Болаларни “ҳимоя қилиш” стратегияси оила институтига қарши ғарбча ҳужумдир

بِسْمِ اللهِ الرَّحْمٰنِ الرَّحِيمِ

17 декабр куни Ижтимоий ҳимоя миллий агентлиги Ўзбекистонда 2026-2030 йилларга мўлжалланган болаларни зўравонликдан ҳимоя қилиш стратегияси тасдиқланганини эълон қилди. Ушбу ҳужжат INSPIRE ва Pathfinding каби халқаро стандартлар асосида ишлаб чиқилган бўлиб, унда профессионал тутинган оилалар институтини ривожлантириш ва ўқув-тарбия муассасаларини ёпиш кўзда тутилган.

“Бугунги кун мен ва жамоам учун алоҳида аҳамиятга эга. Президентимиз томонидан “2026-2030 йилларда болаларни зўравонликнинг барча шаклларидан ҳимоя қилиш стратегияси тўғрисида”ги фармон имзоланди. Ушбу ҳужжат устида жамоамиз билан катта ва масъулиятли иш амалга оширилди. Болаларни ишончли тарзда ҳимоя қиладиган самарали тизимни шакллантириш мақсадида жаҳон тажрибаси ва энг илғор амалиётлар чуқур ўрганилди”, – дейди Ижтимоий ҳимоя миллий агентлиги директорининг биринчи ўринбосари Шаҳноза Мирзиёева.

“Мен учун энг аҳамиятли ўзгаришлардан бири, шубҳасиз, қонунчиликка киритилаётган ўзгаришлардир. Тергов ва суд жараёнлари жабр кўрган бола учун қўрқув ёки оғриқ манбаига айланмаслиги керак. Бу кенг кўламли ислоҳотларнинг фақат бир қисми. Ушбу муҳим ва масъулиятли вазифани амалга оширишда ҳисса қўшган Ижтимоий ҳимоя миллий агентлиги жамоасига ҳамда барча ҳамкорларимизга миннатдорлик билдираман”, – дейди Мирзиёева. (qalampir.uz)

Бироқ воқеликка теран назар ташланса, ёшларни заҳарлаш ва оила институтини емиришда Ғарбдан кўр-кўрона кўчиралаётган, аслида эса, ўзимизнинг исломий қадриятларимизга мутлақо зид бўлган мана шундай стратегиялар орқали  ҳукуматнинг ўзи бош-қош бўлаётгани яққол кўринади. Чунки, ушбу стратегия ниқоби остида кириб келаётган “Ювенал юстиция” тизимини Ғарбнинг ўз мутафаккирлари ва ҳуқуқшунослари (Child Protective Services — CPS) аллақачон “оилаларни парчаловчи машина” деб аташган. Нью-Йорк университети ҳуқуқ профессори Мартин Гуггенхайм таъкидлаганидек, болани оиласидан ажратиш унинг руҳиятида шундай чуқур жароҳат қолдирадики, буни ҳеч қандай “ижтимоий терапия” тўлдира олмайди. Болалар ҳуқуқларини ислоҳ қилиш миллий коалицияси ижрочи директори Ричард Векслер эса буни “Давлат томонидан амалга ошириладиган бола ўғрилиги” деб баҳолаган. Унинг фикрича, тизим кўпинча камбағалликни “беэътиборлик” билан адаштириб, оилаларга ёрдам бериш ўрнига болани тортиб олишни афзал кўради.

Стратегияда илгари сурилаётган “тутинган оилалар” (Foster Care) тизими Ғарбда энг кўп зўравонлик содир этиладиган соҳалардан бирига айланган. Гарвард университети тадқиқотлари шуни кўрсатадики, бундай оилаларга берилган болалар ўз биологик оилаларида қолганларга қараганда кўпроқ жисмоний ва жинсий зўравонликка дучор бўлишади. Аслида, бу тизим болаларни битта хавфдан қутқариш даъвоси билан йўлга қўйилиб, янада каттароқ тизимли хавфга ташлашдир. Аҳоли тадқиқотлари институти президенти Стивен Мошер бундай ёндашувларни “маданий империализм” деб атайди. Унинг фикрича, мақсад – анъанавий ва диний қадриятларни “инсон ҳуқуқлари” ниқоби остида йўқ қилиш ва оилани кучсизлантириш орқали жамиятни осон бошқариладиган бўлакларга бўлиб ташлашдир.

Ғарбдаги аҳвол шуни кўрсатадики, бу тизим болани шахс сифатида оиладан мустақил қилиш ва уни давлат “мулки”га айлантиришни кўзлайди. Машҳур психиатр ва мутафаккир Томас Сас огоҳлантирганидек, давлат тайинлаган психологлар кўпинча болаларни ота-оналарига қарши қайрайдиган ва уларга ёт ғояларни сингдирадиган “сиёсий агентлар” ролини ўйнайди.

Эндиликда эса мана шу бузуқ ва чириган тизим Ўзбекистонда давлат сиёсати даражасига кўтарилиб, ижроси бевосита президент оиласи вакиллари томонидан назорат қилинмоқда.

Мусулмон халқимиз ҳокимият томонидан олиб борилаётган бу каби “ислоҳотлар”га асло бефарқ бўлмаслиги ва уларни қатъий инкор қилиши зарур. Зеро, Ғарбнинг бузуқ дунёқарашига асосланган тузум ва қонунларда ҳамда исломий қонун-қоидалар четга сурилган жамиятда ҳеч қачон ижобий ўзгаришлар рўй бермайди. Аксинча, инсон томонидан ўйлаб топилган бундай “стратегиялар” фақатгина фаҳш, ахлоқсизлик ва оилавий инқирозни бошлаб келади. Бундан ташқари, бундай ҳаракатлар Аллоҳ таолонинг ғазабини келтириши муқаррар. Қуръони Каримда Аллоҳ таоло шундай огоҳлантиради:

إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ ۚ وَاللَّهُ يَعْلَمُ وَأَنتُمْ لَا تَعْلَمُونَ

– “Албатта, иймон келтирганлар ичида фаҳш тарқалишини яхши кўрадиганлар учун бу дунёда ҳам, охиратда ҳам аламли азоб бордир. Аллоҳ билади, сизлар билмассизлар”.                 (Нур:19)

Давлат томонидан тиқиштирилаётган бу “ҳимоя” ниқоби остидаги бузғунчиликка қарши ягона чора – Исломнинг мукаммал ижтиоий-оилавий низомига қайтишдир. Ислом фарзандлар ҳақида улар ҳали туғилмасданоқ ғамхўрлик қилади ва уларни то балоғатга етгунларича ишончли ҳимоя билан таъминлайди. Исломий бошқарув, яъни Халифаликда давлатнинг вазифаси оилаларни парчалаш эмас, балки уларни Аллоҳнинг шариати асосида мустаҳкамлаш ва фарзандларни тақво руҳида тарбиялаш учун шароит яратишдир.

Бинобарин, биз учун энг олий намуна ва дастур Пайғамбаримиз ﷺнинг суннатларидир. У зот: “Намозни мен қандай ўқиётганимни кўрган бўлсангиз, шундай ўқинглар”, – дея марҳамат қилиб, нафақат ибодатда, балки ҳаётнинг ҳар бир жабҳасида, жумладан, фарзанд тарбиясида ҳам фақат ўзларидан ўрнак олишга буюрганлар. Ғарбнинг чириган дунёқарашига таяниб, халқни маънавий ҳалокатга етаклаётган ҳукуматнинг “ислоҳотлари” ҳеч қачон хайрли бўлмайди.

Салоҳиддин

27.12.2025й