«Ўлсак ўламиз, бироқ хор бўлмаймиз» жанги сиз Шом гуруҳлари учун ибратдир
بِسْمِ اللَّـهِ الرَّحْمَـٰنِ الرَّحِيمِ
Роя газетаси:
«Ўлсак ўламиз, бироқ хор бўлмаймиз» жанги сиз Шом гуруҳлари учун ибратдир
Шоди Абуд қаламига мансуб
Қўзғолон бешиги Ҳиврондан ва Даръадаги Умарий масжидидан муборак Шом қўзғолонининг еттинчи йили арафасида «Ўлсак ўламиз, бироқ хор бўлмаймиз» жанги бошланди. Қонхўр режимнинг қуролсиз аҳолига қарши тўхтовсиз тажовузларига жавоб сифатида бошланган ва шу пайтгача қўзғолончилар бўғзидан чиқаётган «Ўлсак ўламиз, бироқ хор бўлмаймиз» садоси шиор қилиб олинган бу жанг, дилларга қайта жон киритди. Нафақат Ҳивронда, балки бутун минтақада, бутун муборак Шом заминида қалбларга қайта умид баҳш этди. Шунингдек, ушбу ички, регионал ва халқаро тил бириктирувларга, макрларга қарамай, бизда режимни ағдариш ва қўзғолон мақсадига етишишга умид бағишлаб, унга етишиш биздан холислик, ирода ва азм-қарордан ўзга нарсани талаб қилмаслигини кўрсатди. Бу жанг Ҳиврон аҳли, Шом аҳли, ер юзининг мағрибию машриқидаги барча мусулмонлар учун бир мужда бўлди. Аллоҳнинг нусрати ростгўй мўмин бандаларига жуда яқиндир, ботил ҳар қанча кучли бўлмасин, ҳар қанча йириклашиб, ҳар қанча кўтарилмасин, ҳар қанча қирғинбарот қуролларга эга бўлмасин, буларнинг бари имон келтирган, солиҳ амаллар қилаётган ва сабр-бардошда турган зотлар олдида ҳеч нарса эмас, деган мужда бўлди. Аллоҳ Таоло бундай деди:
كَم مِّن فِئَةٍ قَلِيلَةٍ غَلَبَتْ فِئَةً كَثِيرَةً بِإِذْنِ اللَّـهِ ۗ وَاللَّـهُ مَعَ الصَّابِرِينَ
«Қанчадан-қанча кичкина гуруҳлар Аллоҳнинг изни билан катта гуруҳлар устидан ғалаба қилган. Аллоҳ сабр қилгувчилар билан биргадир» [Бақара 249]
Ҳа, ана шу нусрат-ғалаба Аллоҳнинг фазлу карами ила, Ҳиврон мужоҳидлари ва қаҳрамонлари қўли билан ёзилмоқда. Зотан, Аллоҳ Азза ва Жалланинг чақириқларига лаббай, дея барча қайтариқларидан қайтиб, Аллоҳнинг арқонини маҳкам ушладилар, Аллоҳнинг «بُنيَانٌ مَرْصُوصٌ» туташ бинолари мисол саф тортиб, жангда ушбу номга ҳақиқатда, эга бўлдилар, Шом аҳли қўзғолонига қарши тил бириктирган жинояткор давлатлар билан алоқаларни уздилар, ўзларини Сурия халқининг дўстлари ва қўлловчилари, дея даъво қилган, аслида эса қўзғолонни бўғизлаш учун қора ниятда тузилган «МОС» жосуслик хизматларини ортга улоқтирдилар, барча ифлос заҳри қотил маблағлардан юз ўгирдилар, бутун дунёнинг кўз-ўнгида ҳар куни ўнлаб тўкилаётган шаҳидлар қонини қадрлаб, ҳурлар ноласига, туллар фиғонига жавоб бердилар, фақат «Роббимиз Аллоҳ», «Аллоҳдан ўзгага ҳаргиз тиз чўкмаймиз», «Сендан ўзга бизга ҳеч ким керакмас, Эй Роббим» каби сўзлар билан ҳайқирганлари учунгина бутун дунё кучларининг ҳужуми остида қолган заифҳоллар чақириғига қулоқ солдилар…
Қўзғолон бешиги Ҳиврондан шундай бир тўғри йўл ва соғлом йўналиш аломатлари намоён бўлмоқдаки, Шом қўзғолони гуруҳлари ҳам албатта шу йўлдан юрмоқлари ва Асад режимини ўз маркази Дамашқда ағдариб, харобалари узра Ислом бошқарувини барпо этиш учун шу йўналиш бўйича ўз аҳлларига, қўзғолон аҳлига нусрат-ёрдам бермоқлари лозимдир. Роббимиз Аллоҳга илтижо қилмоғимиз амри маҳол эмас, чунки, У мададкоримиздир, Аллоҳнинг мустаҳкам арқонини ушлаб, буйруқларини адо этишимиз ва қайтариқларидан четлашишимиз мушкул иш эмас, чунки, бу устувор вазифаларимиз ҳисобланиб, шу орқали нусратга эришамиз. Зотан, Аллоҳ Ўзининг гўзал амал қилувчи мўмин қулларига нусратни ваъда қилган. Аллоҳ Таоло бундай деди:
يَا أَيُّهَا الَّذِينَ آمَنُوا إِن تَنصُرُوا اللَّـهَ يَنصُرْكُمْ وَيُثَبِّتْ أَقْدَامَكُمْ* وَالَّذِينَ كَفَرُوا فَتَعْسًا لَّهُمْ وَأَضَلَّ أَعْمَالَهُمْ
«Эй мўминлар, агар сизлар Аллоҳга ёрдам берсангизлар, У ҳам сизларга нусрат-ёрдам берур ва жанг майдонида кадамларингизни собит-барқарор қилур. Кофир бўлган кимсалар учун эса ҳалокат бўлур ва (Аллоҳ) уларнинг амалларини зое кетказур» [Муҳаммад 7-8]
Дарҳақиқат, ушбу жанг халқ базасининг нақадар кучлилигини, жангнинг тўхтовсиз давом этишига унинг ижобий таъсир кўрсатишини исботлади. «Қўллаб-қувватловчи» давлатлар эса, баъзи гуруҳларнинг ва арзимас дунё матоси эвазига динини, номусини ва заминини сотганларнинг қилмишлари орқали айни халқ базасини ўзларининг қарор ва истаклари томон буриб олишга уринмоқда. Ҳатто Иордания режими ва «МОС» жосуслик хизматлари ўзларига қарашли гуруҳлар обрўси тушиб, шунча йилги меҳнатлар ҳавога учиб кетмаслиги учун уларни Ҳиврон аҳли олдида шоша-пиша жангга тиқишди ҳамда турли услуб ва ўйинлардан фойдаланиб, жангни тўхтатишга ҳаракат қилишди. Бу услуб ва ўйинлар эса, ўша гуруҳларини ўқ-дори ва қурол-яроқлар орқали жангга киритиш ҳамда жароҳатланганлар қаршисида чегараларни ёпиб олиш, ҳаво бўшлиқларини қонхўр Асад ва жинояткор Россия самолётларига очиб бериш ва бошқалардан иборат. Буларнинг барчасидан ушбу муборак жанг оловини ўчиришга, имкон борича давом этмаслигини олдини олишга умид қилмоқдалар. Бироқ унинг давом этиши Аллоҳнинг иродасига боғлиқдир, уларнинг умидларига эмас.
Эй Шомдаги гуруҳлар!
Бугун «Ўлсак ўламиз, бироқ хор бўлмаймиз» жанги халқ базасига эга. Халқ ўзининг энг қимматли нарсаларини шу жангга фидо этмоқда, покиза молини сарфламоқда, Аллоҳ ато этган бор кучи билан уни қўллаб-қувватламоқда… Бас, шу халқ қонхўр режим ва унинг армиясию ёлланган кучларига қарши олиб бораётган жангингизда сизни ҳам қўллаб-қувватлайди, у сиздан миннатдор халқ бўлади, сиз Аллоҳ Таоло олдида – Ўзининг изни ила – бу дунёю охират ютуғига ноил бўласиз.
Бас, шундай экан, хорлик ва шармандалик ғуборини эгнингиздан қоқинг, халқаро ҳамжамиятдан, унинг жинояткор ечимларидан умид қилишни бас қилинг, мусулмонлар ва уларнинг Шомдаги қўзғолонларига макр қилаётганлар билан бир столда ўтирмай, уни тўнтариб ташланг, Аллоҳ олдида ҳам, Уммат олдида ҳам тарихда қоладиган позицияни кўрсатинг, Аллоҳнинг арқонини маҳкам ушланг, чунки нажотингиз ҳам, ютуғингиз ҳам, дунё ва охиратдаги азизлигингиз ҳам шу арқонда. Чунки шараф ҳар доим ҳам эшигингизни қоқавермайди, Аллоҳдан ўзга суяниладиган ҳеч қандай зот йўқ… Мунофиқлар ва миш-миш тарқатувчилар гаплари сизларни Роббингизга осий қилиб, Унинг ризосидан буриб қўймасин, шайтон қалбларингизга васваса солиб, ботилнинг беҳисоб қуроллари, ботил аҳлининг кўплиги, бир-бири билан тил бириктиришларидан сизни қўрқитиб қўймасин. Чунки ўзининг дўстларидан қўрқитмоқчи бўлаётган мана шу Шайтоннинг ўзидир. Аллоҳ Таоло бундай дейди:
إِنَّمَا ذَٰلِكُمُ الشَّيْطَانُ يُخَوِّفُ أَوْلِيَاءَهُ فَلَا تَخَافُوهُمْ وَخَافُونِ إِن كُنتُم مُّؤْمِنِينَ
«Албатта ўша (сизларни васвасага солмоқчи бўлган) шайтоннинг ўзидир. У сизларни ўзининг дўстларидан (кофирлардан) қўрқитмоқчи бўлади. Бас, агар мўмин бўлсангизлар, улардан қўрқмангиз, Мендан қўрқингиз!» [Оли Имрон 175]
Агар ортингизга қайтиб, юз ўгириб кетсангиз, аҳлингизни ва унинг қўзғолонини ёрдамсиз қолдирсангиз, Аллоҳ ҳаққи, алмаштириш қонунига дучор бўласиз, сиз эса бу қилмишингиз учун Аллоҳ олдида ҳам, Уммат олдида ҳам жавоб берасиз, дунёнинг энг разил жарлигига, охиратнинг оловли жаҳаннамига юз тубан қулайсиз, Аллоҳ Уммат учун сиздан бошқа зотларни, унинг қўлидан тутиб, Робби ризосига ва тоатига етакловчиларни чиқариб қўяди. Аллоҳ бундай демоқда:
وَإِن تَتَوَلَّوْا يَسْتَبْدِلْ قَوْمًا غَيْرَكُمْ ثُمَّ لَا يَكُونُوا أَمْثَالَكُم
«Агар сизлар (Аллоҳга итоат этишдан) юз ўгириб кетсангизлар, У сизлардан бошқа бир қавмни алмаштириб қўюр, сўнгра улар сизларга ўхшаган бўлмаслар, (балки Аллоҳга тоатда бўлурлар)!» [Муҳаммад 38]
Аллоҳ Таоло яна бундай демоқда:
إِنَّ فِي ذَٰلِكَ لَذِكْرَىٰ لِمَن كَانَ لَهُ قَلْبٌ أَوْ أَلْقَى السَّمْعَ وَهُوَ شَهِيدٌ
«Албатта бунда (огоҳ) қалб эгаси бўлган ёки ўзи ҳозир бўлган ҳолда (яъни сидқидилдан) қулоқ тутган киши учун эслатма-ибратлар бордир» [Қоф 37]
Роя газетасининг 2017 йил 14 июн чоршанба кунги 134-сонидан
