Ғазода қирғин уруши давом этмоқда, гуманитар ёрдамлар ўлим тузоғига айланди
بِسْمِ اللهِ الرَّحْمٰنِ الرَّحِيمِ
Ғазода қирғин уруши давом этмоқда, гуманитар ёрдамлар ўлим тузоғига айланди
Устоз Холид Саид
Яҳудий раҳбарлари уруш бошланган биринчи кунларданоқ Ғазога нисбатан ҳақиқий ниятларини яширишмади. Уларнинг бу ниятлари нафақат баёнотларида, балки жиноий уруш машинасининг ишга солинишида ҳам очиқ намоён бўлди. Ғазони аҳолисидан бутунлай тозалаш ва унинг аҳлини кўчириш яҳудий босқинчи вужудининг асосий мақсади бўлиб қолмоқда. Улар бу шайтоний режаларини амалга оширишда Ғарбнинг, айниқса Американинг сиёсий ва моддий ёрдамига, шунингдек, бутун мусулмон ҳукмдорларининг, айниқса атрофдаги давлатлар раҳбарларининг тил бириктирувларига таянишмоқда. Бу ҳукмдорлар томонидан «кўчиришни рад этамиз» дея қилинган баёнотлар очиқдан-очиқ ёлғон бўлиб, оммавий ахборот воситалари учун ишлаб чиқилган ва жамоатчиликни чалғитиш мақсадида айтилган гаплардир. Аслида эса, уларнинг сиёсий ҳаракатлари ва Ғазода кечаётган фожиага муносабатлари кўчириш режасини амалга оширишда босқинчи вужуд билан ҳамкорлик қилишаётганини кўрсатмоқда. Яҳудий вужуди эса бу режасидан ҳали ҳам воз кечмаган ва уни бошқа режалари қаторидан чиқармаган. Қирғин уруши эса ҳали ҳам тугагани йўқ. Босқинчи вужуд бу мақсадини амалга ошириш учун ҳар қандай имкониятдан фойдаланишга тайёр. Улардан кўплаб сиёсий ва ҳарбий раҳбарлар Ғазо учун мўлжалланган Трампнинг жинояткор режасини асосий мақсад сифатида кўриб, ҳар бир чиқишларида шуни таъкидлаб келишмоқда.
20 ойдан ортиқ вақт давом этаётган бу ваҳший уруш мобайнида, жинояткор яҳудий вужудининг Ғазо аҳлига нисбатан сиёсати ва режалари бир зум ҳам ўзгармади. Улар фақат қирғин ва ўлдириш, қамал ва очликка маҳкум этиш, илм-маърифатдан узоқлаштириш ва ҳаётнинг ҳар қандай кўринишини йўқ қилишни кўзламоқда. Улар амалда ҳам, баёнотларида ҳам шундай демоқдалар: «Эй Ғазо аҳли, бу ерда сизлар учун ҳеч қандай жой йўқ. Ё ўлинглар, ё бу ердан кўчинглар!»
Босқинчи вужуд жинояткор табиатидан ва қирғин қилишга бўлган кучли истагидан келиб чиқиб, инсонпарварлик ёрдами масаласига ҳам ҳарбий нуқтаи назардан ёндашди. У ёрдамларни қирғин ва очликка маҳкум қилиш сиёсатига хизмат қилувчи қурол сифатида ишлатди. Унинг ёрдамларни Ғазога киритишга рози бўлиши эса фақат унга қилинган халқаро босимлар натижасида содир бўлди. Бу босим унинг аёллар, болалар ва қарияларга қарши қилинаётган жиноятларига нисбатан дунё жамоатчилигидаги кучли норозилик туфайли юзага келган эди. Аслида эса, у ёрдамларни киритишга розилик билдириш орқали давлатлар, ташкилотлар ва жамғармалар кўзини боғлашни, жамоатчилик ғазабини босишни ва дунёни алдашни мақсад қилган эди. Шу билан бирга, у ёрдам масаласини ўзининг ҳарбий режалари таркибидаги бир восита сифатида бошқариб келмоқда.
Ёлғон ва алдашни янада кучайтириш мақсадида, босқинчи вужуд ёрдам масаласидаги барча ҳаракатлари ва жинояткор сиёсатига «Ҳамас ёрдамни назорат қилолмайди» деган баҳонани ниқоб қилди. Шу баҳона билан у Ҳамаснинг ўзини тиклаши ва қувватини мустаҳкамлаши учун зарур маблағларни олишини тўсиш, Ғазода унинг ҳар қандай бошқарув ва назорат шаклини йўқ қилишни мақсад қилди. Шунингдек, у инсонпарвар ёрдам кўрсатувчи халқаро ва минтақавий ташкилотларга қарши курашди, уларни «терроризмни қўллаб-қувватлаш»да айблади. Бу ташкилотларнинг энг асосийси UNRWA – Фаластин қочқинларига ёрдам ва иш билан таъминлаш агентлиги бўлиб, уни ҳам нишонга олди. Чунки бундай ҳужумлар фақат ёрдамни тўсиш учун эмас, балки анча катта сиёсий мақсадни – Фаластин масаласини бутунлай ёпиш режасини амалга оширишни кўзлайди. Ҳеч кимга сир эмаски, UNRWAни йўқ қилиш шу режанинг ажралмас қисмидир.
Биз ҳар куни «ёрдам тарқатиш марказлари» деб аталадиган, БМТ эса «ўлим тузоқлари» деб атаган жойларда қандай бошқарув юзага келаётганини ва у ерда нима содир бўлаётганини кўриб турибмиз. Бу эса босқинчи вужуднинг ёрдам масаласини ҳали уруш бошланган илк кунларданоқ қандай бошқарган бўлса, ҳозир ҳам худди ўша йўл билан ва ўша мақсадларда фойдаланаётганини тасдиқлайди. Улар яна ўша бир шиорни амалга оширмоқдалар: «Ё очликдан ўлиш, ё бу ердан кўчиш».
Тафсилотларга назар солинса, босқинчи вужуднинг ифлослиги ва ваҳшийлиги янада аянчли намоён бўлади. Чунки у ёрдам масаласини ўзининг ёвуз мақсадлари йўлида фойдаланмоқда. Ёрдамлар баъзи қидирувдаги шахсларни кузатиш воситасига, муҳтожлик ва очликдан фойдаланиб иродаси заифларни хиёнат ботқоғига тушириш қуролига, ичкаридан жамият бирдамлигини парчалаш ва гиёҳвандликни тарқатиш воситасига айлантирилди. Ғазо ҳукумати матбуот хизмати баёнотига кўра, тўртта ҳолатда Америка ёрдам марказларидан етказилган ун қопларидан «Оксикодон» туридаги гиёҳванд таблеткалар топилгани гувоҳлар томонидан билдирилган. Шунингдек, босқинчи вужуд Ғазо секторида бошқарувни қўлга олиш учун янги тузилма ва органлар тузиш, қабила ва оилаларни қўллаш каби уринишлар билан ҳам шуғулланди. Ички низо ва фитналар чиқариш, ёрдамларни ўмарувчи тўдаларни тузиш ҳам унинг сиёсатидан. Бундай тўдаларнинг энг яққол намунаси – Рафаҳ шаҳри шарқида, яҳудий армияси назоратидаги ҳудудда йўл тўсувчи Ясер Абу Шабоб гуруҳидир. Шунингдек, аҳолини ёрдам марказлари атрофига йиғиш орқали Ғазонинг кўплаб ҳудудларини одамлардан бўшатиш уринишлари ҳам амалга оширилмоқда. Бу ҳозир марказий Нецарим йўналишида ва сектор жанубидаги Рафаҳдаги Америка ёрдам маркази атрофида яққол кўзга ташланмоқда.
Ҳар қандай ҳолатда ҳам, яҳудий вужуди ҳатто ёрдам тарқатиш марказларида ҳам одамларни ўлдиришдан тўхтамади. У садизм, бетартиблик, даҳшат ва қўрқувни тарқатмоқда. Ҳар куни ёрдам тарқатиш жараёни ва босқинчи қўшинларнинг одамлар билан қандай муомала қилаётганига оид даҳшатли кадрлар тарқалмоқда. Шунингдек, ҳар куни ёрдам кутиб турган оч одамлар орасида ўнлаб шаҳидлар ва яраланганлар ҳақида хабарлар келмоқда. Ғазо ҳукумати матбуот хизмати 2025 йил 27 июн, жума куни маълум қилишича, босқинчи вужуд ўлим тузоқлари ва оммавий ҳимоясиз қолдириш марказларини ташкил этганига бир ой тўлиши муносабати билан 549 киши шаҳид бўлган, 6664 киши яраланган ва 399 киши бедарак йўқолган. Бу эса улар ёрдам масаласига тўлиқ ҳарбий мантиқ билан, ёвуз ниятлар билан ёндашаётганини исботлайди. Ёрдамларни киритиш эса фақат халқаро босимлар натижаси бўлди. Чунки уларнинг асосий сиёсати одамларни кўчириш мақсадида ўлдириш ва очликка маҳкум қилишдир. Аммо ёрдам киритилишига мажбур қилингач, уларни ҳам ёвуз мақсадларида фойдаланишга уринмоқда.
Биз буни бир неча марта таъкидлаб келганмиз: Ғазо масаласи овқат, ичимлик ёки ёрдам масаласи эмас. Бу – босқинчилик масаласи бўлиб, босқинчилик барҳам топиши шарт; бу – босиб олинган исломий ер бўлиб, озод қилиниши лозим. Ғазо масаласини инсонпарварлик ёрдамлари нуқтаи назаридан кўтариш эса, аслида, Ғазо инқирозидан чиқиш баҳонасида ташқи аралашув ва бошқарувни қабул қилдириш учун қилинаётган қадамдир. Ҳақиқатда эса, Ғазо Умматнинг бир қисми сифатида кўрилиши керак. Чунки у, бошқа жойлардан фарқли равишда, ўз душманига бўйсуниш ва заифликни қабул қилмаган, аксинча, уни синдириб бўлмайдиган ҳолатда қаршилик кўрсатган; Ғазо қарши чиқди, ўз жаллодига қарши турди ва шунинг учун жазоланиши керак деб ҳисобланмоқда. Ғазо масаласи – Уммат масаласи бўлиб, унда ёниб турган ана шу кичик, аммо матонатли ва синмас нурли қисмни ўчиришни исташмоқда. Уларнинг мақсади – уни синдириб, парчалаш, токи у жазонинг намунасига ва бошқалар учун ибратга айлансин.
Ғазо масаласи – бу ожизлиги ва қўрқоқлиги уни оёққа тургизолмаётган Умматнинг масаласидир. Энди мусибатлар унга бирин-кетин ёғилмоқда, бошига тушаётган зарбаларни эса ҳеч қандай қаршиликсиз қабул қилмоқда. У эса шунчаки кузатиб турибди: нима учун бу ҳолатга тушганини кўриб турса-да, бирор ҳаракат қилмаяпти. Чунки йиллаб душманларига ва уларнинг хоин ҳукмдорларига бўйсуниб, сукут сақлаб келган эди.
Ечим ва қутулиш йўли ҳақида сўралганда, билинглар: Ғазо муаммоси ёрдам масаласи эмас. Бу муаммо – яҳудий вужудининг мавжудлиги ва уни ҳимоя қилиб, сақлаб турувчи мусулмон ерларидаги ҳукмдор режимлар мавжудлигидир. Шунинг учун бугун тўлиқ масъулият мусулмон Уммати ва унинг онгли, тирик кучлари зиммасида. Уммат ўз ҳукмронлигини тиклаб, кўкрагини босиб турган золим ҳукмдорлар ҳукмронлигидан қутулиши лозим. Чунки бу ҳукмдорлар Ғазо аҳлини ўлдириш ва қириб ташлашда яҳудийлар билан шерикдирлар. Улардан қутулиш эса йўлни фақат Ғазо учун эмас, балки бутун Фаластин учун очади. Ғазо эса сизлар учун собитқадамлик, матонат ва фидокорликда илҳом манбаи, қутулиш йўлида йўл ёритувчи машъала бўлсин. Шубҳасиз билингларки, ҳукмдорлар ҳукмронлигидан қутулиш йўлида йўқотадиган ҳар қандай нарсангиз ҳозиргача йўқотганларингиздан анча енгилдир. Улар тахтларида қолса, уларга бўйсуниб яшашда яна қанча йўқотишингизни тасаввур ҳам қилолмайсизлар.
Роя газетасининг 2025 йил 9 июл, чоршанба кунги 555-сонидан
