Гендер тенглик: Жамиятни томиридан емираётган Ғарб мафкураси ва оилаларимизга хавф

بِسْمِ اللهِ الرَّحْمٰنِ الرَّحِيمِ

Асрлардан бери халқимиз оилавий ҳаётини Ислом аҳкомлари асосида юргизиб келади. Муаммо чиқса ҳам Исломга юзланиб, ундан ечим олади. Ҳатто худосиз Совет тузуми ҳам халқимиздан буни юлиб ташлай олмади. Аммо ҳозир Ғарб капиталистик тузумидан келиб чиққан “гендер тенглик” деган нарса ўзининг маккорлиги ва сиртидан ялтироқ кўриниши билан одамларни кўзини бўяйдиган замонда яшаяпмиз. Мусулмон оиласига Ғарбдан суқулиб кираётган «гендер тенглик» деган заҳарли мезонда: «Она болага неча соат қаради? Нега бу иш учун маош олмади? Нега шу вақтда кўчада ишламади? Нега эр ва хотин уй ишларига секундигача бир хил вақт сарфламаяпти? Нега раҳбарликда аёллар эркаклар билан тенг эмас?» каби саволлар ўртага ташланмоқда. Ана шу сунъий саволлар орқали минг йиллик аҳлоқий қадриятларимиз ва оилавий самимият «гендер» чизғичи билан майдалана бошлайди.

Дунёпараст ташқи кучлар сингдираётган «гендер тенглик» — фақатгина «аёлга зулм қилманг» деган беозор чақириқ эмас! Аёлга зулм қилиш ва унинг ҳақини ейишни Исломнинг ўзи 14 аср муқаддам ҳаром қилган. Аслида «гендер тенглик» деб аталмиш бу бузғунчи мафкура эркак ва аёлнинг Яратган Зот томонидан берилган табиий ҳилқати ва вазифаларини инкор этиб, ҳамма нарсани сохта тенглик тузоғига солишдир.

Масалан, онанинг ўз жигарбандига меҳр бериб, уни одоби ва тарбияси билан шуғулланиши каби муқаддас бурчи Ғарб социологиясида «unpaid care work», яъни «ҳақ тўланмайдиган парвариш меҳнати» деб аталади ва аёлнинг «пул топиш имкониятини чеклаётган салбий омил» сифатида баҳоланади.

2026 йил январда UNDP (БМТ Тараққиёт дастури) Ўзбекистон бўйича эълон қилган «Caring for the Future» тадқиқотида аёллар эркакларга нисбатан ҳақ тўланмайдиган парвариш ишларига икки баробардан кўпроқ вақт сарфлаши айтилган. 19 февралдаги сиёсий мулоқотда эса, Ўзбекистонда аёллар бу ишларга кунига ўртача 5-6 соат сарфлаши ва бу ҳолат уларнинг пул топиши ҳамда «карьера қилишига» халақит бераётгани таъкидланган.

Эътибор беринг! Она ўша она, фарзанд ҳам ўша фарзанд. Аммо Ғарб мафкураси бу воқелик маъносини бутунлай тескарига ўгирмоқда: кеча оналик ва фарзанд тарбияси шарафли масъулият бўлган бўлса, бугун у иқтисодий тўсиқ ва муаммо сифатида тақдим этилмоқда! Бунинг натижасида мактаб ёшидан «ҳамма нарсада бир хил бўлиш» ғояси билан заҳарланган қиз — келажакда оналикни эзгулик деб эмас, ўз карьерасига тўсиқ бўлувчи «оғир юк» деб кўра бошлайди.

Бу хавфли фикрлар шунчаки ҳавода қолмаяпти, балки давлат институтлари ва тизими орқали жамиятимизга мажбуран сингдирилмоқда.

Мустамлакачи халқаро ташкилотлар аввал бир фикрни семинарда айтади, кейин статистикани шу мезонга мослайди, сўнг вазирликларга шу кўрсаткичларни бажариш вазифасини қўяди.

Ўзбекистонда бу бузғунчи механизм аллақачон тўлиқ қуриб бўлинди:

• 2025 йил 27 майда UN Women’нинг Ўзбекистондаги доимий офиси очилди. Ташкилот бу офис «gender-sensitive policies», яъни гендер ислоҳотларини илгари суришини очиқ билдирди.
• Шу офиснинг дастлабки лойиҳаларидан бири — Европа Иттифоқи молиялаштираётган ва Иқтисодиёт ва молия вазирлиги билан бирга амалга оширилаётган Gender Responsive Budgeting лойиҳаси бўлди. Бу лойиҳа орқали гендер мезонлари тўғридан-тўғри давлат бюджетини тақсимлаш тизимига киритилмоқда.
• 2026 йил июлда UNFPA ва UN Women кўмагида «Ўзбекистонда гендер тенглиги бўйича мамлакат профили»нинг якуний лойиҳаси муҳокама қилинди.
• 2026 йил 24 сентябрда Сенат раиси ва UN Women минтақавий директори учрашувида бу ҳамкорликни янада кенгайтиришга келишиб олинди.

Мана, хавфли занжир қаерда! Аста-секин давлат бюджети, қонунчилик ва таълим тизими Ғарбнинг бузғунчи «гендер» қоидаларига бўйсундирилмоқда.

Бунинг оқибати нима бўлади? Орадан бир авлод ўтиб, оилаларда илоҳий мувозанат йўқолади. Эр ва хотин бир-бирини тўлдирувчи, меҳр-муҳаббат ва савоб умидида яшайдиган жуфтликдан — доимо бир-бири билан «ким қанча пул топди», «ким неча соат болага қаради» деб талашадиган ва рақобатлашадиган душманларга айланади. Натижада оилалар парчаланиб, ажрашишлар сони кескин ортади, туғилиш камаяди ва жамият маънавий таназзулга юз тутади — айнан бугунги Ғарб жамияти бошидан кечираётган фожиа бизнинг уйимизга ҳам кириб келади!

Инсон томонидан ўйлаб топилган бу калтабин «тенглик» ғояси Аллоҳ таоло томонидан белгиланган мукаммал аҳкомлар ва табиий мувозанатга қарши исёндир. Исломда эркак ва аёлнинг шаъни ва қадри бир хилда мукаррамдир, аммо уларнинг жамият ва оиладаги масъулиятлари биологик ва руҳий ҳилқатига мос равишда тақсимланган.

Мусулмон киши Ғарбнинг чириган капиталистик ва либерал атамаларига кўр-кўрона эргашмайди. Биз «эркак ва аёл бир хил бўлиши керакми?» деган бемаъни саволни эмас, «Бу масалада Оламлар Рaббиси Аллоҳнинг ҳукми ва тақсимоти қандай?» деган саволни беришимиз шарт.

«Гендер тенглик» деган беозор ниқоб остида оилаларимиз ва ахлоқимизга болта ураётган бу мафкурани очиқдан-очиқ рад этишимиз, оилавий ҳаётимизни Ғарб фондларининг кўрсатмаларига эмас, балки Исломнинг адолатли ва мукаммал шариат аҳкомларига асослаб ҳимоя қилишимиз зарур!

Салоҳиддин

09.10.2026й