Ҳафталик муҳим воқеалар таҳлили
Ҳафталик муҳим воқеалар таҳлили
بسم الله الرحمن الرحيم
Биз ушбу ҳафталик муҳим воқеалар таҳлили номли туркумимизни бошлар эканмиз, Аллоҳдан уни ҳайрли қилишини сўраймиз. Ушбу туркум орқали юртимизда ҳафта давомида содир бўлган баъзи муҳим воқеа-ҳодисаларнинг қисқача таҳлили билан танишиб боришингиз мумкин.
Хабар (кун.уз 22.02.2023й): Наманган вилоят суди раиси лавозимига тайинланган Алишер Усмонов адвокатлар билан учрашувда судьялар ҳамон тергов органи измида экани, суд амалда жазоловчи функциясини бажараётганини эътироф этди. Суд раисининг айтишича, 2022 йилда Наманганда жиноят ишлари бўйича судларга қамоққа олиш эҳтиёт чорасини қўллашни сўраб 2029 та илтимоснома киритилган. Шундан 2024 та ёки 99,75 фоиз (!) илтимоснома қаноатлантирилган. Бошқа вилоятларда ҳам аҳвол тахминан шундай, нари борса бир фоиз ортиқ ёки кам бўлиши мумкин. Республика бўйича эса 97,8 фоиз ҳолларда судлар қамоқ эҳтиёт чорасини тайинлаган.
Изоҳ: Судлар хавфсизлик органлари назорати остида эканлиги ва улар устидан ҳукмронлик қилиши янгилик эмас. Фақат бу расмийлар томонидан ҳозирга келиб қисман тан олиняпти. Чунки хабарда келтирилган статистика судларнинг мустақил эмаслигини тўлиқ ифодаламайди, балки унинг жуда оз қисмини акс эттиради холос. Ваҳоланки, ўзбек режими суд тизимини ўзининг адолатсиз ва шафқатсиз сиёсатига халқни бўйсундириш воситаларидан бири қилиб олган. Чунки режимнинг ҳақиқий башарасини очадиган, унга қарши курашадиган минглаган бегуноҳ инсонларни асоссиз айбловлар билан узоқ йилларга қамоққа тиқишда айнан суд тизимининг роли катта бўляпти. Айниқса, бу борада Ҳизб ут-Таҳрир сафидаги холис мусулмонларга нисбатан уюштирилган ва ҳеч қандай асосга эга бўлмаган айбловлар билан узоқ йилларга қамаш амалиёти – бу ҳозиргача давом этиб келяпти – яққол мисол бўла олади.
Хабар (ОАВ 20.02.2023й): Ижтимоий тармоқлар ва ОАВда тарқалган хабарларга кўра, ОТМ раҳбариятларига барча талабаларни ўрганиб, улар орасидан шартли 3 гуруҳ: жиноятчиликка мойил, ёт ғоялар таъсирига тушиш арафасидаги ва тартиб-қоидаларга риоя этмайдиган талабалар рўйхатини шакллантириш ва ажратиб олинган талабаларга вазирлик, ОТМларнинг раҳбар-ходимларини бириктириш, уларнинг ота-оналари билан индивидуал суҳбатлар ташкил этиб бориш топшириғи берилган. Буни Олий таълим, фан ва инновациялар вазирлиги тасдиқлаган.
Изоҳ: Бундай топшириқлар ортида асосан талабаларнинг диний билими даражаси ва динни қандай тушуниши ҳақида маълумот йиғиш ётади. Агар талабалар орасида динни “нотўғри” тушунадиган, яъни ўзбек режими белгилаб берган “ислом”дан бошқача тушунадиганлари бўлса, улар назоратга олиниши зарур. Буни ОТМларга тўлдириш учун юборилган бланкадаги “диний маълумоти” деган графанинг борлиги ҳам тасдиқлаб турибди. Зеро, талабанинг диний маълумоти қандай эканлигини билишдан мақсад, агар унинг маълумоти бўлмаса ёки саёз бўлса, унга динни ўргатадиган муаллим бириктириш кўзда тутилмаганлиги аниқ. Буни яна “ёт ғоялар таъсирига тушиш арафасидаги талабалар” дейилган гап жиноятчиликка мойил бўлган талабалар қатори тилга олингани ҳам кўрсатиб турибди. Булар ҳукумат талаба ёшлар орасида Исломийлашув даражаси ва кўламидан хавфсираётганлигига далолат қиляпти.
Хабар (ИИББ 18.02.2023й): Буюк Ипак Йўли метро бекати ёнида жойлашган “Milavitsa” аёллар ич кийими дўконининг рекламасини танқид қилган 1999 йилда туғилган Чирчиқ шаҳрида яшовчи Ш.А. жаримага тортилди.
Изоҳ: Юртимизнинг 90 фоизидан ортиғи мусулмонлардан иборат эканлигига қарамай, татбиқ қилинаётган тузумда халқ эътиқоди умуман эътиборга олинмайди. Ҳамманинг кўзи тушадиган бузуқ рекламани ўзининг эътиқодидан келиб чиқиб танқид қилган мана бу мусулмон йигит ҳам мақтов олиш ўрнига жазоланди. Зеро, динимизнинг қатъий буйруқларидан бири яхшиликка буюриб, ёмонликдан қайтариш эмасми ахир?! Агар Ислом давлати бўлганида эди, бундай бузуқ рекламаларни тақиқлаган, агар кимнидир ҳадди сиғиб шундай реклама қилган бўлса жазолаган бўларди.
Хабар (БП телеграм канали 25.02.2023й): 24 феврал куни Бош прокуратурада Халқаро-ҳуқуқий бошқарма бошлиғи Р. Ғиёсов ва АҚШ Федерал тергов бюроси вакиллари ўртасида учрашув бўлиб ўтди. Р. Ғиёсов АҚШнинг Тошкентдаги элчихонасидаги ФТБ вакили сифатида тайинланган Ф. Тэнсининг фаолиятида зафарлар тилаб, Бош прокуратура ва АҚШ ФТБ ўртасидаги муносабатларни янада мустаҳкамланиш ҳамда янги даражага чиқишига ишонч билдирди.
Изоҳ: Америкадек мусулмонларнинг биринчи рақамли душмани билан ҳар соҳада ҳамкорлик қилаётгани ўзбек ҳукуматининг хиёнатини очиқ кўрсатиб турибди. АҚШ Федерал тергов бюроси билан ҳамкорлик халқ устидан қаттиқ назорат ўрнатиш, терговдаги янги услуб ва воситаларни қўллаш каби ишларда прокуратура органларининг Америкадан таълим олаётганлигини кўрсатмоқда. Бундай ҳамкорлик ҳаром иш бўлиб, Ислом нуқтаи назарига кўра душман билан мусулмонларга қарши ва уларнинг зарарига тил бириктириш сифатида баҳоланади. Афсуски, Америка элчихонасидек фитналар ва жосуслар уйининг мамлакатимизда мавжуд бўлиб туриши, унинг турли даражадаги мулозимлари хоҳлаган одами билан бемалол учрашиб юриши оддий ҳолга айланиб қолди. Мустамлакачи душманларимизнинг худди ўз уйида юргандек юртимизда изғиб юришларига мана шу хоин ўзбек режими шароит яратиб беряпти.
Ҳизб ут-Таҳрирнинг Ўзбекистондаги матбуот бўлими аъзоси Форуқ
01.03.2023й
