Хиёнаткор режимлардан яхшилик кутиб бўлмайди

2026 йил 5–6 октябрь кунлари Марокаш–Амирликлар қўшма ҳарбий қўмитасининг учинчи йиғилиши бўлиб ўтди. Йиғилишнинг якуний мажлисига Марокаш Қироллик Қуролли Кучлари Бош инспектори ва Бирлашган Араб Амирликлари Қуролли Кучлари Бош штаби бошлиғи ҳамкорликда раислик қилдилар. Икки масъул мамлакатлар ўртасидаги ҳарбий ҳамкорлик эришган даражани, айниқса, ҳарбий салоҳиятни ривожлантириш, мудофаа саноати, ҳарбий тайёргарлик, шунингдек, тажриба ва билим алмашиш соҳаларидаги ҳамкорликни юқори баҳоладилар. Шунингдек, улар ушбу ҳамкорликни янада мустаҳкамлаш ва ривожлантириш ниятида эканликларини яна бир бор таъкидладилар.

Ар-Роя: Аллоҳ ва Унинг Расули ﷺ душманларига иттифоқдош бўлиб, Америка ва яҳудий вужуди билан бир сафда турадиган, ушбу вужуд билан нормаллашувни — яъни муносабатларни яхшилашни — дипломатик ҳамкорлик даражасини кўтариш деб атайдиган, Америка ва яҳудий вужуди раҳбарлари билан ўзаро ташрифлар уюштириб, қучоқлашиб кўришадиган режимлардан бундай ишлар содир бўлиши энди ажабланарли эмас. Бундай режимлар Умматга қарши очиқ-ошкора иттифоқ тузиши ҳам энди ғалати туюлмайди. Бу иттифоқда Ислом ҳазорий лойиҳаси душман сифатида кўрилади, Абраҳам келишувлари эса сиёсий фаолият ва минтақавий иттифоқчилик учун асос қилиб олинади.

Бироқ Макка келишувидан кейинги ушбу йўналишдаги энг хавфли жиҳат — куфр соябони остидаги сиёсий иттифоқларнинг ҳарбий иттифоқлар ва қуролланган минтақавий блокларга айланишидир. Бундай тузилмалар Ислом Умматига қарши олиб борилаётган салибчилик урушида воситачи куч вазифасини бажаради. Натижада қўшни давлатлар ва уларнинг армиялари ҳолдан тойдирилади, улар қуролланиш пойгасига тортилади ва мустамлакачи кофирнинг бизнинг бўйнимиз устидан ҳукмронлик қилишига йўл очилади. Бунинг баробарида эса мазкур тузилмалар ўз кучини Америка кўмагидан ва яҳудийлар лойиҳасига хизмат қилишдан олади. Шу тариқа улар ҳарбий ва технологик устунлик намунасини яратади. Бу эса минтақадаги бошқа малайларни ҳам ўзига жалб қилиб, уларни очиқ нормаллашув карвонига қўшилишга ундайди.

Бир томонда Америка малайлари — Саудия Арабистони, Туркия ва Покистон, иккинчи томонда эса Британия малайлари — Амирликлар ва Марокаш ўртасидаги ҳарбий иттифоқлар айнан шундай бир пайтда юзага келмоқдаки, Америка ҳарбий салоҳиятини ҳолдан тойдираётган стратегик зўриқишдан чиқиб олиш учун вақт ютиб олишга уринмоқда. У Эрон ва унинг таъсир доирасидаги кучлар билан бўлаётган тўқнашувга якун ясашга ҳаракат қилмоқда. Европа эса Россиянинг гибрид уруши жараёнига чек қўйишга уринмоқда. Бироқ Хитой ҳарбий, технологик ва иқтисодий жиҳатдан илгарилаб бораётган шароитда ҳар икки томон ҳам бир жойда депсиниб қолмоқда.

Бу хиёнаткорона йўналишларнинг энг катта нишони эса мусулмонлардир. Улардан мазҳабий ва тоифачилик урушларида, шунингдек, бу ваҳший капиталистик давлатларнинг золим ҳукмдорлари манфаат кўрадиган турли ҳолдан тойдириш жангларида қурбон сифатида фойдаланиш кўзланмоқда. Яманда, Суданда, Африка шохи минтақасидаги бир қатор мамлакатларда ва Саҳро минтақасида содир бўлаётган воқеалар бунга яққол далилдир. Парчаланиб кетган бу давлатларни бирлаштириб турган умумий жиҳат — уларнинг айнан бир хил кучлар томонидан ўзаро тортишув ва бўлиб ташлаш қурбонига айлантирилаётганидир. Яъни бу ишда деярли бир хил минтақавий воситачилар иштирок этмоқда.

Шундай экан, шубҳали ҳарбий иттифоқлар Умматнинг орқасига санчиладиган заҳарланган ханжардан бошқа нарса эмас. Бу ханжарни хиёнатни касб қилиб олган ва душманлари сафида туришни одат қилган режимлар ушлаб турибди. Ҳукмдорлари Оқ уй томон юз буриб, яҳудийларга садоқат кўрсатиш билан фахрланиб турган экан, бу иттифоқлар Ислом ва мусулмонларга яхшилик келтиради, деб ақлли инсон умид қилмайди.

Шунинг учун Уммат бу хоинлардан ўзини четга олиши ва уларнинг бошига тузумни ағдариб ташлаши лозим. У Аллоҳнинг Китоби ва Набийсининг ﷺ Суннати билан ҳукм юритадиган Рошид Халифага байъат бериши керак. Ана шу Халифа золимлар ва хоинлардан қасос оладиган қўшинларни сафарбар этади, жинояткор халқаро тизимни ағдаради ҳамда дунёни осмон ва ер аҳолиси рози бўладиган Роббоний тузум асосида қайта тартибга солади.

Мустамлакачи кофир Ғарб ортидан эргашиб, мусулмонларнинг орқасига ханжар урган ва уларга сиёсий ёки ҳарбий жиҳатдан хиёнат қилган, ёхуд Фаластинни ҳимоя қилиш баҳонасида мусулмонларнинг қонини савдо қилган ҳар бир киши Расулуллоҳ ﷺнинг қуйидаги сўзларини эсласин:

«لِكُلِّ غَادِرٍ لِوَاءٌ يَوْمَ الْقِيَامَةِ يُعْرَفُ بِهِ»

«Қиёмат куни ҳар бир хиёнаткор учун бир байроқ бўлади ва у ўша байроқ орқали танилади».

Роя газетасининг 2026 йил 14 октябр чоршанба кунги 621-сонидан