بِسْمِ اللهِ الرَّحْمٰنِ الرَّحِيمِ

Ақсо ва Ғазо уруши ортида нима турибди?!

Доктор Муҳаммад Жилоний қаламига мансуб

Ахборот агентликлари Америка, Европа ва араб давлатларидаги расмийларнинг Фаластин масаласини буткул ҳал этиш учун тарихий имконият мавжудлиги, бу икки давлат ечими ҳақидаги америкача тасаввурга асосланган доимий ечим орқали амалга ошиши тўғрисидаги баёнотларини тарқатди. Шунингдек, Ҳамас ҳаракати сиёсий бўлими раиси Исмоил Ҳанийянинг Ғазодаги қаршилик ҳаракати ғалабасидан кейинги стратегик босқич ҳақида баёнот бергани ҳам хабар қилинди.

Шубҳасиз, Ақсода ёниб, Ғазода ловуллаб аланга олган уруш у ерда кўп фактлар мавжудлигини исботлади. Бу фактлардан асосийлари қуйидагича:

Фаластин ўзининг барча таркибий қисмлари билан ҳамон Ислом Уммати юрагида турибди…

Босқинчилик ҳар қанча чўзилмасин, Ақсони яҳудийлар учун ҳаргиз воз кечиб бўлмайди…

Уммат ўзининг ушбу тупроғи ва муқаддас даргоҳларини озод этиш йўлида молу жонини қурбон қилишга тайёр…

Мусулмон юртларидаги мавжуд режимлар ҳануз Уммат душманларининг, хусусан, Америка, Британия ва яҳудий вужудининг томонида турибди…

Яҳудий вужуди заиф вужуд бўлиб, у Умматнинг нафақат ҳақиқий урушига, ҳатто Ғазода қамал қилинган Уммат фарзандлари урушига ҳам дош беролмайди…

Биз бу фактларни тасалли ва ҳамдардлик учун келтирмаяпмиз, балки Америка ва Британиядан иборат иблисларнинг васвасасидан ҳамон қутулолмаётган ғарбпарастлар, алданганлар ва малайларга яна бир бор таъкидлаш учун айтяпмиз.

Айниқса, бу фактларни юзларида қўрқув аломати кўриниб турган кимсаларга эслатма ўрнида келтирмоқдамиз. Зеро улар мусулмон армияларнинг Уммат сафига ўтиб, Фаластинда Унга ёрдам кўрсатишидан ҳамда мустамлакачи кофир хизматига ўзларини ва ҳатто армияларини бағишлаган ҳукмдорлар тахтларини қулатишидан қўрқишмоқда.

Шунингдек, Ғазо ва Фаластиндаги мусулмонларнинг шаҳидлари ва берган қурбонларидан Байден, Мэркель ва Жонсон каби раҳбарларнинг кўрсатмаларини амалга оширишда фойдаланмоқчи бўлаётган кимсаларга ҳам эслатма сифатида келтиряпмиз. Зеро, бу раҳбарлар яҳудийларни Фаластинда бутун юрт қатлами, шу жумладан, қаршилик гуруҳлари ҳам тан оладиган давлат сифатида мустаҳкамлаш учун ҳозирги фурсат ҳар қачонгидан қулайдир, деб уқтиришмоқда. Оммавий ахборот воситаларида тарқалган хабарлар ҳеч кимга сир эмас. Уларда Мисрнинг сулҳни расман қабул қилгани, яҳудий вужуди бу сулҳ Миср таклифи билан уйғун ҳолда амалга оширилди, дея баёнот бергани, қаршилик ҳаракати ҳам сулҳ амалга ошиши йўлида кўрсатган хизматлари учун Мисрга ташаккур изҳор этгани айтилади.

Тўғри, гарчи Америка кўплаб масалаларни давлат департаменти орқали қўзғаса-да, бироқ сулҳ масаласига очиқдан-очиқ Мисрнинг ўзи аралашди ва Ҳамас расмийлари айтган, стратегик босқич чораларини кўрди… Аммо биз ушбу аралашув алоҳида аҳамият касб этганини ва унинг «стратегик босқич», деган нарсага тамоман мос равишда олиб борилганини таъкидламоқчимиз. Бунинг муҳим хусусиятлари шундаки, Миср худди шундай тажрибани 1973 йил бошдан кечирган. Ўшанда Миср армияси яҳудийлар устидан ажойиб ғалабани қўлга киритиб, уларни илдизи билан қўпориб ташлашига бир баҳя қолган эди. Бироқ сиёсий қопқонлар ва уларнинг овчилари ушбу ҳарбий ғалабадан бир мунча маккорроқ ва кучлироқ чиқди. Ҳақиқатдан ҳам, мақсад ҳарбий ғалаба бўлган эди ва бунга ҳеч ким шубҳа қилмаганди, Миср армияси бунга қодир эди. Бироқ «стратегик босқич», деган нарса пайдо бўлди. Буни Анвар Садат яҳудийлар билан сулҳ тузиш йўлига қадам босиб, «босқинчиларнинг Фаластинда ҳақлари бор»лигини тан олган пайтда тилга олди. У жумладан, «Мен урушда ғалаба қозонганим каби, тинчлик ўрнатишда ҳам ғалаба қозонишга ҳаққим бор», деган эди. Яъни, унга кўра, яҳудийларнинг Синайдан чиқиб кетишлари муқобилида улар билан тинчлик битимини имзолаш ҳам ғалаба бўлган!

Бугунги кунда Миср Ғазо ва муборак Ақсо уруши ортидан ташаббусни ўз қўлига олиб, кампанияга Американинг вакили сифатида етакчилик қилмоқда. Ҳеч кимга сир эмаски, Миср Уммат манфаатларидан ҳеч бирига риоя қилмайди. Шундай бўлгач, манфаат Фаластин, Ақсо ва Қуддусга бориб тақалган бир пайтда ундан нимани кутиш мумкин?! Бу давлат 1956 йил Савайш канали урушида Америкага орқа қилган ва уч томонлама ҳужумдан қутқаргани учун ўзини Америкадан қарздорман, деб ҳисоблайди. 1967 йил урушидан сўнг Миср «Rogers Plan» (Рожерс лойиҳаси)ни бозорга солишни бошлаган. Американинг айни лойиҳаси икки давлат ечимидан иборат бўлиб, унга кўра, яҳудий вужуди Фаластинни, Фаластин ҳам бу вужудни тан олиши керак. Кейин Миср 1974 йил Фаластин масаласини Фаластин Озодлик Ташкилотига топширди ва ниҳоят бу ташкилот яҳудийлар билан сулҳга киришиб, уни давлат деб тан олди, унга араб ва бошқа давлатлар ҳам эргашди. 1978 йил Садатнинг ўзи бу яҳудий вужудига бориб, уларнинг черковларини зиёрат қилди, Қуддусдаги яҳудийлар билан учрашиб, бу вужудни қонуний давлат сифатида эътироф этди. Мана шу ишлар билан Миср, унинг армияси ва барча кучлари яҳудий вужудига қарши жанг қилишдан воз кечган, ундан ўзини суғуриб олган бўлди. Шу орқали яҳудийларнинг чўқинтирилган отасига айланиб, Американинг таслим бўлиш ва Фаластинни расман яҳудийлар қўлига топшириш лойиҳасини амалга ошириш ишидаги даллоли бўлиб қолди. Мисрда сайланган президентга қарши ҳарбий тўнтариш қилиш орқали ҳокимиятга Сисий келди… У тахтга ўтиргандан бошлаб, яҳудий вужудини мустаҳкамлаш ва турли воситалар билан уни мудофаа қилишга бор кучини аямай сарфлаб келяпти.

Мана шуларнинг барчаси сабабли, Миср Сисий даврида ҳам, Ҳусни Муборак, Анвар Садат ва Абдуносирлар даврида ҳам хоинликни ўзига муносиб кўрди. Умматнинг мабдаи, муқаддас даргоҳлари, замини ва иззат-ҳурматини инкор этишни ўзига раво кўрди. Хиёнат Мисрнинг вужудигагина эмас, балки бутун ич-ичи ва қалбидан жой олди. Бинобарин, турли минбардагилар таъкидлашаётган бугунги стратегик босқич иши пок мусаффо нарсани нажас қўлларга топшириш ишидан ўзга нарса эмас. Зеро, Фаластин масаласи пок мусаффодир.

Фаластин иши Росулуллоҳ ﷺ Ақсо масжидига сайр қилган чоғдан бери пок мусаффодир…

Бу тупроққа Умар ибн Хаттоб розияллоҳу анҳу қадам босганидан бери пок мусаффодир…

Салоҳиддин Айюбий ифлос салибчилардан озод этгандан бери пок мусаффодир…

Музаффар Қутз бу юртдан йиртқич мўғулларни қувиб чиқаргандан бери пок мусаффодир…

Абдулҳамид нажас яҳудийларга бермай ҳимоя қилиб келгандан бери пок мусаффодир…

Унинг тупроқларида шаҳид Қассам ўлдирилгандан бери пок мусаффодир…

Фаластин масаласи Фаластиннинг Ғазо, Ладд, Яффа, Қуддус, Куфр Қосим, Дайр Ёсин, Жанин, Халил ва бошқа шаҳар ва қишлоқларининг бош масаласидир. Фаластин муборак замин бўлса, унинг аҳли работ-ҳимоячи халқдир. Демак, Фаластиннинг иши ҳам, масаласи ҳам, вазияти ҳам покиза мусаффодир. Бас, ҳеч қачон ва ҳеч бир шаклда унинг ишини, истиқболини ва масаласини хиёнатда ҳаддан ошган, малайлик қон-қонига сингиб кетган, мустамлакачи кофирга юракдан хизмат қилаётган кимсаларга ҳаргиз топшириб бўлмайди.

Миср режимининг аҳволи мана шудир. Шунингдек, бу айни режимдан ҳам паст бўлган ҳамда мустамлакачи кофир билан яҳудий вужудига кўпроқ малайлик қилаётган режимларнинг аҳволидир. Зотан, бутун араб ҳукмдорлари битта мақомда ўйнашяпти… ҳар бир зарарни ўзларига етадиган зарар деб ҳисоблашяпти, ўзлари истамаган ғалабанинг юз беришидан қўрқишяпти, яҳудий вужудининг мавжуд, барқарор туришини ўз тахтларининг барқарорлигига сабаб деб билишяпти. Шунинг учун улар Фаластинда ва ундан бошқа ерларда Уммат манфаатларига жонкуйдиришдан кўра, яҳудий вужудини қўриқлашга, уни тан олиш ва мустаҳкамлашга кўпроқ жонкуйдирадилар.

Шу ерда биз қатъий эслатиб ўтишимиз керакки, босқинчиликнинг ҳамда унга нисбатан қаршилик ҳаракатининг давом этиши, шунингдек, мусулмонлар қалбида Фаластин масаласи алангаси ўчмай сақланиб туриши ушбу масаланинг Америка, унинг малайлари, тобе ва гумашталари истагандек тугатилишидан кўра енгилроқдир. Бас, Фаластинни бутунича озод этишга бўлган Аллоҳнинг амрига қарши чиқаётган кимсалардан сақланинг… Сўз ўйини қилиб, босқинчилик тугашига чақираётган, аммо Фаластинни бирор қаричини қолдирмай озод этишга, яҳудийларнинг бутунлай супуриб ташлашга чақирмаётган кимсалардан эҳтиёт бўлинг. Сўнгги урушда мусулмонлар кўрсатган жасоратларга гувоҳ бўлдик. Улар яҳудийларни мағлубиятга учратишга қодир эканликларини кўрсатдилар… Мана шулар беҳуда гап сотувчиларнинг музокаралар сари ҳаракатланишига мутлақо ўрин қолдирмади. Чунки ҳар қандай музокара яҳудийларни – Ҳайфо маҳаллаларидан бирортасида бўлса ҳам – яна мустаҳкамланиб қолишига олиб боради.

Сўзимиз ниҳоясида шуни таъкидлаймизки, бугунги кунда Ислом Уммати Фаластин ва Ақсога нисбатан ўзининг ким эканини кўрсатди. У ҳали ҳам ўша-ўша яхшиликка бой, жиҳодни севувчи Умматдир. Ислом Уммати ўзини ёрдамсиз қўйган ва ҳалокат ёқасига олиб келган ҳукмдорларга нисбатан қилиши керак бўлган ишни қилади ва уларни тахтларидан йиқитиб, ўринларига Пайғамбарлик минҳожи асосидаги рошид халифани барпо этади.

﴿وَيَوْمَئِذٍ يَفْرَحُ الْمُؤْمِنُونَ * بِنَصْرِ اللَّهِ يَنصُرُ مَن يَشَاء وَهُوَ الْعَزِيزُ الرَّحِيمُ﴾

«Ўша кунда мўминлар Аллоҳнинг нусрати сабабли шодланурлар. (Аллоҳ) Ўзи хоҳлаган кишига нусрат берур. У қудрат ва раҳм-шафқат эгасидир» [Рум 4-5]

Роя газетасининг 2021 йил 26 май чоршанба кунги 340-сонидан