بِسْمِ اللهِ الرَّحْمنِ الرَّحِيمِ

“Мустақил” юртимизнинг ўзига хос кўринишларидан бири – аёллар мардикор бозоридир

“Аёллар мардикор бозори” ёки “мардикор аёллар”…. Ушбу сўзларни эшитганда ҳар қандай инсоннинг қалби ларзага келади. Аёл, аввало у она! У инсон зурриёдини дунёга келтирувчи нозик ҳилқат! Аёл, у фарзандларимиз тарбиячиси ва мураббийи! Аёл, у уйимизнинг чироғи бўлган уй бекаси! Бу шиорларни узоқ давом эттириш мумкин. Аммо ҳаётдаги воқелик қандай? 

Биз ушбу мақоламизда чет давлатларга чиқиб мардикорлик қилаётган ёки мажбурликдан ўз танасини сотишдек тубан ишларга қўл ураётган ўзбек аёллари ҳақида тўхталмоқчи эмасмиз. Балки кўз ўнгимизда оддий ҳолга айланиб улгурган, инкор этишнинг имкони йўқ бўлган бир ҳақиқат хусусида тўхталмоқчимиз. Эркаклар мардикор бозорларининг бир чеккасида “Аёллар мардикор бозор” лари  пайдо бўлди. Энг ачинарли жиҳати шуки, бундай воқелик йиллар давомида уруш балоси қамраб олган Афғонистон ёки Ироқда эмас, балки “Тинчлик рамзи” дея эътироф этилаётган диёримизда содир бўлмоқда.

Ваҳолангки, Аллоҳ Таъоло аёлни нозик ҳилқатда яратиб, уни ожиза деб номлади. Яъни жисмоний қувватда эркакка нисбатан ожизалиги аниқ ҳақиқатдир. Шунинг учун, шариат аёлга хос ишларни юклади. Яъни, фарзандларига меҳрибон она, тарбиячи, турмуш ўртоғининг ор-номуси ҳамда оила деган муқаддас даргоҳнинг маликасидир. Мардикорчилик ўзбек аёлининг оиласи, фарзандлари даврасидаги тинч, хотиржам ҳаёт кечиришини ушалмас орзуга айлантирди. Натижада ота-она меҳри ва тарбиясидан мосуво фарзандлар кўча тарбиясини олиб яшашга мажбур бўлмоқдалар.

Аввалида тирикчилик илинжида иш излаб чиққан ўзбек аёли, мардикор бозорнинг бир четида турар эди. Қолаверса, фақатгина аёлларга хос, енгилрок, соғлиққа хавф солмайдиган ишлар билан шуғулланар эдилар. Ҳозирда эса, иқтисодий танглик кучайиб, ҳаётнинг ўта даражада қийинлашуви ҳамда бир бурда нон учун оиласини ташлаб келган аёлларнинг кўпайиши натижасида ожизаларга хос енгилрок ишлар барча мардикор  аёлларга етмаслиги ортидан, эркаклар билан бир сафда туриб, оғир ишларга қўл уришга  мажбур бўлмоқдалар.

Энг ёмони эса, бу оғир ишлар уларнинг соғлиқларини емириб йўқ қилмоқда ва охир-оқибат ёш бўла туриб соғликларидан ажраб, ногиронларга айланмоқдалар. Шу ўринда айтиб ўтиш лозимки, иш берувчиларнинг муомаласи ҳам одамни янада ташвишлантиради. Баъзи бир на Худодан на ўзгани ҳаққидан қўрқмайдиганлар аёлларни ҳудди ўз чўрисидек ишлатиб, ҳақларини бермай ҳайдаб юбораётгани чидаб бўлмас ҳақиқатдир. Унданда ачинарлиси шуки, аёлларни барча имтиёзлардан, ҳатто аёллигидан, оналигидан маҳрум қилиб мардикор бозорларига чиқишга мажбур қилган ҳукумат ҳам бечора заифаларнинг шу ишларини кўра олмаяпти. Мардикор бозори ҳудудига ҳамма дераза ойналари темир панжаралар билан қопланган автобусларни олиб келиб, ёввойи ҳайвонларни тутиб олгандек, эркак аёлни аралаш автобусларга ортиб, туман хавфсизлик идораларига олиб бориб, эрталабдан кечгача оч-наҳор ушлаб туришмоқда. Худдики мана шу иш тўғри ечимдек.

Бу ҳолатлар жамиятимиздаги муайян бир муаммо бўлсада, аслида бу адолатсиз тузум қозонида бутун бир уммат қовурилмокда. Устимиздаги ушбу зулм ва зўравонликларнинг асл сабабчиси, бизга татбиқ қилинаётган капитализм низомидир. Шу низом орқали мазлум халқни қони зулукдек сўрилмоқда. Шунингдек, жуда кўп саноат корхоналари, завод ва фабрикаларнинг фаолияти тўхтатилиб, ишчи ўринлари кескин камайиб кетиши натижасида ишсизлик авж олиб, одамлар бир бурда нонга ҳам пул топа олмай қолдилар. Қолаверса, иқтисодиётнинг емирилиши, коррупциянинг чуқур илдиз отиши ўзбек аёлларини бир бурда нон топиш илинжида фарзандлари тарбиясини бир четга суриб, мардикорликка чиқишга мажбур қилди.

Нега Умматнинг келажак давомчилари тарбиячиси бўлган, яъни юртнинг мард, жасур ўғил-қизларини дунёга келтириб, вояга етказувчи муниса оналаримиз, опа-сингилларимиз шундай аҳволга етиб келишига индамай қараб турибмиз? Аёлларни ўз номуси деб қараган уммат эркакларининг ори, шаъни, ғурури қаёққа кетди? Шундай ҳолатга тушишимизга асл сабаблардан бири, сиз эркакларнинг золим олдидаги сукутингиз эмасми? Аёл кишини заифа, ожиза деган нуқтаи-назардан қараб, унинг барча ҳақ-ҳуқуқларини топталишига тек қараб тура олмаган уммат раҳнамолари қани?

Бу юртдаги аёлларнинг қадри қанчалик даражада эканлигини кўрмаётган инсон ё кўр, ёки ҳукумат маддоҳи, ё фаҳмсиз, худбин кимсадир. Эй юртимнинг мард ғурурли йигитлари!!! Қачонгача сизга оқ сут берган онангизни, ожиза опа-сингилларингизни, фарзандларингиз келажагини ҳал қилувчи аҳлингизни “аёллар мардикор бозори” деб номланмиш хорлик бозорида юришларига кўз юмасиз? Юртимиздаги бу ҳолатларга ҳар бир қалбида заррача иймони, ғурури, ор-номуси бор инсоннинг бефарқ қараб туришига ҳаққи йўқ!

Шунингдек азиз опа-сингиллар! Сизу биз келажак авлод тарбиячиси эканмиз, аёлларга нисбатан бўлаётган бундай зулмларга бефарқ туришга бизларнинг ҳам ҳаққимиз йўқ! Аксинча, биз муслималар қалбимиздаги иймон ва Аллоҳга бўлган тақвомиз билан бундай воқеликни ўзгартиришга қаттиқ киришишимиз вожибдир! Ана шундагина уммат устидаги зулм, ҳақсизлик, изтиробли кунларни бошимиздан улоқтириб, келажак авлод учун фаровон ҳаёт кечиришларига замин ҳозирлаган бўламиз!

Ҳизб ут-Таҳрирнинг Ўзбекистондаги медиа офисининг аёллар бўлими

Омина Рашидова.

13.10.2015й.