Ҳафталик муҳим воқеалар таҳлили

بسم الله الرحمن الرحيم
﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾

“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”

Хабар (МВ 10.03.2023й): Ҳиндистоннинг Уттаракханд штати, Бадлани қишлоғида жойлашган 438-мотоўқчилар полкида «Дўстлик-2023» ўзбек-ҳинд қўшма тактик-ўқув машғулотлари якунланди.
Изоҳ: Ҳиндистондек Ислом ва мусулмонларнинг ашаддий душмани бўлган давлат билан бундай машғулотлар 2019 йилдан бери ўтказиб келиняпти ва у ҳисоб бўйича тўртинчисидир. Ҳиндистондаги мусулмон аҳолини репрессия қилиб ўлдираётган, қамаётган, уйларини вайрон қилаётган, муслима аёлларни таҳқирлаётган… бутпараст ҳинд ҳукумати билан ҳарбий машғулотлар ўтказиш Ислом Умматига нисбатан улкан хиёнат ҳисобланади. Бундай машғулотлар иқтидордаги америкапараст бўлган ҳинд ҳукуматининг Марказий Осиёда Ҳиндистоннинг иштирокини кучайтириш бўйича қадамларидан биридир. Демакки, бу Американинг манфаатларига хизмат қилади. 
Хабар (UNICEF Uzb 09.03.2023й): Ўзбекистонда ўтказилган тадқиқотларга кўра, 18-19 ёшли ўсмир қизларнинг 37 фоизи эркак киши аёлини гап қайтаргани, овқат тагига олиб кетгани, кўчага сўроқсиз чиққани учун калтаклашини нормал ҳолат деб билади. UNICEFʼнинг асосий мақсадларидан бири бундай зарарли амалиётларга барҳам бериш ҳамда қизларнинг имкониятларини кенгайтиришдир.
Изоҳ: UNICEF, CEDAW конвенцияси кабилар мусулмон аёллар ва оилаларга суқилиб кириб, уларга яшашни ўргатиш, ҳуқуқларини ҳимоя қилиш баҳонасида юртимиз аёлларини бузиш ва оила инстутини барбод қилишга қаратилган лойиҳаларни йўлга қўйишга ҳаракат қиладилар. Улар Ғарб аёлларини бахтсиз қилгани, оилаларни барбод қилгани етмаганидек, энди мусулмон аёллар ва оилаларга кўз тикишяпти. Масалан, USA Today нашрининг ёзишича, Голливудда ишлаган аёлларнинг 94 фоизи жинсий зўравонликка учраган. АҚШда ҳар дақиқада 20 аёл оилавий зўравонликка дучор бўлади. Бу мамлакатда ҳар куни 1900 нафар қиз зўрланади. Бундан ташқари, ҳар йили бир миллионга яқин қиз аборт қилдиради. Булар “замонавий ва маданиятли” Ғарбнинг аянчли аҳволини кўрсатувчи улкан айсбергнинг кўриниб турган қисми холос. Шунинг учун ҳам мустамлакачи кофир давлатлар манфаатларига хизмат қиладиган бундай ғаразгўй ташкилотларни юртимиздаги аёллар ва оилаларнинг ишларига аралашишларига йўл қўймаслик зарур.   
Хабар (кун.уз 07.03.2023й): World Gold Council (WGC) маълумотларига кўра, Ўзбекистон Марказий Осиёда энг кўп олтин захирасига эга давлат ҳисобланади. 2022 йил ноябр ҳолатига Ўзбекистоннинг олтин захираси 397,2 тоннага тенг.
Изоҳ: Ўзбекистонда энг яшириладиган маълумотлардан бири бу қазиб олинган олтин билан боғлиқ бўлиб, у ушбу хабарда келтирилган олтин захираси миқдорида ўз аксини топиши керак. Шунга кўра, 1991-2016 йиллар оралиғини оладиган бўлсак – турли манбалар келтирган маълумотларга кўра – юртимизда йилига 100 тонна атрофида олтин қазиб олинган. Золим Каримов даврида бу маълумотлар қаттиқ сир тутилганлиги сабабли тахминан шу миқдорга кўра ҳисобланса, 2500 тонна атрофидаги олтин талон-тарож қилинган ва хорижий компанияларга бериб юборилган, деб гумон қилишга ҳақлимиз. Шунингдек, 2016 йилдан бери ҳам олтин ҳақидаги маълумотлар қисман очиқланганига қарамай, ҳамон бу мавзу ёпиқлигича қолмоқда. Олтин захираси миқдорида эса, эълон қилинган 2018 йилдан бошлаб катта ўзгаришлар бўлгани йўқ. Яна юқоридаги тахминга асосан 600 тонна олтин (2016-2022 йиллар оралиғида ҳар йили 100 тоннадан) агар сотилган бўлса унинг пули қаерга кетгани ҳақида ёки қанчадир миқдори қолган бўлса нега у олтин ёки валюта ва депозит захирасида акс этмаяпти, деган ўринли саволлар туғилади. Демакки, ҳар қандай ҳолатда ҳам шубҳа қилишга ҳаққимиз бор. 
Хабар (president.uz 09.03.2023й): Ўзбекистон президенти Шавкат Мирзиёев 9 март куни Жаҳон банкининг Европа ва Марказий Осиё минтақаси бўйича вице-президенти Анна Бьерде бошчилигидаги делегацияни қабул қилди.
Изоҳ: Хабарда таъкидланишича, кейинги йилларда қўшма лойиҳалар портфели сезиларли даражада кенгайиб, 10 миллиард доллардан ошган ва бу миқдорнинг ярми 2017 йилдан кейинга тўғри келган. Шунга кўра айтиш мумкинки, Мирзиёев бошқарувга келганидан бери Жаҳон банкидан олинган қарзлар каррасига ошиб кетган. Ушбу Жаҳон банки Халқаро валюта жамғармаси, Жаҳон савдо ташкилоти билан бирга халқаро даражадаги асосий молиявий ташкилотлар ҳисобланади ва бу учликни бемалол “иқтисодиёт қотиллари” дейишимиз мумкин. Чунки айнан мана шу учлик заиф давлатларни Америка сингари мустамлакачи кофир давлатларга қул қилиб бериш воситаларидан биридир. Жаҳон банкидан бўлган қарздорликнинг ортиши эса, ўзбек режимининг Америкага тобелигини орттиради. 
Хабар (gazeta.uz 11.03.2023й): 2023 йилда давлат активларини хусусийлаштириш Ўзбекистон давлат бюджетига 10 трлн сўм даромад келтиради, деб тахмин қилмоқда Иқтисодиёт ва молия вазирлиги. Бу олдинги йилги прогнозга нисбатан 66,6 фоизга кўп.
Изоҳ: Агар тухум туғиб турган товуқларни бирин-кетин сотиб юбораверсангиз охир-оқибат хонавайрон бўлишингиз аниқ. Тўғри, аввал товуқларни сотиш эвазига даромад оласиз, бироқ уни рўзғорга ишлатиб юборасиз, худдики товуғингиз аввалдан йўқ бўлгандек топган даромадингиз ҳавога учиб кетади. Агар товуқ боқишда озгина қийинчилик сезсангиз, агар ақли расо инсон бўлсангиз уларни сотмайсиз, балки озгина сабр қилиб уларни сақлаб қолиш ва кўпайтириш йўлларини излайсиз. Бироқ ўзбек ҳукумати ақлсиз одамни ишини қилиб “тухум туғиб турган товуқларини” сотиб еб юбориш йўлидан юрмоқда. Ушбу хабарда давлат мулкини хусусий қўлларга бериб юбориш ортидан фалон триллион даромад кўрамиз, деб буни оқламоқда. Бироқ бу даромад ҳам – агар бюджетга етиб борса – харажатлар ичида йўқ бўлиб кетади-да, давлат ўз мулкидан айрилгани қолади холос. Бундай калтабинлик капиталистик иқтисодиётни татбиқ қилишга ўч ҳукуматнинг кўр-кўрона сиёсати оқибатидир. Бундай иқтисодий сиёсат ҳали ҳеч бир давлатга фойда келтиргани йўқ, айниқса Исломий юртларга.

Ҳизб ут-Таҳрирнинг Ўзбекистондаги матбуот бўлими аъзоси Форуқ
13.03.2023й