ ﷺни ҳақоратлаш Ислом динига бўлган эҳтиромни заифлатишини ва бундай хунрезлик куфр демократиянинг Ислом устидан эришган ғалабаси, деб билишади. Зеро, демократиянинг олий ғояси динни давлат ва ҳаёт ишларидан буткул четлатиб, фасод эркинликларни ҳаётнинг асосий қадрияти бўлиб қолишини таъминлашдир. Ислом ҳаром қилган нарсаларни ҳалол қилувчи, фарз ҳисобланган ҳукмларни жиноят омили сановчи капиталистик тузум Қуръон ва Суннатга йўналтирилган нафрат ва адоватнинг манбасидир. Шунинг учун Аллоҳ қайтарган ишларга мусулмонлар оммасини чорлаётган ва мажбурлаётган ҳамда Аллоҳ буюрган вазифаларни адо этишга уринаётган мўмин-мусулмонларни жазолаётган ҳокимлар Қуръонни ёқувчилардан ҳам ваҳшийроқ кимсалардир. Улар ҳукм юритаётган бир дақиқа, Қуръонни ёқишдан ҳам улканроқ жиноятга тенгдир. Швецияда сўз эркинлигидан келиб чиқиб Тавротни ёқишни режалаштиришган эди. Босқинчи (Исроил) яҳудийлик дини шаънини ва яҳудийлар обрў-эътиборини ҳимоя қилиб бу ишнинг олдини олди. Агар мусулмонларнинг ҳам ўз давлати бўлганида, Қуръонга ва Пайғамбар алайҳиссаломнинг шаънларига номуносиб сўз айтишни кофирлар хаёлига ҳам келтиролмас эди. Хулоса ўрнида шуни таъкидлаш керакки, Қуръонни ёд олиш ва ўқиш уни муҳофаза қилмайди. Бундай ҳолатда Қуръон ўликларга ўқиладиган китоб бўлиб қолади. Ваҳоланки, Қуръон ўзининг ҳаётга татбиқи орқали бутун инсониятни зулматлардан нурли ҳаётга олиб чиқиш учун нозил бўлган. Шу боисдан мусулмонлар, балки бутун олам Қуръон ҳукмларини ҳаёт майдонида тўла татбиқ этадиган Рошид Халифаликка муҳтождир. Қуръонни ва Росулуллоҳ ﷺ суннатларини давлатнинг ва ҳаётнинг асосига айлантирувчи мана шу давлатни тиклаш мусулмонлар учун фарздир! Оқил мусулмонлар бу ишнинг нақадар жиддий масала эканлигини англашади ва бор имкониятини мана шу фарзни адо этиш учун сарф этишади.

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

04.02.2023й

+1

0