Қозоғистон воқеалари тўғрисида мулоҳаза

بِسْمِ اللهِ الرَّحْمٰنِ الرَّحِيم

Қозоғистонда январь ойининг бошида бўлиб ўтган халқ норозилик намойишлари тўғрисида чуқурроқ мулоҳаза қилиб кўрилса – баъзилар яширишга ва бузиб талқин қилишга ҳаракат қилаётганига қарамай – бир неча фактларни юзага чиқарди. Биринчидан, Ислом Уммати доимий қайнаш ҳолатида бўлишини. Биз бу қайнашларнинг акс садоларини Исломий юртларнинг гоҳ унисида, гоҳ бунисида кўрмоқдамиз. Бу шунга далолат қиладики, мусулмон халқлар уйғонмоқда ва ўзларига тиқиштирилаётган ғайриисломий тузумларга рози бўлмай, озод бўлиш ва нажот топиш сари қадамларини тезлатмоқдалар.

Иккинчидан, халқаро системанинг Ислом Умматини ўз кучлари ёки Сурия, Ливия, Миср ва бошқа юртларда бўлганидек золим ҳукмдорлар орқали қўрқитишга бўлган уринишлари зое кетмоқда. Чунки ушбу юртларда халқ ҳаракатлари, норозиликлар ва ўзгаришларга бўлган интилишлари ҳали ҳам тўхтагани йўқ. 

Учинчидан, уммат ўз воқелигини умумий равишда бўлса ҳам яхшироқ англашни ва буни ташқи кучларга боғлиқлигини тушуна бошлади. Ва бундай идрок умматни аввал у, кейин бошқа юртда халқ ҳакаратларини давом эттиришга ундаб, охир-оқибат ўз мақсадига етиши билан тугайди. Чунки ҳар қандай қаттиққўл, золим, диктаторлик бошқарувига асосланган давлат ҳам норозилик намойишлари туфайли заифлашиб боради, халқнинг ишончидан чиқиб боради. Бу эса, аста-секинлик билан бўлса ҳам мусулмонларни ўз мақсади сари яқинлаштиради. 

Тўртинчидан, мусулмонлар устида турган ҳукмдорлар умматга хиёнат қилмоқдалар, АҚШ, Россия, Британия, Франция каби мустамлакачилар билан тил бириктириб, умматнинг ҳаққи бўлган бойликларини талон-тарож қилишларига йўл қўйиб беряптилар. Жамиятда коррупциянинг кенг ёйилишига, монополия, рибо, бойликни хазина қилиб йиғишга, фоҳишабозлик, ўғрилик, қиморбозлик, спиртли ичимликлар ва наркотиклар савдосига ҳамда бошқа саноғи йўқ мункар ишларнинг кенг тарқалишига ҳам йўқ қўймоқдалар. Улар одамларнинг глобал муаммолари тугул, ҳатто энг оддий ҳаётий муаммоларига ҳам ечим беришга қодир эмаслар.

Қозоғистонга КХШТ доирасида ҳарбий контингент юборган Россияга келсак, Путин ва унга яқин бўлганларнинг Россия Империясини тиклаш борасидаги орзулари чилпарчин бўляпти. Масалан, Марказий Осиё масалалари бўйича Кремлга яқин эксперт Юрий Крупнов Қозоғистондаги тартибсизликларни шарҳлар экан, шундай деди: “Мана энди бугун айтиш мумкинки, Совет Иттифоқининг куни битди”. Бу ҳақда Aмериканинг “Daily Beast” газетаси ўзининг Москвадаги мухбири Aнна Немцованинг репортажида маълум қилди, у ўз мақоласига “Энди Путиннинг даҳшатли туши унинг хоҳишига қарамай ҳақиқатга айланди” дея ном танлаган. Шундай қилиб, Россия Ўрта Осиё мусулмонлари устида тарихда ўтказган ва ҳозирда ўтказиб келаётган қатағонлар, депортация, тазйиқ ва таъқиблар, хорлашлар, Исломий эътиқодларга қарши курашлари орқали бу юртдаги халқлар онгидан Исломни ўчира олмади. Қозоғистондаги норозилик намойишлари эса, Россиянинг хафсаласини пир қилди.

Исломга бўлган муҳаббат, содиқлик ва фахр ҳамда тарихий душманимиз бўлмиш Россияга нисбатан нафрат биз – Ўрта Осиё мусулмонларига она сути билан кирган. Ин ша Аллоҳ мусулмон халқлардаги қайнаш то ўз душманлари ҳукмронлигидан озод бўлиб, мақсадига етмагунича давом этади. Бу қайнаш Аллоҳнинг қонунлари ҳаётимизда татбиқ этилиб, сафларимиз бирлашмагунича давом этади.

Ҳизб ут-Таҳрирнинг Ўзбекистондаги матбуот бўлими аъзоси Фаррух.

24.01.2022й