Ҳафталик муҳим воқеалар таҳлили

بسم الله الرحمن الرحيم

﴿أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللهِ حُكْمًا لِقَوْمٍ يُوقِنُونَ﴾

“Динсизлик ҳукмрон бўлишини истайдиларми?! Имонлари комил бўлган қавм учун Аллоҳдан ҳам гўзалроқ ҳукм қилгувчи ким бор?!”

Хабар (qalampir.uz 01.11.2024й): Ўзбекистон рус тили бўйича халқаро ташкилотни таъсис этиш тўғрисидаги шартномани ратификация қилди. Бу ҳақдаги қонун Президент Шавкат Мирзиёев томонидан тасдиқланди.

Изоҳ: Маълумки, 8 октябр куни Москвада бўлиб ўтган МДҲ Давлат раҳбарлари кенгашида Россия Президенти Владимир Путин МДҲнинг барча давлатлари Халқаро рус тили ташкилотини ташкил этиш тўғрисидаги шартномани тез орада ратификация қилишини кутаётганини айтганди. Мана, орадан ҳеч қанча вақт ўтмай Мирзиёев мазкур шартномани ратификация қилишга имзо чекмоқда. Ваҳоланки, рус тили ташкилотини ташкил қилиш ҳақидаги таклиф 2023 йилнинг октябр ойида бўлиб ўтган МДҲ саммитида билдирилган эди. Бироқ орадан бир йил вақт ўтса ҳамки Ўзбекистон уни ратификация қилмади ва бу Россия томонининг ғашига теккан кўринади. Шунинг учун бу йилги МДҲ саммитида Путин бошқа давлатлар қатори Ўзбекистонга ҳам тушунарли тарзда ишора қилди. Албатта, рус тили ташкилоти фақат Россия манфаатига хизмат қилади ҳамда биз мусулмонларга рус миллатининг дунёқараш ва сақофатини тиқиштиришнинг бир воситаси ҳисобланади. Россиянинг бу масалада қаттиқ тургани ҳам бежизга эмас. У мана шундай лойиҳалар орқали минтақадаги ўз таъсири ва нуфузини сақлаб қолишга интиляпти. Агар МОдаги мусулмон юртлар бошлиқлари озгина журъатли бўлганларида эди, Россиянинг бугунги оғир аҳволидан фойдаланиб, унинг таъсиридан қутулишнинг кафолатли йўлини топган бўлардилар. Бундай кафолатли ютуққа эришиш эса минтақа мусулмонларининг  Исломга бўлган интилиш ва қаноатларини инобатга олган ҳолда сиёсат юритиб, халқ ишончи ва қувватловини қўлга киритиш билангина амалга ошади.  

Хабар (gov.uz 04.11.2024й): 4 ноябрь куни Бош вазир Абдулла Арипов Шанхай шаҳрида хитойлик мавқедоши Ли Цян билан учрашди.

Изоҳ: Маълум қилинишича, шу куни Атом энергияси агентлиги директори Азим Ахмедхаджаев Шанхайдаги ЭКСПО кўргазмаси доирасида China National Nuclear Corporation Overseas (CNOS, China National Nuclear Coorporation – CNNC’нинг шуъба корхонаси) бош директори Веи Фуки билан учрашган. “Ўзатом” агентлиги қошидаги АЭС қурилиши дирекцияси директори Отабек Аманов кичик АЭС қурилиши ҳақида шундай деган эди: “Атом станцияси иккита йирик компонентдан иборат – бу ядро ороли ва ёрдамчи объект. Ядровий оролни, табиийки, бош пудратчимиз “Атомстройэкспорт” (“Росатом”) билан реализация қиламиз. Ёрдамчи объект халқаро компаниялар иштироки билан халқаро лойиҳа бўлиши учун қандайдир тарзда бирлаштирмоқчимиз. Ҳозир вариантлар устида ишламоқдамиз”. Қайд этиш жоизки, ушбу вариантлар қаторида Америка ва Жанубий Корея компаниялари ҳам бор. Афтидан, Россия Ўзбекистонда кичик АЭС қурилишига Хитойни қизиқтирмоқчи шекилли. Бу, биринчи навбатда, кичик АЭС қурилишини молиялаштириш билан боғлиққа ўхшайди. Чунки Россия ҳам, Ўзбекистон ҳам ушбу лойиҳани ўз маблағлари ҳисобига амалга ошира олиши қийин масала. Гарчи лойиҳа қиймати ошкор қилинмаётган бўлса-да, у бир неча миллиард долларни ташкил қилиши ҳақида тахминлар бор. Аслини олганда, бундай қиммат ва қанчалик самарадор бўлиши ноаниқ бўлган лойиҳа, айниқса ҳозир Ўзбекистонга ортиқчалик қилади. Бироқ буни унга Россия тиқиштирди. Ўзбек ҳукумати ўзининг мустақил қарорига эга эмаслиги ўз халқи манфаатини кўзлаб эмас, балки ўрисни рози қилиш учун нотўғри қарорлар қабул қилишига олиб боряпти. Юртимизда Исломий бошқарувнинг ҳокимият тепасига келишигина мана шундай нотўғри қарорларга буткул барҳам беради.

Хабар (gazeta.uz 04.11.2024й): Ўзбекистон ЖСТга аъзо бўлиш бўйича АҚШ билан икки томонлама музокараларни якунлади.

Изоҳ: Президентнинг ЖСТ бўйича махсус вакили Азизбек Уруновнинг айтишича, музокаралар 14 ой давом этган. “Бу осон бўлмаган йўл, умр бўйи эсда қоладиган тажриба бўлди”, – деб таъкидлади у. Унинг бу сўзлари гўё улкан муваффақиятга эришган инсоннинг сўзларидек янграмоқда. Гўё юртимизнинг юксалиш сари қадам ташлаш онлари келгандек гапирмоқда. Бироқ ақли расо инсонлар биладики, ЖСТга аъзолик иқтисодимизни йирик хорижий компаниялар қўлига қўшқўллаб топширишни англатади. Биз аввалдан бу ҳақда огоҳлантириб келяпмиз. Жумладан, бу ташкилот Ғарбдаги мустамлакачи давлатлар, айниқса, Америка манфаатлари учун хизмат қилишини айтганмиз. Ўзбекистон ЖСТга аъзо бўлишда эришадиган бор-йўқ нарсаси – кофир мустамлакачи давлатлар учун арзон хом-ашё базаси ва уларнинг товарлари учун истеъмолчи давлат сифатида қолишидир. Буни айрим маҳаллий тадбиркорлар ҳам англаб турибди. Улар ўзларининг видео чиқишларида ушбу ташкилотга аъзолик асосан ривожланган давлатларнинг йирик компанияларига улкан фойдалар келтириши ва маҳаллий тадбиркорларни касодга учрашига сабаб бўлиши ҳақидаги хавотирларини билдирганлар. Шунингдек, Ўзбекистондан олдин Қирғизистоннинг аъзо бўлганига 25 йил, Тожикистонникига эса 11 йил бўлган бўлса-да, бу аъзолик уларга ҳеч қандай муваффақият келтирмади. Чунки улар ҳозирги кунда қулоғигача қарзга ботган, иқтисоди абгор аҳволда, аҳолиси чет элларда қора ишчи бўлиб сарсон-саргардонликда кун кечирмоқда ва ҳоказо. Бир сўз билан айтганда, ҳақиқий ютуқ кофир мустамлакачи давлатларнинг тузоғига илиниш эмас, балки ундан қутулишдир. Яқинда тикланажак Халифалик давлати  мустамлакачиликнинг ҳар қандай тузоқлари билан бирга илдизи билан қўпориб ташлайди иншаАллоҳ!

Хабар (president.uz 06.11.2024й): Шавкат Мирзиёев Дональд Трампга АҚШ президентлик сайловидаги ғалабаси билан табрик йўллади. Давлат раҳбари унинг даврида Ўзбекистон ва АҚШ ўртасидаги шерикликнинг янги даври бошланганини эслаб, Трампни Ўзбекистонга таклиф қилди. «Дўстона алоқаларни изчил давом эттиришдан манфаатдормиз», – деди у.

Изоҳ: Дунёнинг кўплаб ерларида мусулмонлар қирғинбарот қилинаётган ёки турли тазйиқларга дучор бўлаётган бўлса, ўша ерда сўзсиз Американинг бевосита ёки билвосита иштироки бор. Мана, Ғазода, Муборак Фаластин заминида лаънати яҳуд режими мусулмонларни ёши ва жинсини эътиборга олмай оммавий қирғин қилаётганига ҳам бир йилдан ўтди. Америка уни сўнгги русумдаги қирғинбарот қуроллари билан узлуксиз таъминлаб келяпти. Уруш бошланганидан буён 40 мингдан ортиқ мусулмон шаҳид кетди, 100 мингдан ортиғи майиб-мажруҳ бўлди, Ғазо ер билан яксон қилинди… Энг ачинарлиси, қурбонларнинг аксари болалар ва аёллардир. Қотил Америка мусулмонлар қадр-қимматига тупуриб ташлагани ойдек равшан, чунки у эътиқодан Ислом ва мусулмонларга душмандир. Зотан, бугун ҳам, тарихда бўлганидек, мусулмонларга қарши салибчилик юриши давом этмоқда. Американинг янги сайланган президенти Дональд Трамп яҳудларнинг ашаддий ҳимоячиси экани билан машҳур. Айнан у Қуддусни (Исроил) пойтахти деб тан олган эди. Мирзиёев эса яҳудлар ҳимоячиси бўлмиш Трампни “Муҳтарам Трамп Жаноби Олийлари!” деб улуғлаб табриклаши мустамлакачи душман олдида ўзини хор тутиш ва унга қуллуқ қилишдан бошқа нарса эмас. Бугун Ислом уммати Абу Бакр, Умар, Усмон, Али (Аллоҳ улардан рози бўлсин) каби мўминларга тавозели, кофирларга қаттиққўл бўлган рошид халифаларини қўмсамоқда. Чунки Умматнинг қони, моли, шаъни ва ор-номусини фақатгина халифа тўлақонли ҳимоя қилади! Пайғамбаримиз ﷺ дедилар: “Имом-халифа қалқондир, унинг ортида туриб жанг қилинади ва у билан ҳимояланилади”.

Хабар (qalampir.uz 06.11.2024й): Туркия Республикаси Президенти Ражаб Тойиб Эрдўған 6 ноябрь куни Бишкекдаги Туркий давлатлар ташкилоти 11-саммитида туркий давлатларнинг умумий алифбоси нақадар муҳимлиги ҳақида сўз юритди.

Изоҳ: ТДТнинг 11-саммитида Эрдоған, жумладан, шундай деди: “Агар биз Туркий давлатлар ташкилоти доирасида ҳамкорлик қилсак, ўзгариш зарур деб ҳисоблайман. Туркия, Озарбайжон, Шимолий Кипр ягона турк алифбосига ўтишга тайёр. Биз Қозоғистон, Қирғизистон, Ўзбекистон ва Туркманистон қарорларини кутмоқдамиз”. ТДТ Америка манфаатларига хизмат қиладиган ташкилот эканига асло шубҳа йўқ. Унинг ташаббускори Америка қувватлови билан иқтидорга келган Эрдоған эканлиги ҳам буни тасдиқламоқда. Америка ушбу ташкилотни жонлантириш орқали МО давлатларини Россия ва Хитой мустамлакачилигидан узоқлатиб, ўз таъсир доирасига киритишни режа қилмоқда. Энди умумий турк алифбоси масаласига келсак, МОда ҳали ҳам кучли таъсирга эга бўлиб турган рус тили ва алифбоси, хусусан, кирилл ёзувига қарши ишлаб чиқилган лойиҳадир. Бундай кураш сақофий кураш жумласига киради. Бироқ ТДТ ташкилоти ҳам, у илгари сураётган умумий турк алифбоси деган нарса ҳам мусулмонларнинг чин маънода бирлашишларига олиб бормайди. Аксинча, уларнинг миллатчилик асосида бўлинишига олиб келади холос. Чунки ТДТ пантуркизм миллатчилиги асосида бирлашишни илгари суради. Шунингдек, ушбу ташкилот кофир мустамлакачилар чизиб берган сохта чегараларни бекор ҳам қилолмайди. Бирлаштирувчи омил сифатида қаралаётган турк алифбоси ўрнига эса бошқа энг тўғри ва энг ишончли йўл бор. У ҳам бўлса араб тили ва алифбосидир. Зеро, Қуръон араб тилида нозил бўлган. Асрлар давомида мусулмонларнинг ўзаро мулоқот тили сифатида айнан араб тили асос вазифасини ўтаб келган. Араб тили мусулмонлар учун умумий мулоқот тили бўлишга ва Ислом сақофатини ўрганишга ҳар томонлама лойиқ бўлган ягона тилдир. Халифалик давлати тиклангандан сўнг бунинг амалий воқелигини кўрамиз иншаАллоҳ!

Хабар (kun.uz 07.11.2024й): «Ўзбекистон ва Европа илгари мисли кўрилмаган даражада бир-бирига яқинлашди» — деди Еврокомиссия президенти Урсула фон дер Ляйен «Ўзбекистонда Европа иқтисодиёти кунлари» бизнес-форумининг очилиш маросимидаги видеомурожаатида.

Изоҳ: Хабарда айтилишича, Еврокомиссия президенти Урсула фон дер Ляйен видеомурожаатда сўнгги йилларда Европа Иттифоқи ва Ўзбекистон томонидан йўлга қўйилган ҳамкорликнинг 3 та асосий йўналишига тўхталиб ўтди. Биринчиси савдога оид, иккинчиси инвестициялар соҳасида, учинчиси стратегик соҳалардаги ҳамкорлик. Буларнинг мазмуни асосан логистика, яъни МОни Европа билан боғловчи Транскаспий йўлаги ва муҳим минералларни етказиб беришдан иборат. Урсула фон дер Ляйен сўзларига кўра, Транскаспий йўлагига 10 миллиард еврогача инвестиция киритиляпти. Ва бу йўлак Европа ва Марказий Осиёни 15 кундан камроқ вақт ичида боғлашга имкон беради. Бундан ташқари, у “Ўзбекистон қитъаларимиз чорраҳасида жойлашган ва глобал алоқаларимиз марказида бўлиши лозим” деди. Урсуланинг шахсан видеомурожаат қилиши ва сўзлари Ўзбекистон учун геосиёсий кураш авжига чиқаётганига далолат қилади. Бироқ  мустамлакачиларнинг бу курашлари Ўзбекистон ва МОнинг бошқа мусулмон халқларини шундоқ ҳам танг бўлиб турган сиёсий-иқтисодий аҳволларини ўнгламаслиги аниқ. Чунки мустамлакачиликнинг табиатида ўзгаларнинг ҳисобига бойлик орттириш ётади. Маълумки, Европа иттифоқи таркибидаги бир қанча давлатларнинг тарихи мустамлакачилик билан бевосита алоқадор. Иттифоқ етакчиси Франция ҳозир ҳам маълум даражада ўз мустамлакаларига эга. Шу эътибордан ушбу иттифоқнинг МО минтақаси, хусусан, Ўзбекистон борасида ғараз ниятлари борлигига асло шубҳа йўқ. Мустамлакачиликдан қутулишнинг ягона йўли эса Исломий бошқарувни ҳокимият тепасига олиб келишдир.

Ҳизб ут-Таҳрир Ўзбекистон матбуот бўлими аъзоси Форуқ

11.11.2024й