Янги қаҳрамонлар чиқадиган давр
Янги қаҳрамонлар чиқадиган давр
بِسْمِ اللهِ الرَّحْمٰنِ الرَّحِيم
Бугун Ислом олами қийин даврни бошидан кечирмоқда, шундай қийин даврки, хоҳлаган кимса Ислом муқаддасотларига тажовуз қилиши мумкин ва у бунинг учун жазоланмайди, аксинча ҳурмат-эҳтиром қозонади. Бу шундай қийин даврки, Исломнинг энг кичик кўринишларига ҳам “терроризм” белгиси сифатида қаралади, ҳаққа даъват қилувчилар таъқиб остига олинади. Мусулмоннинг моли ва жони эса, чақадан ҳам арзонроқ нарсага айланиб улгурди.
Айнан шундай шароитларда кучли шахсиятлар пишиб етилади. Қийин даврлар ҳар доим кучли одамларни шакллантириб келган. Биз бугун фахр билан тилга оладиган одамларнинг аксари ўз даврининг қийинчилик ва мураккабликлари билан ўсган одамлардир. Улар биз каби онадан туғилган, сўнг ўз даврининг шарт-шароитларида ўсиб-улғайганлар. Бироқ улар мавжуд воқеликни яхши тушуниши ва уни тўғрилашга ҳаракат қилишлари билан ажралиб турганлар. Ислом тарихи бундай қаҳрамон шахсиятларга тўла бўлса-да, улардан баъзиларини келтириб ўтамиз.
Усмон ибн Аффон: Қуръонни бир ракаатда тўлиқ ўқий олган;
Али ибн Абу Толиб: якка ўзи Хайбар дарвозасини бузиб кирган. Отини оёқлари билан бошқарган ҳолда икки қўлида қилич ушлаб жанг қила олган;
Холид ибн Валид: кофирлар сафига ҳужум қилиб, қўмондонини ўғирлаган ва эсон-омон мусулмонлар сафига қайтган. Юзлаб жанглар ўтказиб бирортасида мағлубиятга учрамаган;
Хамза ибн Абдулмутталиб: у Абу Жаҳл Росулуллоҳ ﷺни ҳақорат қилганини эшитгач унинг олдига бориб юзига бир урди ва унга шундай деди: “Сен уни ҳақорат қиласанми? Мана мен унинг динидаман, мен у нима деса шуни дейман. Қани қўлингдан келса унга айтган гапингни менга айтчи!”
Умар ибн Хаттоб: мусулмонлар яширинча Мадинага ҳижрат қилдилар, биргина Умар очиқдан-очиқ ҳижрат қилди. У елкасига қиличини илиб, камон ва ўқларини қўлига олди-да, Каъбага юзланган ҳолда ўрнидан турди. Каъба девори ёнида кофир қурайшийлар ўтирарди. У Каъбани етти марта айланиб тавоф қилди, икки ракаат намоз ўқиди. Сўнг у жиддий қиёфа билан мушрикларга қарата шундай деди: “Тошлар ва бир парча дарахт бўлагига сиғинадиганлар ақлсиз ва аҳмоқ одамлардир. Кимнинг отаси ўғилсиз, хотини бева қолишини хоҳласа, марҳамат, мени таъқиб қилсин”. Бу гапдан кейин ҳеч ким қимирламади;
Зубайр ибн Аввом: бир ўзи кофирлар қалъасига ҳужум қилиб, мусулмонлар ғалабаси учун қалъа эшикларини очган;
Жафар ибн Абу Толиб: Мута ғазотида икки қўли кесилганига қарамай байроқни тишлари билан тишлаб кўтарган;
Халифа Умар ибн Абдулазиз: у икки йилдан оз вақт ичида мамлакатда одамлар турмуш даражасини кўтаришга эришди, ҳатто закот оладиган одам қолмади.
Шундай экан, ҳозирги давр шундай бир даврки, ундан янги қаҳрамонларнинг чиқишини кутиш мумкин. Уларнинг исмлари ҳам худди қаҳрамон аждодлари сингари мусулмонлар тилида янграйди ва қалбидан жой олади, амаллари Аллоҳга кўтарилади. Бундай имконият ҳар биримизда бор. Аллоҳдан ҳозирги авлод мусулмонлари ичидан бутун инсониятга ҳақ ва адолат нурини етказадиган қаҳрамонлар етиштириб чиқаришини сўраймиз! Аллоҳдан бу уммат ичидан яна Абу Бакр ва Умарларни, Али ва Усмонларни, Холиду Салоҳиддинларни, Фотиҳ ва Умар ибн Абдулазизларни, Бухорий ва Муслимларни… чиқаришини сўраймиз! Бу Аллоҳга ҳеч ҳам қийин эмас.
Мухлис
17.11.2020й
