Ҳафталик муҳим воқеалар таҳлили
Ҳафталик муҳим воқеалар таҳлили
بِسْمِ اللهِ الرَّحْمٰنِ الرَّحِيمِ
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾
“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”
Хабар (kun.uz 16.08.2025й): Олий таълим муассасалари учун контракт тўловида солиқ имтиёзи кенгайтирилди.
Изоҳ: Эндиликда олий таълим муассасалари учун ота-оналар фарзандининг ёшидан қатъий назар контракт тўлови қилганда, уларнинг иш ҳақи ва бошқа даромадларидан олинадиган жисмоний шахслар даромад солиғидан имтиёз берилади. Солиқ кодексига мувофиқ, фуқароларнинг иш ҳақи ва бошқа даромадларининг ўзлари, фарзандлари, шунингдек, 26 ёшга тўлмаган турмуш ўртоқлари учун йўналтириладиган тўловларига даромад солиғи солинмайди. Янги тартибга кўра, фарзанднинг ёши муҳим эмас – ота-она катта ёшдаги фарзандининг контрактини ҳам тўлаб, солиқ имтиёзидан фойдаланиши мумкин бўлади. Бир қарашда, бу қарор аҳоли учун катта енгилликка ўхшайди: энди магистратурада ёки ҳатто докторантурада ўқиётган фарзанди учун ҳам ота-оналар солиқ чегирмасидан фойдаланиши мумкин. Бу орқали давлат аҳолига “қўллаб-қувватлаяпмиз” деган сигнал юбормоқда. Бироқ ортидаги воқеликка назар ташласак, контракт нархлари йил сайин ошиб бормоқда. Имтиёз фақат юкнинг оғирлигини юмшатгандек кўринади, аммо масаланинг моҳияти – олий таълим қимматлиги ўзгаргани йўқ. Шунингдек, имтиёз фақат расмий ишловчиларга тегишли. Норасмий секторда меҳнат қилаётган ёки ишсиз оилалар учун бу қарор деярли аҳамиятсиз. Бундан ташқари, давлат солиқда йўқотгандек кўринса-да, контрактдан кўпроқ ютади. Яъни буни “бюджетдан эҳсон” эмас, аҳолида “ҳукумат ғамхўр” деган тасаввур уйғотишга хизмат қиладиган сиёсий қадам сифатида баҳолаш мумкин. Аслида, давлат таълим соҳасида ҳақиқий ғамхўрликни истаганда, барча учун таълимни бепул қилиши лозим эди. Бироқ ўзбек режими таълимни ҳам маблағ ундириш манбаига айлантириб олганини кўряпмиз. Албатта, бунинг ягона сабаби бугунги кунда татбиқ қилинаётган манфаатга асосланган капиталистик демократия тузумидир. Яқинда тикланажак Халифалик давлати шаръий ҳукмга мувофиқ олий таълимни барча учун имкон қадар бепул таъминлайди иншаАллоҳ.
Хабар (qalampir.uz 18.08.2025й): Хонободда 3 кун давом этган ва умумий ҳисобда 600 минг одам ташриф буюрган 2025 йилги “Дунё садолари” фестивали ўз ниҳоясига етди.
Изоҳ: Фестивал ҳақидаги расмий хабарларда унинг 600 мингдан зиёд меҳмонни жалб этгани, туризм ва иқтисодий ривожга хизмат қилаётгани таъкидланди. Бироқ ишончли маълумотларга кўра, мамлакатдаги кўп тадбирларда бўлганидек, Хонободдаги бу фестивалда ҳам ўқитувчилар мажбурий равишда жалб қилинган. Шунингдек, шаҳарда аҳоли учун хизмат қиладиган транспорт воситалари ҳам тадбир ихтиёрига олиниб, халқнинг кундалик эҳтиёжларига ноқулайликлар келтирган. Аслида эса миллиардлаб маблағлар ажратилаётган бу каби “маданий” тадбирлар жамиятда ахлоқий муҳитни кучайтиришга эмас, аксинча уни йўққа чиқаришга хизмат қилмоқда. Саҳнадаги мусиқа ва фаҳш тарғиботи ёшларни ахлоқан бузуқликка етакламоқда. Ҳукумат “туризмни ривожлантириш” баҳонасида Ғарбнинг бузуқ маданиятини ёшларимиз ҳаётига сингдирмоқда. Ҳақиқатда эса, исломий тарбия олишга интилаётган ёшларнинг ота-оналари ёки ўқитган устозлари таъқибга олиниб, жазога тортилмоқда. Бу режимнинг асосий мақсади – мусулмон ёшларларимизни беҳуда ўйин-кулгу тадбирлари билан банд қилиб, Исломни ўрганиш ва унга амал қилишдан қайтаришдир. Халқимиз тушуниб етиши лозимки, бу каби “байрам” ва “фестивал”лар ортида маънавий ҳалокат яширинган. Шу билан бирга, ўзбек режими бу каби тадбирларни ўтказишдан, биринчи навбатда, кофир мустамлакачиларнинг режаларини амалга оширмоқда. Чунки мусулмон юртларини Исломдан узоқлаштириш улар учун ҳаёт-мамот масаласидир. Устимиздаги раҳбарлар эса Аллоҳнинг ғазабини унутган ҳолда, уларнинг розилигини устун қўймоқда. Ажабланарлиси, бундай очиқ фаҳш тадбирларга имом-домлалар ва айрим “исломий блогерлар”нинг сукутидир. Гўё улар ўз билимларини режимнинг мана бундай жирканч ишларини оқлаш учун олгандек. Аллоҳ таоло бундай фитналардан огоҳлантириб шундай дейди:
يَٰٓأَيُّهَا ٱلَّذِينَ ءَامَنُواْ لَا تَتَّبِعُواْ خُطُوَٰتِ ٱلشَّيۡطَٰنِۚ وَمَن يَتَّبِعۡ خُطُوَٰتِ ٱلشَّيۡطَٰنِ فَإِنَّهُۥ يَأۡمُرُ بِٱلۡفَحۡشَآءِ وَٱلۡمُنكَرِۚ
– “Эй иймон келтирганлар! Шайтоннинг қадамларига эргашманглар. Ким шайтоннинг қадамларига эргашса, албатта, у фаҳш ва ёмонликни буюради”. (Нур:21)
Хабар (gazeta.uz 18.08.2025й): Veolia Тошкентда иссиқлик тарифларини ошириш режалари юзасидан изоҳ берди. Тарифларни қайта кўриб чиқиш энергия ресурслари нархи ошиши ва 2030 йилгача субсидиялашдан тўлиқ воз кечиш режалари билан боғлиқ.
Изоҳ: 2021 йилда Тошкент шаҳридаги иссиқ сув ва иссиқлик таъминоти тизими 30 йилга Франциянинг Veolia компаниясига топширилганида, Молия вазирлиги рус ва инглиз тилларида умумий гаплардан иборат пресс-релиз эълон қилиш билан чекланган. Келишув тафсилотлари очиқланмаган, аҳоли бундан бошқасини билмайди. Халқ ва давлат корхоналари орасига суқилиб кириб келган бу монополист компания шу пайтгача ўзининг молиявий ҳолати, хусусан, харажат ва даромадлари тўғрисида батафсил ҳисобот тақдим этмаган. У тарифларни оширишга эришиш учун тизимни модернизация қилиш, асбоб-ускуналар сотиб олишга улкан харажатлар талаб қилиниши ҳақидаги рақамларни келтиришга асосий эътиборни қаратмоқда. Бу билан одамларни ҳақиқатда тарифларни оширмасликнинг имкони йўқлигига ишонтирмоқчи бўлмоқда. Хусусан, ўтган ва жорий йилда у тарифларни 50%га оширишни талаб қилганди. Бу йил умумий ҳисобда тарифлар 30%га ошади, 4 йилда эса 5 баробарга қимматлашиши айтилмоқда. Буни компания ўша 2021 йилда тузилган келишувдаги шартларни орадан 4 йил ўтиб маълум қилганидан сўнг жамоатчилик хабар топди. Эътиборлиси, буни бирор расмий идора эмас, балки компаниянинг ўзи хабар берди. Албатта, ДХШ лойиҳалари доирасида қилинаётган бу каби шубҳали келишувлардаги яширин шартлар янгилик бўлмай қолган. Инвестор номи остида кириб келаётган хорижий компанияларга жуда кўп имтиёз ва енгилликлар бериляпти. Улар давлат корхоналари ва одамлар ўртасида ўртакашлик қилиб, улкан даромадларни олиб чиқиб кетишяпти. Хусусан, мана бу Франция компаниясига ҳам триллионлаган маблағлар субсидия сифатида тўғридан-тўғри ўтказиб берилади. Халқимизнинг иқтисодий аҳволи оғирлашиб бораётган бир пайтда, коммунал хизматлар нархи ҳам осмонга чиқиб кетаётгани дард устига чипқон бўляпти. Бу хизматлар асосий эҳтиёжлар жумласидан бўлгани сабабли, Халифалик давлатида шаръий ҳукмга биноан у ҳар бир шахсга бепул ёки жуда арзон нархларда таъминланади.
Хабар (daryo.uz 19.08.2025й): Президент Шавкат Мирзиёев 19 август куни Покистон Штаблар бошлиқлари бирлашган қўмитаси раиси, генерал Саҳир Шамшод Мирзо бошчилигидаги делегацияни қабул қилди.
Изоҳ: Хабарга кўра, Ўзбекистон ва Покистон стратегик шерикликни чуқурлаштириш масалаларини муҳокама қилди. Феврал ойида эришилган келишувларни амалга оширишга алоҳида эътибор қаратилди. Шунингдек, турли даражаларда мулоқот ва алмашинувлар фаоллашгани қайд этилди. Томонлар ҳарбий ва хавфсизлик соҳаларида ҳамкорликни муҳокама қилди. Шунингдек, трансафғон темир йўлини қуриш лойиҳасини амалга оширишни тезлаштириш масаласига эътибор қаратилди. Маълумки, Покистон ташқи сиёсатда АҚШ орбитасидаги давлат ҳисобланади. Шу боис унинг қадамлари асосан Америка манфаатлари билан уйғун кечади. Яқинда АҚШ Озарбайжон ва Арманистонни яраштириш орқали стратегик аҳамиятга эга бўлган Зангезур йўлагини ўз таъсирига олишга эришди. Ва бу жараёнда Туркия ҳам АҚШ манфаатларини рўёбга чиқариш йўлида қаттиқ ҳаракат қилмоқда. Энди эса Вашингтон Покистон орқали Марказий Осиёга трансафғон йўлини ишга солиш билан фаолроқ кириб келишга интилмоқда. АҚШнинг мақсади – дунёда етакчилик мақомини сақлаб қолиш, жумладан, Марказий Осиёнинг бой ресурсларига эга чиқишдир. Афсуски, Покистон ҳам, Ўзбекистон ҳам бундай учрашувларда Уммат дардини эмас, балки мусулмонларга нисбатан қотиллик сиёсатини юритиб, Ғазо аҳлини дунё кўз ўнгида қатлиом қилаётган яҳудий вужудини ошкора қўллаб-қувватлаб келаётган АҚШ манфаатларига хизмат қилмоқда. Ғазода ҳар куни гўдаклар сунъий очарчилик қурбони бўлаётган бир пайтда, бу икки мусулмон юрти АҚШ манфаатларига хизмат қилаётгани аламли ҳолдир. Аллоҳдан ёлвориб сўраймиз, Фаластин замини яҳудийлар учун қабристонга айлансин, у ердаги мазлум мусулмонларни ёрдамсиз қолдираётган бу қўрқоқ, малай ҳукмдорлар эса тез орада чириган тахтларидан ағдарилсин. Ўрнига эса Умар ибн Хаттоб р.а.дек Халифалар ва Салоҳиддин Айюбийдек қўмондонлар келсин. Аллоҳим, кофир қавмларнинг бу ҳаракатини улар учун ҳалокат, Ислом уммати учун эса Ўзинг ваъда қилган нусрат билан якунла! Расулуллоҳ ﷺ дедилар: “…Сўнгра яна Пайғамбарлик минҳожидаги Халифалик бўлади”.
Хабар (gazeta.uz 19.08.2025й): 19 август куни Мубашшир Аҳмад тахаллуси билан танилган Алишер Турсуновга нисбатан қўзғатилган жиноят иши юзасидан суд бошланди. У диний экстремизм ва ақидапарастлик ғояларини тарғиб этувчи материалларни ОАВ орқали тарқатишда айбланмоқда.
Изоҳ: Ҳизб ут-Таҳрир Ўзбекистон Матбуот бўлими Мубашшир Аҳмаднинг суди бошланиши муносабати билан матбуот баёноти эълон қилди. Унда, жумладан, шундай дейилади: “Мубашшир Аҳмадга қарашли бўлган Azon Global портали…да, жумладан, лаънати яҳуд вужудининг Муборак Фаластин заминидаги босқинчилик жиноятлари, шунингдек, Хитойнинг уйғур мусулмонларига қарши шафқатсиз репрессив сиёсати ҳам фаол ёритилади. Афтидан, мазкур портал фаолияти ўзбек режимининг Исломий контент бўйича қатъий белгилаб берган йўналишига мос келмаган кўринади. Бироқ, шуни алоҳида таъкидлаш лозимки, портал амалда ўзбек режимига қарши фаолият юритмайди. Бундан ташқари, у тўлиқ Ўзбекистондан ташқарида, яъни Ўзбекистон қонунлари амал қилмайдиган майдонда фаолият қилади. Албатта, ўзбек режими ўзи ўйлаб топган қонунларини ҳам оёқости қилиб, ўзига “ёқмаган” ҳар қандай шахсни жазога тортиши янгилик эмас”. Баёнот шундай сўзлар билан якунланади: “Биз Мубашшир Аҳмад биродаримизга Аллоҳдан офият сўраймиз, уни золим режим қўлидан тез фурсатда озод қилишини сўраб дуо қиламиз. Зеро, Росулуллоҳ ﷺ шундай марҳамат қилганлар: “Мусулмон мусулмоннинг биродаридир. У унга зулм ҳам қилмайди ва ташлаб ҳам қўймайди”. …Биз Мубашшир Аҳмад ишидан юртимиз ва ундан ташқаридаги барча фаоллар ибратланиши керак, деб ҳисоблаймиз. Чунки бу режим Россия, Америка ва Хитой каби мустамлакачи давлатларнинг Ислом ва мусулмонларга қарши кураш бўйича талабларини шу пайтгача қолдирмай бажариб келяпти. Шунинг учун ҳам, токи динингиздан озгина нарсани ҳам қолдирмай йўқ қилмагунларича сизга тақиқ кетидан тақиқ қўйилаверади. Демакки, ўзбек режими ва унинг ортидаги ёвуз давлатларга ҳадеб ён бераверишни бас қилиб, Ислом ва мусулмонларнинг туб манфаатлари учун холислик билан ва фақат Аллоҳнинг розилигини кўзлаб ҳаракат қилиш вақти келди!”
Хабар (ozodlik radiosi 20.08.2025й): Наманганда имомлар, ноиблар ва мутаваллиларнинг хотинларидан ҳижобни ечиб, рўмолни орқадан боғлаш талаб қилинди.
Изоҳ: Озодлик радиосининг хабар беришича, мазкур талаб Наманган вилояти ҳокимлигининг жамоат ва диний ташкилотлар билан алоқалар бўлими бошлиғи Жамшид Хатамов томонидан август ойи бошларида ташкил қилинган мажлисда янграган. Ушбу мажлис фақат аёллар учун ташкил қилинган бўлиб, ҳар бир имом, ноиб ва мутаваллининг хотинлари келиши шарт қилинган ва агар кимдир келмайдиган бўлса, унга эрини ишдан бўшатиш билан таҳдид қилинган. Бу мажлис ҳақида унда қатнашган аёллардан ва имомлардан бири Озодликка хабар берган. Мажлисни олиб борган бўлим бошлиғи ўринбосари Сайёра Исоқова аёллардан ҳижобни ечиб, рўмолни орқадан ўраш қатъий талаб қилинишини айтган ва бу борада айнан имомларнинг хотинлари халққа намуна бўлиши кераклигини уқтирган. Аллоҳ таоло Ўзбекистондаги имом-домлалар бошига оғир синовларни соляпти. Улар бир вақтнинг ўзида ҳам ўзбек режимига хизмат қилиш, ҳам Исломга содиқ мусулмонлар ўртасида жон сақлаш умидида эдилар. Бироқ бу иккисини жамлашнинг ҳеч иложи йўқлигидан бугун улар икки ўт орасида қолишяпти. Қаранг, Муборак Фаластин, Ғазодаги қатлиом масаласида режимнинг тақиқларига итоат қилиб, бу борада шу пайтгача бир оғиз сўз айтмадилар, ҳатто у ердаги мазлумлар ҳақига омматан дуо қилиб қўйишга ҳам ярамадилар. Энди эса режим улардан аёлларининг авратини очишни талаб қилмоқда, юртимиздаги муслима аёлларнинг авратини очишда етакчилик қилишларини хоҳламоқда. Аслида, бундай талаб озгина ғурури ва ғаюрлиги бор мусулмон учун жуда қаттиқ ҳақорат ва ҳаддан ортиқ хорликдир! Бироқ бу имом-домлаларда бу нарсалар топилармикин?! Эй муфтий бошлиқ дин уламолари! Яна қачонгача режимга ён бермоқчисиз?! Эс-ҳушингизни йиғадиган вақт келмадими?! Ё динингиздан ҳеч нимани қолдирмай йўқ қилмагунларича устингиздаги мана бу режим ва унинг ортида турган кофир мустамлакачи давлатларга итоатда бўлаверасизми?! Сизларни яна бир бор Аллоҳнинг йўлига қайтиб, раббоний уламолар қаторидан жой олишга чақирамиз! Бунинг учун сизлар режимга хизмат қилишни, унинг ғайриисломий сиёсатига Исломдан тўн кийдиришни бас қилишингиз лозим. Ниҳоят, Пайғамбарлар меросхўрлари деган номга лойиқ бўлиб, Ислом ва мусулмонлар тарафига ўтишингиз сизлар учун айни тўғри йўлдир!
وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَٰكِنَّ الْمُنَافِقِينَ لَا يَعْلَمُونَ
– “Ҳолбуки, куч-қудрат (ғолиблик) Аллоҳники, Унинг пайғамбариники ва мўминларникидир. Лекин мунофиқлар (буни) билмаслар”. (Мунафиқун:8)
Хабар (yuz.uz 20.08.2025й): Президент Шавкат Мирзиёев тадбиркорлар учун “солиқ амнистияси” эълон қилди.
Изоҳ: Мирзиёевнинг сўзларига кўра, бугунги кундаги солиқ текширувлари орқали 20 мингдан зиёд тадбиркорларда 16 триллион сўмлик хато ва камчиликлар аниқланган. Аммо президент бу ҳолатлар учун жазо қўлланмаслигини, балки 1 ноябргача тадбиркорларга барча хатоларни ихтиёрий тўғрилаш имкони берилишини маълум қилди. Шу билан бирга, айланма солиқдан ҚҚСга ўтадиган корхоналарга қатор енгилликлар таклиф этилди. Жумладан, улар бир йил давомида фойда солиғидан озод қилинади, ҳисоботда хатолик бўлса ҳам жарима қўлланмайди ва бухгалтер маошининг маълум қисми солиқдан чегирилади. Президент таъкидлаганидек, 1 ноябрдан бошлаб тадбиркорлар “тоза саҳифадан” бошлайди. Режимнинг “солиқ амнистияси” ташқи томонда тадбиркорга ёрдам, имконият ва енгиллик сифатида кўринади. Лекин аслида бунинг ортида давлатнинг қуйидаги мақсадлари яширинган: Биринчиси – тўлиқ назорат. Тадбиркорларнинг молиявий ҳаракатлари тўлиқ базага киритилади. Ҳозир жазоламасдан маълумот йиғилади, аммо кейин бу маълумотлар назорат ва босим учун ишлатилиши мумкин. Иккинчиси – солиқ қамровини кенгайтириш. ҚҚС ставкаси 12%га туширилгани кўзга енгилликдек кўринади. Лекин амалда бу давлат учун кафолатли ва узлуксиз даромад манбаини таъминлайди. Айланма солиқда қолишни истаган тадбиркорлар эса турли “имтиёзлар” баҳонасида ҚҚС тизимига мажбурий равишда ўтказилади. Учинчи – сиёсий қурол сифатида рейтинг. Тадбиркорлик рейтинги орқали ҳар бир бизнес давлат сиёсатига қарам қилинади. Агар кимдир итоатсизлик қилса, уни рейтинг орқали кредит, тендер ва имкониятлардан маҳрум қилиш осон. Бир сўз билан айтганда, бу “амнистия” – тадбиркорларни оғзига ширин кўрсатилган тузоқ орқали тўлиқ тизимга қулфлаб киритиш стратегиясидир. Доим таъкидлаб келаётганимиздек, капиталистик демократия тузумида ҳеч қачон халқ манфаатлари инобатга олинмайди. Бу тузумда фақат ҳокимият эгалари ва уларга яқин бўлган капиталист бойларнинг тор манфаатлари ҳимоя қилинади. Шунинг учун ҳам ҳокимият тепасига ким келиб ва нималарни ваъда қилишидан қатъий назар, халқнинг аҳволи ўнгланмайди. Қачонки, бу тузум таг-томири билан ҳаётдан улоқтирилиб, ўрнига Исломнинг адолатли қонунлари билан ҳукм юритадиган Халифалик барпо бўлса, албатта, ёлғончи ҳукмдорлар куни тугаб, адолатли бошлиқлар даври бошланади ва бу эса Аллоҳнинг изни ила жуда яқиндир.
Салоҳиддин
24.08.2025й
