Ҳаёт иймон ва ботил кураши соясида

بِسْمِ اللهِ الرَّحْمٰنِ الرَّحِيم

Анча йиллар бўлдики, ҳаётда ботилнинг ўрни сезиларли даражада ортди. Ҳатто Ислом келишидан аввалги ҳолатга ўхшаб қолмоқда. Бу фикр учун айблашга шошилманг. Тўғри, атрофимизда мусулмонлар кўп, лекин уларнинг аксари билан сухбатлашсангиз “Аллоҳ қалбда бўлиши керак, тилда эмас”, деб авратлари очиқ юрганини кўрасиз. Ёки дин ҳаётга аралашмайди, деган куфрий ақидага мувофиқ бўлган “Дин давлатга аралашмаслиги керак”, деган фикрни кўтариб юриб, ҳатто тарғиб қилаётганлар бор. Хуллас ботил фикрлар, тушунчалар мусулмонлар онгига кириб келди ва уларнинг ҳаётларини захарлашда давом этмоқда.

Ислом келиб бутун дунёга бўй чўзган ва диёрларни фатҳ қилган вақтларда ботил худди шер келгач думини қисиб панага беркинган тулки мисоли бўлиб қолди. Лекин ана шу шер ўзининг шерлигини унута бошлади. Натижада дунё етакчилиги нафақат қўлдан кетди, балки дунё етакчиси бўлганлиги хотирасидан ўчирилди. Худди ўғилга сени отанг жиноятчи, босмачи, деди ҳамда отага фарзандинг ватан хоини, халқ душмани, дея таништирди. Бу ботилнинг иши эди. Чунки мусулмонларнинг бирлашиши, иймон йўлида ҳаракат қилиши фақатгина ботил эгаларига ёқмайди. 

Ҳаётга эътибор бериб назар солсангиз, кейинги вақтларда фикрлар тўқнашуви ва бу тўқнашувнинг ҳаётга таъсири кучайиб кетди. Аввало, мусулмонлар ҳаётини бузишга, тубанлаштиришга қаратилган ботил фикрлар ҳаракати жадаллашди. Албатта, бу фикрларни ўргансак, иймон ва куфр фикрларига ажратишимиз мумкин, холос. Мусулмонлар онгига, ҳаётига таъсир кўрсатишга интилаётган иймон ва куфр фикрларини кўтариб чиқувчиларнинг ҳолати қўполроқ бўлса-да бозордаги ҳолатни эслатади. Чунки ҳар хил фикрларни таклиф қилаётганлар кўп, шу ўринда ботил фикрлари сифати яхши бўлмаса ҳам рекламаси зўр бўлгани учун яхши сотилаётган товарга ўхшайди. Лекин бу товарнинг одамлар учун зарарли эканлигини сотувчи яширади, олаётган истеъмолчи фикрламайди. Ботил фикрлар ҳам уни қабул қилаётганлар томонидан фикрламай қабул қилинмоқда. Афсуски, бу ҳолат нафақат ўзларининг, балки бутун жамият ҳаётининг бузилиши, тубанлашишига сабаб бўлмоқда. Шунинг учун мусулмонларга бугунги кунда бефарқ бўлиш ярашмайди.

Росулуллоҳ ﷺ айтган эдилар: «Аллоҳнинг қонунларига риоя қиладиган инсон билан уларга амал қилмайдиган киши кемада ҳамроҳ бўлган бир гуруҳ одамларга ўхшайдилар, баъзилари кеманинг юқори қисмидан, баъзилари эса қуйи қисмидан жой олдилар. Кеманинг қуйидан жой олганлар сув ичмоқчи бўлсалар, юқоридагиларни босиб ўтар эдилар. Шунда улар юқоридагиларни безовта қилмай, шу ердан тешиб ола қолсакчи, деб қолдилар… Кемадаги ҳамроҳлар уларни ўз ҳолига қўйсалар, барча ҳалок бўлади. Агар уларни қўлидан тутиб тўхтатиб қўя олсалар, ўзлари ҳам, кемадаги ҳамроҳларнинг барчаси ҳам нажот топади».

Бу курашда албатта иймон томонда бўлганлар ғолиб бўладилар, уларнинг кўпчилик ёки камчилик бўлишларининг фарқи йўқ. Чунки иймон эгаларининг ғолиблигини Буюк Аллоҳ айтди:

وَمَن يَتَوَلَّ اللّهَ وَرَسُولَهُ وَالَّذِينَ آمَنُواْ فَإِنَّ حِزْبَ اللّهِ هُمُ الْغَالِبُونَ

 – “Ким Аллоҳни, Унинг Пайғамбарини ва иймон келтирганларни валий қилиб олса, бас, албатта, Аллоҳнинг ҳизби – ана ўшалар ғолиблардир”.  (Моида:56)

Ҳизб ут-Таҳрирнинг Ўзбекистондаги медиа офиси. Абдуллоҳ

19.06.2020й