بِسْمِ اللَّـهِ الرَّحْمَـٰنِ الرَّحِيمِ

Роя газетаси:

Фаластин аҳли азоб-уқубатлари бутун Фаластин озод этилмагунча бартараф бўлмайди

Ливандаги фаластинликлар яшовчи Наҳрул Борид жамлоғини қайта қуриш учун қўшимча 36 миллион доллар ажратилди

Ливандаги фаластинликлар яшовчи Наҳрул Борид жамлоғини қайта қуриш масаласини муҳокама қилиш учун Байрутда донор давлатлар анжумани бўлиб ўтди. Ливан бош вазири Таммом Салом раислик қилган анжуманда БМТ ва халқаро ҳамжамият вакиллари, донор давлатлар элчилари қатнашди. Анжумандан Наҳрул Борид жамлоғининг вайрон бўлганига ўн йил ўтганига қарамай, у ердан қочиб чиққан фаластинликлар ҳамон машаққат чекишаётганини бутун дунёга эшиттириш мақсад қилингани айтилди.

Анжуман қатнашчилари айни масалани қандай ҳал қилишни муҳокама қилиб, бир неча давлатларнинг ҳисса қўшишлари орқали қўшимча 36 миллион АҚШ доллари миқдорида маблағ йиғишга қарор қилишди. Ҳисса қўшган давлатлардан Германия (15 миллион), Европа Иттифоқи (12 миллион), Италия (1.25 миллион) берадиган бўлди. Бу билан 904 оила жамлоққа қайтиш имконига эга бўлади ҳамда 189та савдо дўконини қуришга муваффақ бўлинади.

Мана шундай маблағ йиғиш орқали 72 қочқин оила ўз уйларига қайтишга муваффақ бўлади. Айни доирада UNRWA Ливан ҳукумати ва донор давлатлар билан ҳамкорликда Наҳрул Борид жамлоғини қайта қуриш лойиҳасини тўла битказишга ҳаракат қилмоқда.

Анжуманда Ливан бош вазири Таммом Салом, Ливан-Фаластин мулоқоти қўмитаси раиси Ҳасан Манимама, БМТнинг Ливандаги махсус мувофиқлаштирувчиси Сигрид Кааг, БМТнинг фаластинлик қочқинларга ёрдам бериш ва ишларни ташкил этиш бўйича Яқин Шарқ агентлиги (UNRWA) бош комиссари Пьер Кренбюль, Фаластин делегацияси, уларга ҳамроҳ сифатида Фатҳ ҳаракати қўмитаси аъзоси Изом Аҳмад Фаластиннинг Ливандаги элчиси Ашраф Дабур, Фатҳ ҳаракати билан Фаластин Озодлик ташкилоти гуруҳларининг котиби Фатҳи Абу Ардод кабилар иштирок этди.

Ҳозирда 2264 оила (яъни қочқинларнинг тенг ярми) уйларининг қайта қурилишини кутмоқда. Маълумки, керакли молиялаштиришнинг етишмаётгани сабабли уларнинг аксар қисми жуда ачинарли аҳволда кун кечирмоқда.

Бугунга қадар турли ҳадялар эвазига жамлоқни қайта қуриш лойиҳасининг 50 %и қуриб битказилди. Агар бугунги молиялаштиришга ишонилса, 2670 оила (яъни 11062 шахс ёки қочқинларнинг 54 %и) 2017 йил ярмига қадар қурилиши белгиланган уйларга қайтишлари кутилмоқда. Лекин шунга қарамай, халқаро ҳамжамият қарор қилган асосий вазифаларни амалга ошириш учун қўшимча саъй-ҳаракатларга эҳтиёж сезилмоқда. (Ахборул Халиж).

Роя газетасининг 2016 йил 11 октябр чоршанба кунги 99-сонидан