Ғутада жангчи гуруҳларнинг бир-бирларига қарши жанг қилиши қўзғолонга орқадан пичоқ уриш ва душманлар фитнасини амалга оширишдир
بِسْمِ اللهِ الرَّحْمٰنِ الرَّحِيم
Роя газетаси:
Ғутада жангчи гуруҳларнинг бир-бирларига қарши жанг қилиши қўзғолонга орқадан пичоқ уриш ва душманлар фитнасини амалга оширишдир
Яқин вақтдан бери тўқнашувлар жангчи гуруҳлар ўртасида бўляпти. Ғутадаги мухолафат билан Жайшул Ислом бир тарафда, Файлақур-Раҳмон билан Жайшул Фустот иккинчи тарафда… Иккала тараф ҳам бир-бирини айбламоқда. Бу ўзаро жанг оқибатида ушбу гуруҳлардан ва оддий фуқаролардан юзлаб инсон ҳалок бўлди. Бундан ташқари, шундоқ ҳам Шом тоғутидан қўрқиб яшаётган аҳолининг қўрқувига яна қўрқув қўшилди… Ҳозирда жангчи гуруҳларни бир-бири билан уруштириб қўйиш, Американинг қўзғолонни ҳолдан тойдириш ва йўқ қилиш режасининг муҳим қисмига киради. 2016 йил 22 май якшанба куни, Асад режимига ва мухолафатга қарашли манбалар хабарига кўра, режим кучлари Дамашқ яқинидаги Шарқий Ғутанинг ўнта шаҳарини, шу жумладан, стратегик шаҳар бўлган Дайр Асофирни эгаллаб, ўз назорати остига олган. Бу эса жангчи гуруҳларнинг бир-бирларига қарши жанг қилиш билан овора бўлишлари сабабли юз берди.
Дарҳақиқат, Шом қўзғолони ҳарбий тус олгандан бошлаб, Америка жангчи мусулмонларни бир-бири билан уруштириш ҳаракатини бошлади. Шарқий Ғутадаги ҳозирги ўзаро жанг энг хавфли бўлишига қарамай, биринчи марта содир бўлаётган нарса эмас. Балки илгари ҳам бир неча гуруҳлар турли баҳоналар, турли йўналишлар билан ўзаро жанг қилишган ва бунга бир неча омиллар сабаб бўлган. Бу омилларнинг асосийлари:
– Айрим жангчи гуруҳлар хориждан ҳарбий ва молиявий ёрдамлар олишга боғланиб қолган. Бу билан улар мустақил қарор қабул қилолмайдиган, хориж қарорларига боғланган гуруҳларга айланишади. Айрим гуруҳ қўмондонлари эса мумкин қадар кўпроқ хорижий ёрдамларни қўлга киритишга интилувчи ҳарбий амирларга айланиб қолдилар.
– Жангчи гуруҳлар озод армия ва исломчиларга бўлиниб қолишган ва бу оммавий ахборот воситаларида кенг тарқатилмоқда. Ҳолбуки, биз барчамиз мусулмон эканимизни, Ғарб бизга қарши ажратиб ўтирмай ёппасига уруш қилаётганини гўё унутгандаймиз.
– Айрим гуруҳлар ҳали қўзғолон самараси пишиб етмай туриб, уни узиб олишга ва айрим минтақаларга ҳукмрон бўлиб олишга уринишяпти. Бу билан ўзларини бошқа гуруҳларга бевосита қарши қилиб қўйишмоқда.
Шу ва бошқа омиллар гуруҳларнинг бир-бирларига қарши жанг қилишларига замин яратди. Нима учун жангга чиққанларини, яъни режимни барча башаралари билан қўшиб ағдариш учун чиққанларини гўё унутишгандай, гўё мусулмоннинг қонини тўкиш ҳаром, деган шаръий аҳкомни билишмайдигандай. Аллоҳ Таоло айтади:
وَمَن يَقْتُلْ مُؤْمِنًا مُّتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّـهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا
«Ким қасддан бир мўминни ўлдирса, унинг жазоси жаҳаннам бўлиб, ўша жойда абадий қолажак. У Аллоҳнинг ғазаби ва лаънатига дучор бўлган, (Аллоҳ унга) улкан азобни тайёрлаб қўйган» [Нисо 93]
Аллоҳ Азза ва Жалла яна бундай дейди:
وَأَطِيعُوا اللَّـهَ وَرَسُولَهُ وَلَا تَنَازَعُوا فَتَفْشَلُوا وَتَذْهَبَ رِيحُكُمْ ۖوَاصْبِرُوا ۚ إِنَّ اللَّـهَ مَعَ الصَّابِرِينَ
«Ва Аллоҳ ҳамда Унинг пайғамбарига итоат қилингиз ва (ўзаро) талашиб-тортишмангизки, у ҳолда сустлашиб, куч-қувватингиз кетур. Сабр-тоқат қилингиз! Албатта, Аллоҳ сабр қилгувчилар билан биргадир» [Анфол 46]
Аҳнаф ибн Қайс ривоят қилади: мен (фитна урушида) ушбу кишига (Али ибн Абу Толибга) ёрдам бергани боргандим, Абу Бакра учраб қолиб, қаёққа кетяпсиз, деб сўради. Шу киши (Али)га ёрдам бермоқчиман, деб жавоб бердим. Ортингизга қайтинг, чунки Росулуллоҳ САВ
«إذَا الْتَقَى الْمُسْلِمانِ بِسَيْفَيْهِمَا فَالْقَاتِلُ وَالْمَقْتُولُ فِي النَّارِ»
«Қачон икки мусулмон бир-бирига қилич кўтарса, қотил ҳам, ўлдирилган ҳам дўзахидир», деганларини эшитгандим. Ё Росулуллоҳ, қотилку дўзахи экан, ўлдирилган нега дўзахи, деб сўраганимда,
«إنَّهُ كَانَ حَرِيصًا عَلَى قَتْلِ صَاحِبِهِ»
«У ҳам ўз дўстини ўлдиришни қасд қилган», деганлар (имом Бухорий ривояти). Росулуллоҳ САВ яна бундай дейдилар:
«لاَ يَزَالُ الْمُؤْمِنُ فِي فُسْحَةٍ مِنْ دِينِهِ مَا لَمْ يُصِبْ دَمًا حَرَامًا»
«Мўмин мудом ҳаром қонни тўкмас экан, мудом динида кўпроқ солиҳ амалларни қилишда давом этади». (имом Бухорий ривояти). Видолашув ҳажида ҳам
«لاَ تَرْجِعُوا بَعْدِي كُفَّارًا يَضْرِبُ بَعْضُكُمْ رِقَابَ بَعْضٍ»
«Бас, мендан кейин бирбирингизни ўлдириб, куфрга қайтиб кетманг». (Имом Бухорий ривояти), дедилар. Бу ва бошқа нусуслардан кўриниб турибдики, демак, жангчи гуруҳлар ўртасидаги низо ва бир-бирларини ўлдириш уларнинг куч-қувватларини кетказади, бинобарин, ўша ердаги мавжуд минтақаларнинг Шом тоғути қўлига ўтказиб беради. Шарқий Ғутада худди шундай бўлди. Чунки жангчи гуруҳлар ўртасидаги ўзаро жанг фақат ўзларига зарар келтирибгина қолмай, балки муборак Шом қўзғолонига ҳам зарар келтирмоқда. Ахир қўзғолончилар қонхўр режимни ағдариб, ўрнига Аллоҳнинг ҳукмини ўрнатиш учун озмунча азиз нарсаларини фидо қилмадиларми! Бас, шундай бўлгач, жангчи гуруҳлар қўмондонлари аввало ўзлари учун Аллоҳдан қўрқсинлар, қолаверса, аҳллари учун, шаҳидлар қони учун, Шом аҳли қурбонликлари учун Аллоҳдан қўрқсинлар. Зотан, Шом аҳли қўзғолонга бир-бирларини ўлдириш учун чиқмаган. Шунингдек, жангчи гуруҳлар қўмондонлари муолажани асосидан ҳал этмоқлари керак, иккиламчи масалалар билан ўралашиб, бири иккинчисига маломат тоши отмасликлари лозим. Эртақачон хорижий давлатлар билан алоқаларини узишлари керак эди. Чунки бу давлатларни Шом аҳли қони заррача ташвишлантирмаслиги, уларнинг ғарблик хўжайинлари манфаатини ҳимоя қилишдан ўзга ташвишлари йўқлиги ҳаммага яққол маълум. Шунингдек, қўзғолон самараси ҳали пишиб етилмай туриб узиб олмасликлари лозим. Барчамиз «озодлик армиясию исломчилар» мусулмонлар сифатида бирга ҳаракат қилиб, Роббимиз Субҳанаҳу ва Таоло буюргандек, Шом тоғутини ўз инида ағдариб, унинг харобалари узра Аллоҳнинг бошқарувини барпо этмоғимиз даркор. Буни амалга оширишнинг бирдан-бир йўли, муборак Шом қўзғолонининг мустаҳкам асослари атрофида бирлашмоғимиздир, яъни режимни бутун башаралари билан қўшиб ағдариш учун бирлашмоғимиз даркор. Шунингдек, кофир давлатлардан озод бўлиб, уларнинг нуфузига чек қўйишимиз ҳамда Пайғамбарлик минҳожи асосидаги Халифаликни барпо этмоғимиз лозим. Гуруҳлар қўмондонлари шуни англаб етсинларки, кофир Ғарб уларни бир-бирларига қарши ёки Исломий Давлат ташкилотига қарши гижгижламоқда. Ғарбнинг мақсади, қўзғолондаги фаол кучларни ҳолдан тойдириб, шу орқали Шом аҳлида ўзгаришга нисбатан умидсизликни уйғотиш, кейин эса, Ғарб уларга нима буюрса ўшанга итоат қиладиган халққа айлантиришдир. Ана шунда Ғарб муборак Шом аҳлини бўғизлаб ташлаган ва берилган қурбонликларни зое кетказган бўлади. Шу боисдан Шом аҳли зиммасига жангчи гуруҳлар қўмондонлари содир этган қинғирликларни тўғрилаш масъулияти тушмоқда. Буни уларга қаттиқ қаршилик кўрсатиш ва қўзғолон кемасини тешишларига йўл қўймаслик орқали амалга оширадилар. Зотан, бундан ҳар биримиз манфаатдормиз, барчамиз ё нажот топамиз, ёки чўкиб ҳалок бўламиз! Росулуллоҳ CAB бундай дедилар:
«مَثَلُ الْقَائِمِ عَلَى حُدُودِ اللهِ وَالْوَاقِعِ فِيهَا كَمَثَلِ قَوْمٍ اسْتَهَمُوا عَلَى سَفِينَةٍ فَأَصَابَ بَعْضُهُمْ أَعْلاَهَا وَأَصَابَ أسْفَلَهَا فَكَانَ الَّذِينَ فِي أَسْفَلِهَا إِذَا اسْتَقُوا مِنَ الْمَاءِ فَمُرُّوا عَلَى مَنْ دُونَهُمْ آذُوهُمْ فَقَالُوا لَوْ أَنَّا خَرَقْنَا فِى نَصِيبِنَا خَرْقًا فَاسْتَقَيْنَا مِنْهَا وَلَمْ نُؤْذِ مَنْ فَوْقَنَا فَإِنْ تَرَكُوهُمْ وَمَا أَرَادُوا هَلَكُوا جَمِيعًا وَإِنْ أَخَذُوا عَلَى أَيْدِيهِمْ نَجُوا جَمِيعًا»
«Аллоҳнинг чегаралари олдида тўхтаган киши билан ундан ўтиб кетган кимса худди бир кемада шерик бўлган қавмга ўхшайдилар. Бу қавмнинг айримлари кеманинг юқорисидан, айримлари пастидан жой олдилар. Пастдагилар агар сув олмоқчи бўлсалар, тепадагилар олдидан ўтиб уларга озор берардилар. Шунда улар – агар пастдан бир тешик очиб олсак, ундан сув олаверардик ва тепамиздагиларга озор бермаган бўлардик, деб қолишди. Бас, уларни бу мақсадларида тек ташлаб қўйсалар, ҳаммалари ҳалок бўладилар. Агар уларни қўлидан ушлаб, тўхтатиб қолсалар ҳаммалари қутулиб қоладилар».
Ҳизб ут-Таҳрир-Сурия вилояти матбуот бўлими раиси Аҳмад Абдулваҳҳоб қаламига мансуб
Роя газетасининг 2016 йил 25 май чоршанба кунги 79-сонидан
