Ажнабий ҳарбий кучларнинг исломий юртларда мавжуд бўлиб туриши ва халқаро курашдаги роли
بِسْمِ اللَّـهِ الرَّحْمَـٰنِ الرَّحِيمِ
Роя газетаси:
Ажнабий ҳарбий кучларнинг исломий юртларда мавжуд бўлиб туриши ва халқаро курашдаги роли
Асъад Мансур қаламига мансуб
Аввало – Британия каби соғлиги оғирлашган қариянинг ҳаёти тикланиши мумкинми, деган саволни ўртага ташласак. Хусусан, у бир ёмон макр тўрини тўқиб, сўнг Европа Иттифоқида қолиш-қолмасликка доир референдум ўтказиш билан бу тўрга ўзи илинганидан ҳамда ўзининг халқаро мавқеига путур етказиб, иқтидори ва донишлигига ишончсизлик пайдо қилгандан сўнг бундай савол ўринлидир! Авзоидан нақадар ориқлашиб кетгани, чўкаётган киши чўпга осилишга уринаётгани каби ҳаракат қилаётгани шундоқ аён бўлиб турибди!
Британия 45 йил муқаддам Шарқий Сувайсдан чиқиб кетишини эълон қилди. Бу унинг Форс Кўрфазида туриш харажатларини тўлай олмай қолиб, у ердан чиқиб кетганини англатади. Негаки у қариб, «туғмас» бўлиб қолди, жуда оз маош билан нафақага чиқарилди, яъни АҚШнинг янги мустамлакачилик довулида ювилиб кетган ўзининг қадимги мустамлака юртларида бир озгина нуфузи қолди. Агар бу давлатнинг нопок маккорлиги ва анча-мунча малайлари сақланиб қолмаганда эди, тарихда аллақачон тенгдоши Голландия қаторидан жой олган бўларди.
Бу давлат бугун яна ҳарбий кийимни кийиб, минтақани қайта босиб олишга уриниб келяпти. Ана, бош вазири Мэй, Форс Кўрфази ва Баҳрайн давлатлари конференциясига бориб, 2016 йил 7 декабр куни йирик давлатлар билан «ҳамкорлик қилиш» қарорини очиқлади, «Форс Кўрфази хавфсизлиги, Британ хавфсизлиги» эканини билдирди ва ҳамкор душманини, яъни АҚШнинг минтақадаги «қўл»и бўлган Эронга қарата, «менинг кўзларим мошдак очиқ, Эроннинг Форс Кўрфази ва Ўрта Шарққа бўлган кенг кўламли таҳдидларини кўриб турибман», деди, «Эроннинг – хоҳ Ливан, Яман, Сурия ва Форс кўрфази бўлсин – минтақадаги душманона хатти-ҳаракатларини тўхтатиш устида биргаликда ишлаш»га ваъда берди. Исломий юртларга бурнини суқиш ва Исломга қарши курашиш ниқоби сифатида «терроризм»га қарши кураш деган олабўжи ҳақида гапиришни ҳам унутмай, «Британия билан Форс Кўрфази давлатлари ўртасидаги ҳамкорлик, кўпгина соҳаларда, энг аввало, мудофаа ва терроризмга қарши курашда шаҳдам қадамни шоҳиди бўлади», деди.
Сўнг ўзининг биринчи ҳарбий денгиз базаси бўлган ҳамда 2015 йил октябрда Манама яқинидаги Салмон портида қуришни бошлаган «Баҳрайндаги денгиз базасини қайта кенгайтириш»га қарор қилганини билдирди. Кўрфаздаги ўз хавфсизлик ўрнини мустаҳкамлаш йўлида битим муддатини узайтиришга 3 миллиард фунт стерлинг ажратганини очиқлади. Хусусан, Европа Иттифоқида кўрган зиёни ортидан Британия учун айни минтақа энг муҳим иқтисодий альтернатив ҳисобланади. Зеро, Форс Кўрфази минтақаси Европа Иттифоқининг савдо ҳамкори бўлиб, уларнинг ўзаро йиллик савдо айланмаси қиймати 140 миллиард долларни ташкил қилади. Ҳозирда Британия кўрфазликларнинг эртага Трамп ҳокимиятга келса, биздан тортиб олиши мумкин, дея чўчишларидан қулай имконият сифатида фойдаланмоқчи бўляпти.
Британ ташқи ишлар вазири Борис Жонсон 2016 йил 9 декабрда Баҳрайнда туриб, Британиянинг эски мустамлакачилигини қайтариш ниятини очиқлар экан, жумладан, «Британия Шарқий Сувайсга қайтди ва эски дўстлигини мустаҳкамлайди», деди. Сўнг юзсизларча мақтаниб, «Британия ўтган икки юз йил мобайнида тарихингизнинг бир бўлаги бўлган ва келажак асрларда яна шундай бўлиб қолади», деган сўзлари билан кўрфазликлар юртининг Британия мустамлакаси, улар эса малайлари эканига ишора қилди.
Фақат шахсий ва оилавий манфаатларига ўч бўлган кўрфазлик ҳукмдорлар Британ ташқи ишлар вазирини қарсаклар билан олқишлашмоқда! Чунки улар мустамлакага ўрганиб қолганлар, ўз оилавий меросхўрликларидан ва юртни талон-тарож қилишларидан ажраб қолмаслик учун мустамлакасиз яшай олмайдилар. Шу боис Жонсон уларга миннат қилмоқда: уларнинг боболари малайликка тайёр бўлган пайтда, юртлари Британ мустамлакаси остида бўлганини, боболарини сотиб олгач, улар Халифалик давлатига хиёнат қилишганини, бу хиёнат ўн саккизинчи аср охирларида ваҳҳобийлар билан келишиб олган Оли Саудлар ҳаракати пайтидан бошланганини, ўшандан бери уларнинг оилалари Британияга итоатгўй хизматчилар сифатида оилавий меросхўрликни сақлаб келишаётганини миннат қилмоқда.
Трамп ҳам худди шундай миннат қилди. 2016 йил 19 августда ўзининг сайловолди кампаниясида «Саудия яқинда улкан муаммолар остида қолади ва бизнинг ёрдамимизга муҳтож бўлади, агар биз бўлмаганимизда, бу юрт ҳам бўлмасди, тирик қолмасди», деди. «Саудия йирик давлат, биздан олаётган сиёсий ва хавфсизлик қўллаб-қувватлови учун бизга маблағ тўлаши керак», деди. Бу билан муҳтож давлатларни АҚШ қўллови учун сиёсий жиҳатдан очиқдан-очиқ провокация қилди.
Бу муҳтож давлатлар ўзларининг сиёсий ва хавфсизлик қўллаб-қувватловини ичкаридан Умматдан олмадилар, балки хориждан олдилар. Чунки улар мустамлакачи давлат воситасида Умматдан ўз ҳукмронлигини ўғирлаб олишди. Мустамлакачининг қўллаб-қувватловидан миннатдор бўлиб, бунинг эвазига унинг Уммат бойликларини ўғирлашга ҳақли деб билишди, ўз тақдирларини ўша мустамлакачи тақдирига боғлаб, ҳокимиятпарастлик йўлида шу мустамлакачи нимани истаса, лаббай деб бажаришди. Шунинг учун ҳам Баҳрайн амири ўз хўжайини Британиянинг минтақага қайтаётганидан мамнунлик билдириб, «Форс Кўрфази Ҳамкорлик Кенгаши билан Британия ўртасидаги стратегик ҳамкорлик ўзаро алоқаларда ташланган шаҳдам қадамдир», деган сўзларни айтди. Бир вақтнинг ўзида, АҚШ Баҳрайн амири устидан Эрон ва унинг тобеларини ҳукмрон қилиб қўйиб, шулар орқали унинг олдида муаммолар туғдириб келмоқда. Буни у ё инглизларга малайлик қилишни бас қилади, ёки тахтдан воз кечади, деган умидда қилди. Ваҳоланки, амир оиласи Британия кўрсатмаси асосида 1971 йил АҚШга Жуффайрдаги иккита ҳарбий денгиз базасини берганди. Илгари Британияга қарашли бўлган айни базаларни Британия – зора, АҚШ қирол оиласига қилаётган ёмонликларини бас қилиб, уни инглизпарастлик бошқарувига қўйиб берса, деган умидда берганди. Америка эса бу икки базадан 2003 йил Ироқни вайрон қилиш ва босиб олишда фойдаланди.
АҚШнинг Саудияда ҳам, у ердан аксар аскарларини Қатарга олиб чиқиб кетган бўлса-да, пойтахт Риёздаги Султон авиобазаси ичида – ўз базаси бор. Уммонда ҳам АҚШнинг авиобазаси бор. У ерда «ВИ-1» бомбардимончи учоқлари жойлашган. Бирлашган Араб Амирликларида ҳам ҳаво базаси бор. Бу база иккита муҳим порт орқали АҚШнинг йирик кемаларига моддий-техник хизмат кўрсатишга ихтисослашган. АҚШ Ироқ ҳарбий базаларида ҳам мавжуд бўлиб турибди ва у ерлардан ИШИД ташкилотига қарши кураш ниқоби остида доимий фойдаланиб келмоқда. Шунингдек, Иорданияда ҳам иккита ҳарбий базаси бор бўлиб, улар Рувайшид ва Водий Мурабба базаларидир. Яманда битта Анад базаси бор. Жибутида эса Американинг Лемонер базаси бўлиб, икки давлатнинг Африка қитъасидаги ҳамкорлик қароргоҳига айланган.
Британия ҳарбий базалар очиш орқали ўз нуфузини мустаҳкамлашни ва АҚШга қарши зимдан кураш олиб боришнинг бир услуби сифатида стратегик битимлар имзолашни истамоқда. Бироқ у ҳар қанча қудратли бўлмасин, Американи минтақадан чиқариб ташлаш асло қўлидан келмайди. Ҳолбуки, ожиз бўлиб қолган пайтда АҚШнинг минтақага киришига унинг ўзи йўл қўйган, Американинг ҳарбий базалар очишига рухсат бериш билан унинг ҳарбий эҳтиёжларини қондиришни ўз малайларидан талаб қилган, бунинг эвазига АҚШ уларнинг менга мойилликларига сукут қилса бас, деб ҳисоблаган. Ахир, бу малайларнинг бутун борлиқлари ва молиявий империалари асосчиси мана шу Британия бўлади. Бироқ бу шундай бир ёвузлик аломатидирки, минтақани доим халқаро кураш исканжасидан чиқармайди.
Хулас, Америка нуфузини чиқариб юборишга на Британия қодир, на унинг тобелари. Шунинг учун Баҳрайн ташқи ишлар вазири Холид Оли Халифа бундай деди: «Мустаҳкам ва кенгқамровли стратегик ҳамкорлик Американинг минтақадан чиқиб кетишига раддия ҳам эмас, унинг ўрнини бу эгаллашига ишора ҳам эмас». Якуний баёнотда келган «Қўшма Штатлар билан тарихий ва стратегик муносабатларни мустаҳкамлаш», деган ибора буни исботлаб турибди. Демак, Британиянинг Америкага қарши курашишга кучи етмайди ва у уч томонлама агрессия (Сувайс кризиси)дан бошлаб, АҚШга қарши курашиш сиёсатигача ҳаммасидан ҳам воз кечган. Ҳозир у зоҳирда ўзини Америка билан бирга ҳаракат қилаётган қилиб кўрсатиш, зимдан эса унга қарши ҳаракат қилиш сиёсатини қўлламоқда.
Шундай қилиб, юртларимизда АҚШ, Британия ва бошқа давлатларнинг ажнабий базаларининг бўлиши шунга далолат қиладики, демак, ҳамон мустамлакачилик мавжуддир, юртлар устидан халқаро кучлар кураши кетмоқда, бу базалар Умматнинг озодлик курашига қарши уруш бошлаш марказлари ҳисобланиб, Уммат ва унинг тақдирига жиддий хавф туғдирмоқда. Шунинг учун бу базаларни илдизи билан қўпориб ташламоқ лозим. Бу эса ўша базалар очилишига йўл қўйган малай режимларни ҳам, кофирларни дўст тутувчи мунофиқлар жинсидан бўлган ва турли баҳоналар келтираётган малайларни ҳам ағдариш билан амалга ошади. Улар тўқиб чиқарган бу баҳоналар эса Росулуллоҳ САВнинг замоналаридан буён маълум бўлиб, Роббимиз фикр, сиёсат ва қонунчилик манбаи бўлмиш Ўзининг Қуръони Каримида ҳам фош этган.
Роя газетасининг 2016 йил 28 декабр чоршанба кунги 110-сонидан
