Ғарб инвестициялари умиди: Хорижий инвесторлар кенгаши Ғарбга мойил кадрлар билан “бойитилди”

بِسْمِ اللهِ الرَّحْمٰنِ الرَّحِيمِ

Шавкат Мирзиёев 18 июл кунги қарори билан президент ҳузуридаги Хорижий инвесторлар кенгаши Ўзбекистон томонининг янгиланган таркибини тасдиқлади. Гуруҳ таркибига илк бор бош вазир ўринбосари Жамшид Хўжаев, энергетика вазири Жўрабек Мирзамаҳмудов, рақамли технологиялар вазири Шерзод Шерматов, Солиқ қўмитаси раиси Шерзод Қудбиев ва Тикланиш ва тараққиёт жамғармаси директори Шуҳрат Вафоев киритилди. Таъкидлаш жоизки, Хорижий инвесторлар кенгаши – давлат ва халқаро бизнес ўртасида мулоқотни йўлга қўйиш бўйича асосий орган ҳисобланади. Шунинг учун унинг таркибида қилинган ўзгартиришлар эътиборни тортади. Кенгашнинг янги аъзолари биографиясига қисқача назар солсак, маълум хулосалар чиқариш мумкин бўлади.

Бош вазир ўринбосари Жамшид Хўжаев – Бирмингем университетида (Британия) МВА даражасига эга бўлди, Commerzbank (Германия), ХВЖ (АҚШ), JPMorgan Chase ва Standard Bank (ЖАР)да малака оширди. У халқаро молия институтлари тилида гапирадиган одам.

Президент маслаҳатчиси Равшан Ғуломов – Австралия Миллий Университетида таҳсил олган – Ғарбнинг етакчи университетида илмий тажрибага эга бўлган саноқли ўзбек расмийларидан бири.

Энергетика вазири Жўрабек Мирзамаҳмудов – Алабама университетида (АҚШ) “Умид” жамғармаси дастури бўйича таълим олган, шунингдек, Тошкент кимё-технология институти битирувчиси – “Ўзатом”дан вазиргача бўлган мартаба технократик ва халқаро ёндашув билан сингиб кетган.

Рақамли ривожланиш вазири Шерзод Шерматов – Ель университети (АҚШ) битирувчиси – янги авлоднинг энг кўзга кўринган “технократлари”дан бири.

Бундан қандай хулосалар чиқариш мумкин?

Кенгаш таркиби фақат малакали мутахассисларни танлашдан иборат эмас. Буни Ғарб бизнесига содиқлик намойиши ўлароқ тушуниш мумкин. Кенгашда АҚШ, Британия, Австралияда таҳсил олган, етакчи халқаро тузилмалар билан ҳамкорликда ишлаган инсонларнинг борлиги тўғридан-тўғри сигналдир: Ўзбекистон Европа Иттифоқи ва Шимолий Америка инвесторлари билан “бир тилда гаплашади”.

Мирзиёев нафақат кадрларни янгилаяпти, балки у Ғарб кутилмаларини қондириш учун инвестицияларни жалб қилиш тизимини қайта шакллантирмоқда. Ваҳоланки, Ғарб сармоядорлари шунчаки бозорларни хоҳламайдилар, улар аввалдан башорат қилиш имконияти бўлишини, шаффофлик ва ўйин қоидаларини тушунишни хоҳлашади. Бир сўз билан айтганда, энг минимал рисклар билан энг максимал фойда олишга уларнинг ишончи комил бўлиши лозим. Ўзбек ҳукумати Ғарб сармоядорларининг мана шундай “нозик феъл-атвори”га тизимни мослаштирмоқда.

Президентнинг мазкур қарорида 2025 йил сентябрига қадар чет эл капитали иштирокидаги корхоналар оладиган ва таъсисчига йўналтирадиган дивидендларни солиққа тортиш механизмларини қайта кўриб чиқиш бўйича таклифлар киритиш топширилди. Бундан очкўз хорижий компания эгалари даромадларига солиқ имтиёзлари берилишини кутиш мумкин.

Бундан ташқари, қуйидаги йўналишлар бўйича ҳам таклифлар тайёрлаш вазифаси қўйилган:

• инвесторларга ер ажратишни соддалаштириш;
• стратегик истеъмолчиларни кафолатли электр таъминоти билан таъминлаш;
• йирик истеъмолчиларни электр тармоқларига улашни тартибга солиш;
• электр тармоқларини концессия асосида хусусий секторга бошқарувга бериш;
• маҳаллий техник стандартлар, лицензия шартлари ва синовлар ўтказиш тартибини халқаро стандартларга мувофиқлаштириш;
• ип-калава ва минерал ўғитлар экспорти божларини қайта кўриб чиқиш.

Кўриниб турганидек, ўзбек режими инвестор номи остида ғараз ниятлар билан юртимизга суқулиб кираётган хорижий компанияларга энг қулай шароитлар яратиш учун туну кун ишламоқда. Бироқ Ўзбекистондаги “қудратли шахслар қўллови”сиз фаолият юритаётган маҳаллий тадбиркорларга бундай эътиборнинг бир чимдимини ҳам кўрмайсиз. Уларга на кафолатли энергия билан таъминлаш, на имтиёз, на енгиллик бор. Соддароқ айтганда, “ҳаммаси инвесторларга, “ўзимизники”ларга ҳеч нарса” қабилидаги сиёсат юргизилмоқда.

Иқтисодиётимизни ўй-хаёли фақат табиий бойликларимизни талон-тарож қилиш ва фойда олиш бўлган очкўз капиталист бойларга топширишнинг оқибати фалокатли бўлишидан огоҳлантириб келяпмиз. Улар хоҳ ғарблик, хоҳ хитойлик, хоҳ ўрис бўлсин, фарқи йўқ. Чунки Ўзбекистондек учинчи олам давлатларига инвестициялар фақат зарар келтиради холос. Улар иқтисодиётимизга тиккан ҳар бир долларини юз ва ҳатто минг қилиб суғуриб олмагунларича тинчимайдилар.

Ягона тўғри ечим шуки, миллионлаган иш ўринлари яратиш, иқтисодиётимизни гуллаб-яшнаши, техник-технологик жиҳатдан ривожланиш учун Ислом ва унинг иқтисод низомини татбиқ қилиш лозим! Бундан бошқаси алдов ва сохталикдир!

Ҳизб ут-Таҳрир Ўзбекистон Матбуот бўлими аъзоси Форуқ

05.08.2025й