Судан ва бутун дунё иқтисодий инқирозининг туб ечими

Судандаги, балки бутун дунёдаги иқтисодий инқирознинг туб ечими қуйидагиларга асосланади:

Биринчидан: Тўғри ақидага таянадиган ва адолатли ечимларни тақдим этадиган иқтисодий тизимни барпо этиш. Бу эса фақат ҳамма нарсадан хабардор ва ҳамма нарсани билувчи Зот томонидан бўлиши мумкин. Шунинг учун исломий иқтисодий низомни татбиқ этиш зарур. У ҳар бир раият вакилининг асосий эҳтиёжлари — озиқ-овқат, кийим-кечак ва уй-жойга бўлган эҳтиёжлари тўлиқ қондирилишини кафолатлайди.

Пайғамбар ﷺ шундай дедилар:

«مَنْ أَصْبَحَ مِنْكُمْ آمِناً فِي سِرْبِهِ، مُعَافًى فِي جَسَدِهِ، عِنْدَهُ قُوتُ يَوْمِهِ، فَكَأَنَّمَا حِيزَتْ لَهُ الدُّنْيَا»

«Сизлардан ким тонг оттирганда ўз яшаш жойида омонда, бадани соғлом ва ўша кунлик озуқасига эга бўлса, гўёки бутун дунё унга жамлаб берилгандек бўлади». 

Шунингдек, исломий иқтисодий низом инсонларга имконият даражасида қўшимча, асосий бўлмаган эҳтиёжларини ҳам қондириш имконини беради. Шариат ҳукмлари орқали мол-дунёни жамлаб қўйишнинг олдини олади, токи бойлик фақат бойлар ўртасида айланиб юрадиган нарса бўлиб қолмасин.

Аллоҳ таоло айтади:

﴿كَيْ لَا يَكُونَ دُولَةً بَيْنَ الْأَغْنِيَاءِ مِنْكُمْ﴾

«Токи у сизларнинг орангиздаги бойлар ўртасидагина айланиб юрадиган нарса бўлиб қолмасин». (Ҳашр сураси, 7-оят).

Бундан ташқари, Ислом монополияни, билвосита солиқларни ва ноқонуний йиғимларни тақиқлайди. Токи булар товарлар ва хизматлар нархининг ошишига сабаб бўлмасин. Пайғамбар ﷺ шундай дедилар:

«مَنْ دَخَلَ فِي شَيْءٍ مِنْ أَسْعَارِ الْمُسْلِمِينَ لِيُغَلِّيَهُ عَلَيْهِمْ كَانَ حَقّاً عَلَى اللَّهِ أَنْ يُقْعِدَهُ بِعُظْمٍ مِنَ النَّارِ يَوْمَ الْقِيَامَةِ»

«Ким мусулмонларнинг нархларига аралашиб, уларга нисбатан нархларни оширишга уринса, Қиёмат куни Аллоҳ уни оловнинг улкан суяги устига ўтқазиши ҳақли бўлади». 

Иккинчидан: Пул бирлигини олтинга боғлаш лозим. Чунки олтиннинг ўз ички қиймати бор. Бутун дунё билан импорт ва экспорт орқали олиб бориладиган савдо-сотиқ ҳам шу асосда амалга оширилиши керак. Олтин ишончли ва барқарор бўлишидан ташқари, Исломдаги кўплаб ҳукмлар ҳам унга асосланган. Масалан, дия — товон пули, ўғрининг қўлини кесиш учун белгиланган нисоб, нақд пул закоти ва бошқа ҳукмлар шулар жумласидандир.

Судан олтинга бой мамлакатдир. Бу эса унинг рибога асосланган қарзлар ёки бошқа турдаги қарзларга муҳтож бўлмаслигини таъминлайди.

Учинчидан: Халқаро валюта жамғармаси, Жаҳон банки ва бошқа фоизга асосланган молиявий жамғармалар билан алоқани бутунлай узиш, шунингдек, бойликни қандай эгаллаш, уни қандай кўпайтириш ва қандай сарфлашга тааллуқли Ислом ҳукмларини татбиқ этиш зарур.

Тўртинчидан: Давлат олтин, нефть ва тугамайдиган фойдали қазилмалар каби умумий мулкни сотиш, ҳадя қилиш ёки бошқа йўллар билан тасарруф этиши жоиз эмас. Давлатнинг вазифаси — бу бойликларни бутун Уммат манфаати учун бошқариш ва назорат қилишдан иборат. Чунки улар Умматнинг ҳаққидир ва Умматнинг аҳволини яхшилашга хизмат қиладиган ишларга сарфланиши лозим.

Роя газетасининг 2026 йил 28 октябр чоршанба кунги 623-сонидан