Келажакдан умидингиз борми?

بِسْمِ اللهِ الرَّحْمٰنِ الرَّحِيم

Баъзида ўзингизни худди қоронғу туннелда кетаётгандек ҳис қилмайсизми? Бу туннелнинг охири йўқдек, ҳеч қачон тугамайдигандек, охирида ҳеч милтиллаган бўлса ҳам ёруғлик кўринмайди. Бу туннелда кетаверасиз, кетаверасиз, бор умидингиз унинг охири албатта ёруғликка олиб чиқади, деган илинж. Бироқ охири чарчайсиз, ҳолдан тоясиз, тоқатингиз тоқ бўлади, умидсизликка тушасиз. На орқага йўл бор, на олдинга, ўзингизни боши берк кўчага кириб қолиб, ундан чиқишни билмаётган одамдек ҳис қиласиз…

Бугун биз яшаётган жамиятни ҳам қоронғу туннелга ўхшатиш мумкин. Ушбу жамиятда яшаётган инсон ўзини худди қоронғу туннелда кетаётгандек сезади, келажакка қараса ҳамма ёқ зим-зиё, ҳеч нарса кўринмайди, худди қоронғу туннелнинг охири кўринмагандек. Сиз ҳам келажакка қараб кўринг, бирор ёруғлик кўриняптими, яъни келажакда ҳаммаси яхши бўлишига ишончингиз комилми? Бундай ишонч бўлиши учун бугун унга замин ҳозирланиши керак албатта. Замин ёки асос бугуннинг ўзида кўринмаса келажак ҳақидаги яхши ниятлар қуруқ гапдан бошқа нарса эмас. Масалан, сиз фарзандингизни келажакда яхши инсон бўлиши учун унга таълим-тарбия берасизми ёки ўз ҳолига ташлаб қўясизми? Ўз ҳолига ташлаб қўйсам ҳам яхши инсон бўлиб улғаяверади, дея таваккал қиласизми? Бундай таваккалчилик сизга қимматга тушиши ҳеч гап эмас. Ҳар қандай онгли инсон фарзандининг келажаги учун бугундан қайғуриши бор ҳақиқатдир. У фарзандининг келажаги борасида таваккал қила олмайди. Шунинг сингари жамият ва давлатнинг келажаги, умуман инсоният келажагига бефарқ бўлмаган, улар ҳақида фикрлаган инсон ҳам хотиржам бўла олмайди, уни ўз ҳолига ташлаб қўйиб, асоссиз умид ва ниятларга берилмайди.

Ҳозирда одамлар орасида келажакка умид-ишонч сўниб боряпти, сўнмаганларида ҳам ишонч ҳеч қандай асосга эга бўлмаган қуруқ, ноаниқ гаплар ва туйғуларга чекланиб қолган. Таниш-билишларингизга, яқинларингизга, оила аъзоларингизга келажак ҳақида савол бериб кўринг. Аниқки, аксар ҳолатларда ноаниқ жавоб оласиз. Уларда келажакнинг қандай бўлиши ҳақида тиниқ тасаввур йўқлигига гувоҳ бўласиз. Чунки бундай тасаввур бўлиши учун ҳозир унинг пойдевори қурилиши лозим. Худди фарзанд келажаги учун бугундан ҳаракат қилишни бошлаш лозим бўлганидек. Айнан мана шу пойдевор мавжуд бўлса ёки уни барпо қилиш учун ҳаракат бошланган бўлса келажакка умид пайдо бўлади, ваниҳоят, қоронғу туннел охирида ёруғлик кўринади.

Бироқ бу пойдевор ишончли ва тўғри манба асосида қурилиши лозим. Инсон учун бу манба унинг Яратувчиси томонидан бўлиши лозим, акс ҳолда у ўзининг ожиз ақлидан келиб чиққан ечимларга таянади-да, яна нотўғри йўлда юришда давом этаверади, худди ҳозирда бўлаётганидек. Аллоҳ Таоло айтади:

وَهَدَيْنَاهُ النَّجْدَيْنِ

– “Биз инсонга иккала йўлни ҳам – яхшиликни ҳам, ёмонликни ҳам кўрсатдик”.               (Балад:10)

Шунга кўра, Аллоҳ бизга буюрган йўлни онгли равишда танлаб, ундан юришда бардавом бўлар эканмиз, ҳеч ҳам адашмаймиз, қалбимиз хотиржам бўлади. Келажак учун пойдеворни ишончли ва мустаҳкам асосда барпо этишга муваффақ бўламиз, келажакка умид-ишончимиз қатъийлашади. Биз мусулмонлар учун бундан бошқа тўғри йўлнинг ўзи йўқ.

Ҳизб ут-Таҳрирнинг Ўзбекистондаги медиа офиси. Фаррух

21.12.2020й