Фолбин ҳузуридан нажот исташ очиқ ширк амаллардандир

بِسْمِ اللهِ الرَّحْمٰنِ الرَّحِيم

Уммат ўз динидан узоқлашган сари жоҳилият урфлари мусулмонлар  орасига кириб кела бошлади. Ҳатто яқин ўтмишдаги аждодларимиз ҳазар қилган фолбинлик одатий ҳолга айланиб, тарғибот марказлари орқали баҳс майдонларига олиб чиқилмоқда. Бугунги бор воқеликка назар солинса, инсонлар уларнинг ҳузурига ишлари юришмаётганидан, оиладаги эр-хотинларни ўзаро келиша олмаётганидан, келажак ҳаётини билиш ёки бирор дардга чалинган ҳам, савдоси юришмай қолган тижоратчи ҳам, тузукроқ мансабни мўлжаллаган амалдор ҳам, фарзандсизлар фарзанд илинжида фолбинлар эшигини қоқмоқдалар.

Фолбинлар ҳузурига ошиқаётганларнинг аксари юқорида баён қилганимиздек, ўз динларидан узоқлашиб кетган заиф мусулмонлардир. Инсонларнинг фолбин ҳузурига ошиқишларининг асл сабабларидан яна бири, бу ишларга диний тус берилди. Натижада, одамлар фолбинликни динда бор иш, деб тушуна бошладилар. Бир сўз билан айтилса, Ислом ақидасини тиниқ тушунмаганлари боис, барча муаммоларга фолбин ва азаимхонлардан нажот излай бошладилар. Буюк Қудрат Эгаси бўлган Роббимизни қўйиб, ўзимиз каби ожиз махлуқлардан нажот излаш очиқ ширк амаллардан бўлиб, бундай ишлардан узоқ бўлиш ҳар бир иймон эгасидан талаб қилинадиган амалдир.

Сизу бизлар мусулмон фарзандлари бўлганимиз сабабли ушбу ишларни қанчалик тўғри ёки нотўғрилигига Ислом дунёқарашидан жавоб излаймиз. Фолбин ва коҳинларга бориш шаръан ножоизлиги хусусида Жобир ибн Абдуллоҳ разияллоҳу анҳу Пайғамбар с.а.в. дан ривоят қилиб  шундай дейдилар:

عن جابر بن عبد الله رضي الله عنه عن النبي صلى الله عليه وسلم قال: » من أتى كاهنا فصدقه بما قال فقد كفر بما أنزل على محمد صلى الله عليه وسلم «. (الألباني: صحيح الترغيب والترهيب

«Кимки коҳиннинг олдига борса ва у айтган нарсани тасдиқласа, бас Муҳаммад соллаллоҳу алайҳи ва салламга нозил бўлган нарсага кофир бўлибди». 

Сафия Пайғамбар с.а.в.нинг баъзи аёлларидан ривоят қилган ҳадисларида Набий соллаллоҳу алайҳи ва саллам дедилар: 

عَنْ صَفِيَّةَ عَنْ بَعْضِ أَزْوَاجِ النَّبِىِّ صلى الله عليه وسلم عَنِ النَّبِىِّ صلى الله عليه وسلم قَالَ: » مَنْ أَتَى عَرَّافًا فَسَأَلَهُ عَنْ شَىْءٍ لَمْ تُقْبَلْ لَهُ صَلاَةٌ أَرْبَعِينَ لَيْلَةً

«Кимки «арроф»нинг олдига бориб, бирор нарса ҳақида сўраса, қирқ кечагача унинг намози қабул бўлмайди». (Саҳиҳи Муслим)

Ҳадис уламолари фолбиннинг сўзига ишонмаган ҳолда унинг олдига бориш гуноҳи кабира бўлишини англатади. Фолбиннинг сўзини тасдиқламаган ҳолда унинг олдига борган одам эса, бу ишнинг зино, ўғрилик, қотиллик каби гуноҳи кабиралар қаторида турадиган жиноят эканини билгандан сўнг бу йўлдан қатъий қайтиши ва қилмишлари учун истиғфорлар айтиб, тавба қилиши зарур.

Хулоса ўрнида айтамизки, бундай ҳалокатга етакловчи гуноҳдан эхтиёт бўлинг. Ўткинчи дунё ташвишларини деб ҳар қандай дунё матосини сарф этиб ҳам топиб бўлмайдиган иймонингизни бой бериб қўйишдан эҳтиёт бўлинг.

Ҳизб ут-Таҳрирнинг Ўзбекистондаги медиа офиси. Зайниддин

11.01.2020й