بِسْمِ اللهِ الرَّحْمٰنِ الرَّحِيم

ИСЛОМИЙ ДАЪВАТНИ ЁЙИШ

ВАЗИФАЛАР ВА СИФАТЛАР

(17-бўлак)

ПАЙҒАМБАР ВА РАСУЛЛАРНИНГ
ҚИССАЛАРИ

Қуръони Каримнинг элликдан зиёд суралари пайғамбар ва Расуллар ҳақидаги ажойиб қиссаларни ҳикоя қилади. Айниқса, Мусо А.нинг қиссаларига кенг ўрин ажратилган. Бу қиссалар турли таъбирлар билан қайта-қайта такрорланиб келади. Модомики, Ҳақ Таоло Қуръон оятларида бирор ҳарфни ҳам беғараз ва беҳикмат келтирмас экан, Буюк Каломда пайғамбар ва Расуллар қиссаларининг бу қадар кўп келтирилишига боис не? Бунинг ҳикмати қаерда?
Аллоҳ Таоло Қуръонни ҳикмат билан (ҳақ билан) нозил қилди.

ذَلِكَ بِأَنَّ اللّهَ نَزَّلَ الْكِتَابَ بِالْحَقِّ

– “Ўша (азоб) Аллоҳ бу Китоб (Тавротни) ҳақ билан нозил қилгани сабаблидир”.           (Бақара:176)

الم + اللّهُ لا إِلَـهَ إِلاَّ هُوَ الْحَيُّ الْقَيُّومُ + نَزَّلَ عَلَيْكَ الْكِتَابَ بِالْحَقِّ

– “Алиф, Лом, Мим. Аллоҳ ягонадир. Ундан ўзга илоҳ йўқ. У тирик ва абадий тургувчидир. Сизга бу Китобни (Қуръонни) ҳақ билан нозил қилди”.        (Оли Имрон:1-3)

Демак, пайғамбар ва Расулларнинг қиссалари ҳақ-рост қиссалардир.
Аллоҳ Таоло бунга ишора қилиб «Оли Имрон» сурасида шундай марҳамат қилади:

إِنَّ هَـذَا لَهُوَ الْقَصَصُ الْحَقُّ وَمَا مِنْ إِلَـهٍ إِلاَّ اللّهُ وَإِنَّ اللّهَ لَهُوَ الْعَزِيزُ الْحَكِيمُ

– “Албатта, бу ҳақ-рост қиссадир. (Яъни Исо ҳеч қандай худо эмас, балки Аллоҳнинг бошқа ҳамма пайғамбарлари каби оддий одам зотидир). Аллоҳдан ўзга илоҳ йўқ. Ва, албатта, Аллоҳнинг ўзигина қудрат ва ҳикмат соҳибидир“.         (3:62)
«Анъом» сурасида айтилади:

إِنِ الْحُكْمُ إِلاَّ لِلّهِ يَقُصُّ الْحَقَّ وَهُوَ خَيْرُ الْفَاصِلِينَ

– “Ҳукм қилиш фақат Аллоҳнинг ўзига хос. У фақат ҳақни сўйлар. У (ҳақ билан ноҳақни) ажратувчи кишиларнинг энг яхшисидир”.                         (6:57)

Хуллас, бу қиссаларнинг ҳақлигига ҳеч қандай шубҳа йўқ. Бизлар эса, ҳақни ушлашга ва ҳақ даъватини барча инсонларга етказишга амр этилганмиз. Ақидани, ибодатларни, шаръий аҳкомларни ўрганиб, бошқаларга ҳам таълим беришимиз жараёнида ўзимиз ҳам уларга амал қилишимиз лозим бўлгани каби, Қуръоннинг барча оятларини, жумладан, қиссалар ҳақидаги оятларни ҳам ўқиб ўрганишимиз, бошқаларга ҳам ўргатишимиз ва ҳаётимиз давомида улардан ибрат олмоғимиз лозим. Акс ҳолда, бу қиссаларнинг Қуръони Каримда жуда кўп келтирилганлигининг ва ҳикмат билан нозил қилинганлигининг маъноси қолмайди. Ҳақ Таоло эса, бефойда гап сотишдан пок Зотдир.