Аллоҳнинг душманлари жиноятчисан деса бошингизни эгасизми?
Аллоҳнинг душманлари жиноятчисан деса бошингизни эгасизми?
بسم الله الرحمن الرحيم
وَإِذَا قِيلَ لَهُمْ لاَ تُفْسِدُواْ فِي الأَرْضِ قَالُواْ إِنَّمَا نَحْنُ مُصْلِحُونَ
– “Уларга: “Ер юзида бузғунчилик қилманглар”, дейилса, “Биз ислоҳ қилувчилармиз”, дейдилар”. (Бақара:11)
“Ла илаҳа иллаллоҳ” калимасига чақирган барча пайғамбарлар тарихидан маълумки, уларни кофир ва мушриклар ҳамиша бузғунчилар, деб атаганлар ва ўзларини ислоҳ қилувчилар, деб даъво қилишган. Бугун ушбу муборак калимани тилга олишингизга монеълик йўқ бўлса-да, лекин унга амал қилишга чақирсангиз аввалдаги кофирлар дашномига йўлиқасиз! Шунга кўра, бу муборак калиманинг моҳиятини қисқагина ифода этишга заруратни ҳис қиламиз.
Биламизки, инсоният барча алоқаларида қонунга муҳтож. Шунингдек, инсонлар адолатли қонунга муҳтож бўлгани учун турли давлатлар қонунчилигидан ўз муаммосига ечим излайди. Лекин ўзи ҳавас қилган давлатдаги қонунларда ҳам нуқсонни кўргач, яна изланиш, солиштириш, текширишга киришади. Демак, инсон табиати адолатни излашга мойил қилиб яратилган. Инсонлар қанчалар уринмасинлар, қонун яратишга, адолатли қонун ишлаб чиқишга ожиздирлар. Улар ўзлари каби Ҳолиқ Таборака ва Таоло тарафидан яратилган бандалар учун қонун яратишга асло қодир бўлолмайдилар. Сабаби маълум. Инсониятни яратган Ҳолиқ инсонларга нима яхши-ю, нима ёмонлигини билгувчироқдир. Аллоҳ Таоло ўзи яратган оламни – борлиқ, коинотни инсон ақлини шошириб қўяр даражада тартибга солиб, бошқариб тургани каби ҳозирги замон муаммоларини ҳам инсонни хотиржам қила оладиган даражада ечиб беришдан ожиз қолмаган. Зеро, Аллоҳ Субҳанаҳу ва Таоло бундай нуқсонлардан покдир. Ва бандаларини ўз ҳолича ташлаб қўймаган. Аксинча, мукаммал қонун билан Пайғамбаримиз Муҳаммад ﷺни юборган. Аллоҳ нозил қилган Қуръоннинг тақозоси ўлароқ Сарвари коинот ﷺ шаръий аҳкомлар билан бошқариладиган Ислом Давлатини қурганлар. Мана шу мукаммал Шариат аҳкомлари ила ўн уч аср ер юзидаги инсониятнинг турли ирқ ва элатларини бир вужуд янглиғ муваффақиятли бошқарилгани асло афсона эмас, аксинча инкор қилиб бўлмас ҳақиқатдир.
Шундан келиб чиқиб, Росулуллоҳ ﷺ чақиргандек “ла илаҳа иллаллоҳу Муҳаммадур росулуллоҳ”га даъват қиламиз. Унинг маъно ва моҳиятини идрок қилишга чақирамиз. Ла ҳокимията илла ҳокимиятуллаҳ, дея идрок қилишларига, яъни инсоният устидан ҳукм юритишга бирор банда ҳақли бўлолмаслигини, балки ягона Аллоҳгина ҳақли эканлигига иқрор бўлмагунларича даъват этаверамиз. Бунга бизларни Аллоҳ Таолонинг Ўзи буюради.
ومن لم يحكم بما أنزل الله فؤلئك هم الكافرون
– “Кимда–ким Аллоҳ нозил қилган дин билан ҳукм қилмаса, бас, улар кофирлардир”. (Моида:44)
Шунга кўра, инсоният устида фақат Аллоҳ нозил қилган дин билан ҳукм юритилмоғи лозим. Ҳокимлик ёлғиз Аллоҳга хосдир. Бандалар эса, итоат қилмоқлари лозим. Шундай экан, инсон тарафидан тузилган барча қонунлар худолик даъвосидан ўзга нарса эмас.
Модомики, биз мусулмонлар тавҳид калимасини тўғри англаб Сарвари Коинот ﷺ каби “ла илаҳа иллаллоҳу Муҳаммадур росулуллоҳ”га чорлар эканмиз, у кишига ва саҳобаларига етган озорлар, бўҳтонлар ва маломатлар етмоғи Суннатдир. Сизу бизнинг зиммамизда айнан Росулуллоҳ ﷺ дан қолган мерос юки бор, саҳобалар қисмати бор. Айни дамда дунёга ҳукмронлик даъвосидаги етакчи куфр давлатлари ва уларга тобе малай ҳокимлар бизларга қарши бирлашиб, курашишмоқда. Ва Аллоҳга қайтмоққа чақирувчи гуруҳларнинг барчасини “террорчи гуруҳ”лар рўйхатига киритган бўлиб, ўзларининг ваҳшиёна оммавий қирғинларини терроризмга қарши амалиёт, деб баҳона қилишади. Аслида, айнан ўшалар қўлида Уммат гўдаклари, аёлу қизлари ва қариялари қирғин қилинмоқда. Ислом ўлкаларидан чиққан даъватчиларнинг барчасини малай ва адаштирувчи имомлар тили билан қоралаб, халқни адаштиришмоқчи бўлишмоқда. Барча ахборот воситаларидан фойдаланиб тинимсиз ёлғон ташвиқотлар юритишмоқда. Ўзбекистонда чорак асрдан буён даъват аҳли золим ҳокимлару сарой муллалари томонидан оммага “ватан хоини”, “террорчи”, “халқ душмани” дея танитилиб, зиндонларда ҳануз ушлаб турилган бўлса, бу золимлардан ўрнак олиб Қирғизистон ва Тожикистонда ҳам даъват аҳлига Макка мушрикларининг тошларини отишмоқда.
Эй мусулмонлар! Зиммангиздаги шарафли вазифани елкангизга олиш имкони бор, Росулуллоҳ ﷺга меросхўр бўлишдек танлов олдидасиз. Душман сизларга ўз малайлари ёрдамида ҳар қандай тазйиқлар қилмасин, бўҳтон ва туҳмат тошларини отиб, оламга ёмонотлиқ қилмасин, асло иккиланманг. Зеро, сиз аввалгиларнинг бугунгиларисиз. Сиз асло халқингиз душмани ҳам, юртингиз хоини ҳам эмассиз! Бошингизни баланд кўтаринг! Аллоҳнинг душманлари “жиноятчисан” деса, ўша хоинлар қаршисида азиз бошингизни асло эгманг! Аслида, ўшалар бу бечора оч, юпун халқларнинг душманларидир! Улар сизнинг иймонингиз ва саботингиз қаршисида ожиз ва шармандадирлар. Уларнинг хоин бошлари эртага албатта ҳақ олдида эгилажак! Улар кофир ҳўжайинларининг қўллови билангина тахтда ўтиришибди. Эртага башоратлар рўёбини кўрмоқни Роббимиз насиб қилса, бугунги сохта “адолатпеша”лар аҳволи хорликдир. Пайғамбарлик минҳожи асосидаги Халифалик Давлатининг ҳаётга қайтажаги муқаррардир, асло хомхаёл эмас! Зеро, бунинг ваъдасини бергувчи Аллоҳ Таолодир. Башорат қилгувчи эса, Росулуллоҳ ﷺдир.
ويومئذ يفرح المؤمنون بنصر الله ينصر من يشاء وهو العزيز الرحيم
– “Ўша кунда мўминлар Аллоҳ ғолиб қилгани сабабли шодланурлар. (Аллоҳ) Ўзи хоҳлаган кишини ғолиб қилур. У қудрат ва раҳм-шафқат эгасидир”. (Рум:4-5)
Ҳизб ут-Таҳрирнинг Ўзбекистондаги матбуот бўлими аъзоси Зайниддин
04.12.2021й
