Пахта даласидаги завқ

Аввало бутун Оламлар Роббиси улуғ марҳамат эгаси Аллоҳ Субҳанаҳу ва Таалога ҳамд ва санолар унинг росули ва элчиси Росулуллоҳ саллаллоҳу алайҳи ва салламга у кишининг оила аъзоларига салот ва саломлар бўлсин.

Ассалому алайкум қадрли диндош биродарларим. Бугун яна Фейсбук тармоқларида Андижон ва андижонликлар группасидаги бир мақола эътиборимни тортди. Шоҳида Султонова исмли бир аёл у ерда шундай ёзади:

"Бугун кўп ишлаганимга қарамай чарчоқ чиқариш учун гуруҳимиз билан пахта даласига бордим. Аёллар завқу шавқ билан пахта теришарди. Улардаги завқ мени ҳам пахта даласига тортди. Мен ҳам пахтакорларни янада завқлантириш, уларни кўнгилларини янада кўтариш учун ўз шеърларимдан ўқиб бермоқчи бўлдим. Аёллар бизни кўришлари билан телевизорда чиқадиган аёл деб биз тарафга шошиб келишди. Улар билан хазиллашиб кулишиб этак тақдик, шеър айтиш ҳам эсдан чиқиб қолиб, биз ҳам пахта теришга киришиб кетдик. Гуруҳдагилар билан ким кўпроқ пахта теришга мусобақа қилдик. 35 дақиқада мен роппа роса етти кг, хотин қизлар раиси қўмитаси Гулнора опа 13 дақиқада 3,5 кг пахта терибмиз. Хисоб китобимиз бўйича беш соатда бир киши 100-120 кг пахта териши мумкин экан."

Шохида Султоновага шундай изоҳ қолдирдим: Сиз бу мақолангизни нима мақсадда ёзганингиз биз учун номаълум аммо пахта теришингиздан кўра кўпроқ пахта қўйганингиз кўриниб турибди. Опажон ҳар йилги пахта йиғинидаги мағзаваси чиқиб кетган пахта даласида пахтакорлар завқу-шавқ билан пахта термоқда каби бундай сўзлар одамни пахта теришдан хам кўра кўпроқ чарчатди. Сизни бир кунда қанча пахта теришлик мумкинлиги қизиқтирган бўлса, мени эса бу иссиқ хавода кечгача беллари узилиб терган пахтаси учун қанча хақ оларкин деган нарса эътиборимни тортди.

Сиз ўзингиз айтган завқу-шавқ билан бир кунгина далага чиқиб 100-120 кг пахта тергандирсиз, агар 35 дақиқадан ортиқ тера олган бўлсангиз. Чунки бир кунда бунча тердим деб ёзмаганингизга қараганда 35 дақиқагина терган бўлишингиз ҳам мумкин. Лекин ҳар куни бир ҳил иссиқда узоқ йўл юриб келиб 100-130 кг пахтани завқ билан теришлик осон иш эмас. Хўп, сизнинг ҳисобингизни эътибога олдик хам дейлик. Лекин унга берилаётган хақни эътиборичи. Телевиденияга чиққан одамни кўриб завқланиб кетишларгаку гап йўқ.

Бу бечора уммат ўз хақ хуқуқини оз-мозгина таниганида эди, қайси оқ қайси қора ажрата олганида эди, олтинлар орасида сарғайиб арзимаган чақа учун эзилиб ишламасди. "Ҳозир бошқача одамлар овқатларини ўз уйларидан олиб келишаркан, дехқон эса фақат чой дамлаб бераркан" деб ёзибсиз. Хўш нима учун? Билсангиз еган овқатини ҳам нарҳи бор, агар уйидан олиб келса унинг пули ҳам ёнига қолади. Қаранг қандай завқ а бу!

Нозиккина елкалари кило-кило юк кўтариб қаварган, тавонлари тупроқда ёрилиб кетган, фарзандини юзларини силайдиган дағал қўллари аёлнинг қўли каби мулойимлигини йўқотган, бир килограм пахта учун неча юз маротаба эгилган беллари оғриқдан ухлатмаган бу аёллар далага завқ олиш учун чиқишлари кулгили эмасми?

Янада ачинарлироғи шуки, бу аёлларнинг умри-ку шу тупроқлар орасида ўтди, унинг фарзандларичи, уларнинг ҳам келажаги шу дала шу пахтазорми? Унинг фарзандларини ҳам бу машаққатлар ўз домига тортадими энди?

Йўқ нима учун ундай дейсиз, балки бу болалар келажакда буюк ишлар қилар деган олди қочди гапларни айтишингиз мумкин. Лекин даладан бери келмайдиган, йилнинг ярмидан кўпини далада ўтказадиган, мактабларда фақат форма кийишнигина ўрганган болани келажаги қандай қилиб буюк бўлиши мумкин? Улар ҳам оналари каби телевизорда кўрган бир шоирани далада кўрганига хурсанд бўлиб яшаб ўтишмайдими?

Гапларим оғир ботган бўлса узр сўрайман, лекин сиздан илтимос шунча алла айтиб ухлатган ғанимлар етмагандак сиз ҳам чиройлик сўзларингиз билан умматни ухлатманг. Бу уммат бугун ухлаб алданаётган бўлиши мумкин, лекин уммат уйғонганида ва сизни сохта мақтовларингизни эслаб юзингизга туфлаганида, янада оғирроғи бу уммат хақида сўралганингизда нима деб жавоб берасиз?

Бу уммат Бухорий авлоди, улар "завқ" учун яралмаган. Улар Хақни таниши, танитиши, яхшиликка буюриши, ёмонликдан қайтариши керак бўлган умматдир. Бу уммат ўз бойликларини, хақ-хуқуқини мустамлакачи кофир қўлидан тортиб олиши зарур бўлган умматдир. Бу уммат болалари техналогия, лаборатория, астраномияни оламга таълим берган мусулмонларнинг авлодларидир.

Эй шоира опам, сиз шеърларингизда маддоҳликни бас қилингда, уммат дардини, унинг қанчалар хорланганини ёзинг. Ахир ўз кўзингиз билан кўриб, ич ичингизда эзилиб келганингиз сир эмаску. Дилингиз ва тилингиз бир ҳил бўлсагина сизнинг шеърларингиз юрак юракларга етиб боради. Шундагина сиз Навоий издоши бўлган шоира бўла оласиз. Бугун  сиз мадҳ этганларингиз, эртага сизга маломатчи бўладиган, ёқангиздан ушлайдиган кун келмасдан аввал кўзингизни очинг.

Хурмат билан Умму Муҳаммад

24.09.2019й,