Озарбайжон режимининг ҳижобга қарши уруши унинг қулашига яқинлаштирадиган учқун бўлади!

Озарбайжон Вазирлар Маҳкамаси ўтган сентябрь ойининг 21-санасида қабул қилган 309-сонли қарорга асосланиб, мактаб формасининг бир хиллигига путур етказадиган ёки умумий таълимнинг дунёвийлик тамойилига зид бўлган қўшимча кийимларни кийишни тақиқлади.

Исломий юртларнинг яқин тарихини ўрганар эканмиз, таълим муассасалари Умматнинг ўзлиги билан давлат аппаратининг амалиёти ўртасидаги курашнинг энг кескин майдонларидан бири бўлганини кўрамиз. Илм-маърифат, тарбия ва келажакни бунёд этиш маскани бўлиши керак бўлган мактаблар, афсуски, узоқ йиллар давомида ғарбона андозадаги дунёвийликни мажбуран жорий этиш, ижтимоий муҳандислик лойиҳалари орқали жамиятни ўзгартиришга қаратилган интилишлар ва исломий рамзларни йўқ қилишга уринишлар майдонига айланди. Бу мажбурлашнинг энг яққол, энг аламли ва энг рамзий кўриниши эса, шубҳасиз, ҳижобли ўқувчи қизлар ва муаллималарнинг мактаб эшикларидан қайтарилиши, уларнинг таълим олиш ва дарс бериш ҳуқуқларидан зўрлик билан маҳрум этилишида намоён бўлди.

Бу жараён давомида мактаблар дарвозаларида юз берган манзаралар инсоният тарихидаги энг унутилмас фожиалар қаторида ўрин олди. Тонг саҳарда дарсликларини кўтариб, синфларига кириш истагида мактабга йўл олган ёш қизлар мактаб эшиклари олдида полиция тўсиқлари ва таҳқирловчи текширув нуқталарига дуч келдилар. Улар ё ҳижобларини ечиб, эътиқодлари ва иффатларидан воз кечишга, ёки таълим олиш ҳаёти билан хайрлашишга мажбур этилдилар. Худди шундай босим бутун умрини таълим бериш ва шогирдларига йўл кўрсатишга бағишлаган муаллималарга ҳам ўтказилди. Дарҳақиқат, ишдан бўшатилган, сургун қилинган, истеъфога чиқишга мажбурланган ёки интизомий текширувлар туфайли ҳаёти қоронғуликка чўмган минглаб муаллималар ўз эътиқодлари билан касблари ўртасида шафқатсиз танлов қилишга мажбур бўлдилар.

Ислом Уммати ўзининг яқин тарихи давомида бошидан кечирган истибдод ва зулм муҳитига жимгина бўйсуниш билан жавоб бермади. Аксинча, бу ҳолат жамиятда улкан қаршилик ва адолат талаб қилиш ҳаракатининг учқунини ёқди. Чунки Уммат фарзандлари мактаблар олдида бошлаган намойишлар, норозиликлар, ҳуқуқий курашлар ва оммавий йиғилишлар ушбу тақиқ шунчаки бошдан ечилган бир парча мато ҳақида эмаслигини, балки бевосита Умматнинг мавжудлиги ва ақидасига дахлдор эканини исботлади.

Дарҳақиқат, оилавий туйғулар таъсирида фарзандлари ёнида турган оилалар, эътиқодли зиёлилар ва қалби жўшқин омма бу зулмга қарши доимо ўз овозларини кўтариб келдилар. Бу жараён қайси нуқтага келиб етган бўлмасин, ҳақ ва ботил ўртасидаги кураш муқаррар равишда яққол намоён бўлди. Зеро, йиллар давомида сақланиб келган бу қаттиққўл ва душманона тақиқлар жамият қалбининг туб-тубидаги исломий ўзликни суғуриб ташлай олмади ва ҳижобни унуттира ҳам олмади.

Ислом Уммати аёлларининг иффатини ифодаловчи ҳижобга қарши тажовузлар тарихий занжирининг сўнгги ҳалқаси Озарбайжонда намоён бўлди. Озарбайжон режимининг ҳижобга, яъни Исломга душманлиги янги нарса эмас. Бу режим Совет Иттифоқи ва Америка каби Исломга душман мустамлакачи Ғарб давлатларининг сиёсати доирасида Ислом ва унинг ташқи кўринишларига қарши урушни узоқ йиллар давомида ўз сиёсатининг бир қисмига айлантириб келди.

Ислом ва мусулмонларга душманлик қилишда ҳамда кофирларни ўзларига дўст ва ҳомий тутишда ҳад билмайдиган Алиев режими 2010–2011-йилларда ҳам ҳижобни бутунлай тақиқлашга уринган эди. Бироқ ўша пайтда мамлакат бўйлаб бу қарорга қарши кўтарилган ғазабли муносабат ва оммавий норозиликлар туфайли масала вақтинча жамоатчилик эътиборидан четлатилди.

Аммо бу дунёвий режим ё Исломий Уммат ҳануз тирик эканини, ўтмишда ҳижоб масаласида бошидан кечирган оғир синовлар катта ибрат бўлиб, унинг хотирасидан ўчмаганини англамаяпти, ёки бу ҳақиқатни атайлаб эътиборсиз қолдирмоқда. Шу сабабли у ҳижобни тақиқлаш масаласини яна кун тартибига олиб чиқди ва бу ҳақда қарор қабул қилди.

Бироқ ушбу қарордан кейин Озарбайжондаги кўплаб муаллималар ва ўқувчи қизлар ўзларига хос йўл билан қўйилган тўсиқларни бузиш мақсадида қуйидаги шиорни илгари сурдилар:

«Агар мактаблар биз учун ёпилса, майдонлар бизники!»

Фикрий ва сиёсий майдонда ҳам қарорга қарши чиққан фаоллар ва мухолифлар ижтимоий платформалар орқали дунёвийликнинг қатъий йўналишларига кескин ҳужум қилдилар. Улар Озарбайжонда ҳижобни чеклаш кампанияси дунёвий миллатчиликни амалга оширишда чуқур нуқсон борлигини фош этаётганини таъкидладилар.

Ғазаб фақат газеталар ва ижтимоий тармоқлар доирасида қолиб кетмади. 3 октябрь куни Истанбулдаги Озарбайжон консулхонаси олдида норозилик намойиши ўтказилди. Қатнашчилар турк ва озарбайжон тилларидаги плакатларни кўтардилар. Улар орасида қуйидаги шиорлар алоҳида ажралиб турди:

– «Озарбайжонда ҳижоб тақиқланишига йўқ деймиз!»

– «28 февраль воқеалари Озарбайжонда такрорланишига йўл қўйманг!»

– «Ҳижоб — мусулмон аёлининг ўзлигидир!»

– «Бу хатодан қайтинг!»

Ислом Умматининг бундай муносабатидан довдираб қолган Алиев режими барча тоғут ҳукмдорларига хос бўлган қўрқитиш ва таҳдид усулларига мурожаат қилди. Ҳатто Бош прокуратура Озарбайжондан дунёвийликни қабул қилишда фарқ қилмайдиган Туркиядан Алиев режимини танқид қилувчи постларни тарқатаётган шахсларга нисбатан тергов бошлаш мақсадида халқаро ҳуқуқий ёрдам сўраганини эълон қилди.

Аммо золим Озарбайжон режими ва унинг бошида турган қўғирчоқ ҳукмдорлар шуни яхши билиб қўйсинларки, дунёвийлик тарафдорлари ва Ислом душманлари қанчалик зулм қилсалар ва фиръавнлардек кеккайсалар, шунчалик қулатилиб, тахтларининг пойдеворига ўт қўйилади.

Аллоҳнинг изни билан, сизлар ҳам ҳижобига тажовуз қилиб, кўзларини ёшга тўлдирган ҳолда ташлаб кетган ўша кичик қизалоқнинг кўз ёшларига ғарқ бўласизлар. Ўз кўзларингиз билан кўрган бошқа дунёвий режимлар каби сизлар ҳам чуқур жарликка қулайсизлар. Буни иккинчи Рошид Халифалик давлати амалга оширади. Унинг тонги отиши учун энди фақат вақт қолди, холос.

Ана шунда зафар зулм ва тажовуз қаршисида ўз иймони ва иффатини сақлаб қолган, Роббисига бўлган вафосини дунёвий манфаатлардан устун қўйган азиз авлод насибасига айланади.

Аллоҳ таоло айтади:

﴿وَيَقُولُونَ مَتَى هُوَ قُلْ عَسَى أَنْ يَكُونَ قَرِيبًا﴾

«Улар: “У қачон бўлади?” дейдилар. Сен: “Шоядки, у яқин бўлса”, деб айт». (Исро сураси, 51-оят). 

Рамазон Тусун

Роя газетасининг 2026 йил 21 октябр чоршанба кунги 622-сонидан