Роя газетаси:

Франция Фаластин масаласида ўз таъсирига эга бўлишга уринмоқда

Франция Фаластин давлатини тан олишини билдирмоқда

Ўтган жума куни Франция ташқи ишлар вазири Лоран Фабиус «исроилликлар» билан фаластинликлар ўртасидаги совуқ ҳолатга чек қўйишга оид яқин ҳафталар мабайнида амалга оширилиши кутилаётган саъй-ҳаракатлар муваффақиятсиз чиқгудек бўлса, унинг юрти Фаластин давлатини тан олмоқчи эканини билдирди. Фабиус агар мавжуд вазиятни шундай давом этаверишига йўл қўйиладиган бўлса, иккита давлат, деган ечимнинг барбод бўлиши, бу эса ИШИД ташкилоти фойдасига хизмат қилиши таҳдидидан қайта-қайта огоҳлантирди. Хорижий дипломатларнинг йиллик учрашуви чоғида Фабиус «Биз иккита давлат, деган ечимнинг барбод бўлишига йўл қўймаймиз. Бунга Хавфсизлик Кенгаши аъзоси сифатида ҳамда тинчлик учун курашувчи куч сифатида жавобгармиз», деди. Бундан олдин Фабиус Араб давлатлари, Европа Иттифоқи давлатлари ва Хавфсизлик Кенгашига аъзо давлатларни ўз ичига олган ҳамда ҳар икки томонни асосий турда ён беришга мажбурлайдиган бир халқаро ишчи гуруҳни ташкил қилишга чақириқ билан чиққан эди. Фабиусга кўра, Париж бир неча ҳафталар ичида томонларни ҳамда америкалик, европалик ва араблардан иборат асосий иштирокчиларни жамлаш учун халқаро конференция ўтказишга тайёргарликни бошлаб юборади. Кейин Фабиус иккита давлат, деган ечимга эришиш йўлидаги ушбу сўнгги уриниш муваффақиятсизликка учраган тақдирда, нима қилмоқчи эканини, «Яхши… бундай ҳолатда биз Фаластин давлатини тан олиш билан ўз жавобгарлигимизни тушунишимизга тўғри келади», дея изоҳлади. Бир француз дипломат манбаси конференцияни ёз фасли келмасидан олдин бошлаш мақсад қилинганини, айни конференция муваффақиятсизликка юз тутиши муқаррар бўлган Хавфсизлик Кенгаши қарорига ҳаргиз таянмаслигини таъкидлади. Бундан олдин «Исроил» бош вазири Биньямин Нетаньяху сўнгги пайтларда кўринаётган Франция ташаббусларини танқид қилиб, уни «конструктив эмас», дея баҳолаган эди. (Арабийя нет).

Роя газетасининг 2016 йил 3 феврал чоршанба кунги 63-сонидан