Болаларни чет элга Исломий таълим олишга жўнатиш энди жиноят ҳисобланади

بسم الله الرحمن الرحيم

Ўзбекистон президенти 15 март куни Маъмурий жавобгарлик тўғрисидаги ва Жиноят кодексига болани хорижда назоратсиз қолдирганлик учун санкциялар ва жазо чораларини белгиловчи ўзгартишлар киритиш тўғрисидаги қонунни имзолади. Жумладан, Маъмурий жавобгарлик тўғрисидаги кодексга киритилган қўшимчага кўра, Ўзбекистон фуқаролигига эга болани ота, она ёки уларнинг ўрнини босувчи шахс ёхуд ҳамроҳлик қилувчи шахс томонидан чет давлат ҳудудида назоратсиз қолдириш БҲМнинг 10 бараваридан 50 бараваригача (3 млн сўмдан 15 млн сўмгача) миқдорда жарима солишга сабаб бўлади. Шунингдек, Жиноят кодексига киритилган қўшимчага кўра, болани чет давлатда назоратсиз қолдириш, худди шундай хатти-ҳаракат учун маъмурий жазо қўлланилганидан кейин содир этилса ёхуд боланинг суд томонидан белгиланган муддатда Ўзбекистонга қайтарилишини таъминламаслик 3 йилгача озодликдан маҳрум қилиш билан жазоланиши мумкин.

Ўша қилмиш оғирлаштирувчи ҳолатларда содир этилса, уни содир этган шахс 8 йилгача озодликдан маҳрум қилиш билан жазоланиши мумкин.

Қонунчиликда бу ўзгариш Исломдан таълим олаётган ёшларни нишонга олганини яққол кўрсатиб турибди. Чунки ҳукумат наздида мадраса ва илм даргоҳларидагина болалар ота-онасининг назоратидан чиқади. Мазкур жазо қонунига кўра, Исломдан таълим берадиган мактабларда ўқиётгани аниқланган болаларни 30 кун ичида Ўзбекистонга юбормаган ота-оналар «оғирлаштирувчи ҳолатни» пайдо қилган ҳисобланиб, 8 йилгача озодликдан маҳрум қилиш жазосига тортилишади. Айни пайтда эса, Ўзбекистон ҳукумати Ғарбда ота-онасининг буткул назоратидан чиққан ҳолда ажнабий сақофати ва ҳазорати билан тарбияланаётган ёшларни ёш авлодга ибрат қилиб кўрсатяпти. Демак, қонун айнан Исломий таълим олиш учун четга чиқаётган мусулмон фарзандларини нишонга олган. Бўлмаса таълим олиш учун Ғарб давлатларига бориш билан Исломий таълим олиш учун четга чиқишни ўртасида қандай фарқ бор?! Бу ҳам етмаганидек, бузуқ демократик дунёқараш билан шаклланган бу ёшларнинг тушунча ва қарашлари мактаб дарсликларига киритиляпти. Уларни гўё даҳо кишилардек турли мавзулардаги тренинглар орқали ёшлар онгига капиталистик тушунчаларни сингдиришига шароит яратиб бериляпти. Бу сиёсат ҳукуматнинг Исломий мафкурага қарши курашаётганини ва билим номи остида куфр мафкурасини кенг ёяётганини кўрсатади.

Шавкат Мирзиёев 20-21 феврал кунлари расмий ташриф билан Миср Араб Республикасига борган эди. Мазкур ташрифдан сўнг Мисрда таҳсил олаётган толиби илмларга нисбатан рейдлар бошланди. Бундан ташқари, Абдулфаттоҳ Ас-Сиси ҳукуматининг янги чоралари натижасида, ўзбекистонлик ёшлар учун Мисрда таҳсил олиш кескин қийинлашди. Шавкат Мирзиёев ҳукумати Ўзбекистон ичкарисида ёшларни Исломдан таълим олишига тўсқинлик қилиш баробарида, хориждаги ўзбекистонликларни ватанга қайтаришга ёки улар устидан қаттиқ назорат ўрнатишга ҳаракат қилиб келяпти. Шу мақсадда хориждаги илм даргоҳлари билан алоқаларни кенгайтиришга ҳаракат қилди. Бу иш ҳам кутилган натижани бермагач, расмий имомларни хорижда мадраса очишига имкон бериб, ҳукуматга хайрихоҳ илмлиларни фаолиятини кенгайтиришини қўллаб-қувватлади. Бироқ бу марказлар Исломни ибодат ва ахлоқдан иборат дин деб талқин қилаётгани, улар устида давлатнинг назорат-чангали борлигини кўрсатиб тураётган эди. Шу сабаб ёшлар Исломни руҳий ва сиёсий ақида сифатида баён қилиб, уни қандай бўлса шундайлигича тасаввурларда гавдалантирадиган ва қалбларга Шариат қонунларига бўлган муҳаббатни соладиган норасмий илм даргоҳларига ошиқишди. Ўзбекистонликларнинг кўпчилиги яшаш учун энг арзон, илм олиш учун кенг имкониятларга эга Мисрни танлаётгани сабаб Ўзбекистон ҳукумати бу давлат билан тиғиз алоқаларни ўрнатди. У ерда яшаш рухсатномасини олиш Ўзбекистоннинг Мисрдаги элчихонасининг тўлиқ назорати остига киритилиши ўзбекистонликларни ноқонуний яшашга мажбур қилиб қўйди. Шавкат Мирзиёевнинг Мисрга ташрифи чоғида президент Абдулфаттоҳ ас-Сисининг Ал-Азҳар университетида ўзбекистонликлар ўқиётганидан шод эканлигини айтгани, ноқонуний яшаётган ўзбекистонлик талабаларга босим қўлланишидан дарак эди. Чунки Азҳаргина ўқишга кирмоқчи бўлганлардан ҳужжат талаб қилади ва ўқиётганлар учун қонуний ҳужжат беради. Шавкат Мирзиёевнинг Мисрга ташрифидан кўзланган асосий мақсад ёшларни Ўзбекистонга қайтариш эканлиги ойдинлашди. Толиби илмларга қарши душманона сиёсат қўллаш билан Мирзиёев Исломга қарши курашаётганини Ғарб ва Россияга намойиш қилмоқда. Бундан кўзланган мақсадни, президент муддатини ноллаштирувчи референдумни муваффақиятли ўтказиш дейиш ҳам тўғри бўлар, бироқ аввалги иқтидор билан қиёсланса Мирзиёев маккорона сиёсат олиб бораётгани маълум бўлади. Хулоса ўрнида шуни таъкидлаш керакки, Ислом таълимига қарши қабул қилинган бу жазо қонуни ва Ўзбекистонга қайтарилаётган минглаб талабаларнинг қандай машаққатларга рўбарў қилиниб, сабабсиз жабр кўраётганини бирор блогер ёки журналист ёритмаяпти. Шу сабабдан ҳам ҳукумат Исломга қарши курашида ҳеч қандай тўсиққа учрамаяпти. Ваҳоланки, Исломий таълим мавзуси тақдирий масалалардандир. Бу масалага ҳам мусулмонларнинг «оч қорним тинч қулоғим» деб лоқайд қарашлари таянчимиз ва келажагимиз бўлган ёш авлодни анави Исломга қарши ғарази бор ҳукумат бемалол бузиб, Исломга бегона, ҳатто ундан нафратланадиган авлод қилиб етиштиришига олиб боради. Биз халқимизни динимизга қарши юритилаётган давлат сиёсатига қарши норозилик билдиришга чақирамиз. Чунки халқнинг турли кўринишдаги норозиликлари гумроҳлаштиришга уринилаётган халқимизни фикрлашига туртки бўлади ва дини учун зулмланаётганларнинг аҳволи яхшиланишига ҳамда ҳукуматни мусулмонлар билан ҳисоблашишига олиб келади. Халқимиз катта фожиалар сари кетаётганини тезроқ англаб етиши лозим. Бундай ҳалокатли ҳаётга йўлиқмаслик учун Исломни ўрганиш ва унга қатъий амал қилишдан ўзга нажот йўли йўқ!

Ҳизб ут-Таҳрирнинг Ўзбекистондаги матбуот бўлими аъзоси Абдураҳмон

31.03.2023й