8 март байрами мусулмонларга ҳаромдир!

بسم الله الرحمن الرحيم

Бу йилги 8 март байрами Рамазон ойига тўғри келди. Аллоҳ қўйган чегаралар оёқости қилинадиган бу ажнабий байрамнинг Рамазон ойига тўғри келиши мусулмонларнинг яна бир имтиҳон фитнаси билан юзлашишини англатади. Номаҳрам эркакдан табрик кутган хотин-қизлар, номаҳрам аёлни қутламоқчи бўлган эркаклар бундай ношаръий қилмишлари Рамазон ойида янада улканроқ гуноҳ эканлигини билишлари зарур. Албатта, ҳар бир иймон эгаси аллақачон бундай фасод байрамни нишонлашдан ҳазар қилиб, бошқаларни ҳам шундан огоҳ этиб келади. Шубҳасиз, гуноҳларнинг касри-касофати кишининг ақли, жисми, ризқи, наслига ва бошқа жиҳатларига уради. Бўлиб ҳам бу байрам икки жинс ўртасидаги ношаръий алоқаларга туртки бўлгани учун унинг зарари бутун жамиятга таъсир қилади. Аслида, инсонларни фасод-бузуқчиликлардан икки нарса тўсиши мумкин. Биринчиси кучли иймон, иккинчиси Одил Султондир. Ҳозирда кофирларнинг бузуқ дунёқараши ва жирканч урф-одатларидан бизни ҳимоя қиладиган Халифамиз йўқлиги сабабли инсонларнинг ақли ва иймонига хитоб қилмоқдамиз. Токи, мусулмонлар ҳақни таниш орқали уларда Исломий фикрлар ва туйғулар шакллансин. Ҳамда жамиятимизни емираётган бундай фасод ишлар Ислом тузуми татбиқи билангина тўхтатилишига ишонч ҳосил бўлсин.

8 мартни байрам қилиб нишонлаш бузуқ капиталистик тузумнинг татбиқи натижасида юзага келган. 1857 йилда Нью-Йоркдаги тўқимачилик фабрикасида ишловчи юзлаб аёллар ўз ҳақларини талаб қилиши ортидан 129 нафар аёл-қизларнинг номаълум сабабларга кўра иш жойида чиққан ёнғинда куйиб ўлади. Шундан сўнг, Америка ва Европада ўтказилган бир қанча намойишлар, конференциялар ва форумлар ортидан 1911 йилда 8 мартни Халқаро хотин-қизлар куни сифатида эълон қилинади. Аслида, аёлларни намойишларга ундаган нарса уларнинг эркаклардек бўла олмасликларини тушунтириш учун бўлган эди. Бошқача айтганда, биз аёллар заифамиз, бизни давлат ҳимоя қилиб ҳақ-ҳуқуқларимизни таъминласин, биз эркаклардек оғир меҳнат қила олмаганимиз сабабли иш вақтларимиз қасддан узайтирилмасин, тенг ҳуқуқлилик йўлга қўйилсин, деган талаблар эди. Ғарб давлатлари ҳукуматлари аёлларни эъзозлагани ва уларга қайғургани учун эмас, балки уларни қаноатлантириш учун бу кунни байрам сифатида белгилаган. Чунки Ғарб давлатларининг асл эгалари бўлган сармоядорлар ўзлари ўйлаб топган меҳнат келишувлари аёлларнинг бардоши кўтара олмайдиган даражада ваҳшиёна эди. Оқибатда юзага келган норозиликларни қисман қондириш орқали аёл-қизлар меҳнатидан максимал фойдаланиш мақсадида янги тартиблар жорий қилинди. Янги тартибот иш шароитлари ва ойлик маошларининг бирмунча яхшиланишига олиб келган бўлса-да, аёллардаги меҳнатдан зўриқиш ўрнини руҳий босим, нафсоний ва жинсий тазйиқлар эгаллади. Оқибатда Ғарб аёли асосий эҳтиёжлари бўлган бошпана, озиқ-овқат, кийим-кечак ва дори-дармонга доимий эга бўлиши учун кексайгунча меҳнат қилишга маҳкум қилинди. Бугина эмас, ғарблик хотин-қизлар яратилиш табиатига кўра тўлақонли аёл сифатида оналик, фарзандлар тарбияси ва оила бахтидан мосуво қилинди. Улар чиройи ва гўзаллиги эътибори билан ишлатиладиган матоҳга айланиб қолди. Улар одамлардан эътибор ва меҳрни йилда бир кун – 8 мартда кўрадиган бўлди.

Мирзиёев ҳукумати ҳам айнан мана шу капиталистик тузумни Ўзбекистонга кўчириш ҳаракатига тушган. Аёл-қизларни уйлардан олиб чиқиб касб-ҳунарга ўқитиш ва уларни ишчи-хизматчиларга айлантириш учун дастурлар ишлаб чиқилган. Мирзиёев бу йил 8 март муносабати билан асосан оила ва хотин-қизлар бўлими раҳбар аёлларини орден ва медаллар билан тақдирлагани ҳам ҳукумат бу соҳага жиддий эътибор қаратаётганини кўрсатади. Тақдирланганлар орасида рус тили фани ўқитувчилари, маҳалла фуқаролар йиғини раиси, ҳунарманд, тадбиркор ва ҳарбий аёллар борлиги Ўзбекистон сиёсатидаги устувор соҳалар қайсилар эканлигини изоҳлайди. Ҳукумат аёллар муаммоларини минг йиллик самарага эга Исломий муносабат ва аҳкомлар асосида ҳал қилинишига қарши чиқиб, Ғарбнинг гендер тенглиги лойиҳасини жорий қиляпти. Ўтган йили тазйиқ ва зўравонликка учраган 54 минг нафардан ортиқ хотин-қизга ҳимоя ордери берилган. Оилалар муаммосини атрофлича ўрганмай, бир ёқлама ёндашиб, аёлни давлат ҳимоясига олиниши оилаларда беқарорликни келтириб чиқаради. Ва динимиз белгилаган эр-хотинлик меъёрларини тубдан емирилишига олиб келади. Бу эса муслима аёлни гўзаллигидан фойдаланиладиган бир матога – лаззат бахш этувчи воситага айлантириб қўяди. Сўнг аёл кишини оналик бахтидан ҳамда фарзанд тарбиясидек шарафли ва масъулиятли ишдан маҳрум қилишга олиб келади.

Тарихан, 8 мартни байрам сифатида юртимизга олиб кирилиши, ор-номусимиз саналган аёлларимиз шаъни топталган, булғанган кун ҳисобланади. Шунинг учун бу кунни байрам сифатида нишонлаётганлар Аллоҳнинг қонунлари оёқости қилинишига рози бўлаётганларини билиб қўйсинлар!

Аллоҳ таоло Ислом орқали аёлларни шарафлади, жаннатни уларнинг оёқлари остида қилиб, унга гўзал муомала қилиб яшашни, унинг ҳақларини тўла адо этишни Ўзининг розилигини топишнинг шарти қилиб белгилади. Шунингдек, Аллоҳ таоло Ўзи яратган аёлнинг табиатини яхши билгани учун унга бошқарув вазифасини юкламади, балки унинг табиатига хос ишларни амр этди. Ўз ишида кечикмайдиган Роббимиз Исломгина аёлга меҳр ва эътибор кўрсатишини ҳамда уни бахтли-саодатли қилиши хабарини берган.

Ҳавои нафсидан гапирмайдиган Пайғамбар алайҳиссалом мусулмонлар учун фақат икки кунни – Рамазон ва Қурбон ҳайити байрам эканлигини айтганлар. Бу ҳадис замирида чуқур ҳикмат ва маъно бор. Зеро, ҳаётнинг мувозанати ҳам, инсонларнинг бахт-саодати ҳам Илоҳий тузум татбиқи билангина амалга ошади.

 فَإِمَّا يَأْتِيَنَّكُم مِّنِّي هُدًى فَمَنِ اتَّبَعَ هُدَايَ فَلَا يَضِلُّ وَلَا يَشْقَىٰ ‎وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَىٰ

– “Бас, сизларга Мен тарафдан ҳидоят келганида ким Менинг ҳидоятимга эргашса, йўлдан озмас ва бахтсиз бўлмас. Ким Менинг эслатмамдан юз ўгирса, бас, албатта, унинг учун танг-бахтсиз ҳаёт бўлур ва Биз уни қиёмат кунида кўр ҳолда тирилтирурмиз”.              (Тоҳа:123-124)

Ҳизб ут-Таҳрир Ўзбекистон матбуот бўлими аъзоси Абдураҳмон

08.03.2025й