Ҳокимларнинг кўзбўямачилиги президентга эмас, халққа қаратилган
Ҳокимларнинг кўзбўямачилиги президентга эмас, халққа қаратилган
بسم الله الرحمن الرحيم
Хабар: Фарғона вилоят ҳокимлиги ижтимоий тармоқларда тарқалган шов-шувли хабарларга муносабат билдирди. Ижтимоий тармоқларда Шавкат Мирзиёевнинг Фарғонага ташрифи давомида Фурқат туманидаги “Уста Юсуфжон наққош” оилавий корхонасида бўлганида олинган суратда давлат раҳбарининг орқасида ўймакор шогирд либосида туман ҳокимининг ҳайдовчиси турганлиги ҳамда президент билан мулоқот қилган яна бир уста тумандаги 21-мактаб директори ўринбосари экани ҳақида хабарлар тарқалди.
Фарғона вилояти ҳокимлиги мазкур хабарларга муносабат билдирди.
Қайд этилишича, ҳақиқатдан ҳам, расмда кўзга ташланган шахс Фурқат туман ҳокимининг ҳайдовчиси Илҳом Аҳмаджонов бўлиб, у Ўзбекистон халқ устаси Муҳаммадали Юнусовнинг шогирдларидан. “Илҳом Аҳмаджонов аввалдан ўзида ўймакорликка, дурадгорликка қизиқиш борлиги сабаб, туманга келгач, “Уста Юсуфжон наққош” оилавий корхонасида миллий ёғоч ўймакорлиги санъати ўрганиш имконияти мавжудлигидан фойдаланиб, шогирд сифатида ҳунар сирларини ўргана бошлаган. Таъкидланишича, давлат раҳбари билан мулоқот қилган Илҳомжон Сулаймонов 21-мактабда маънавий-маърифий ишлар бўйича 0,75 ставкада директор ўринбосар бўлиб ишлайди. Илҳомжон Сулаймонов Уста Юсуфжон наққош оилавий корхонасида тушдан кейин уста-ўргатувчи лавозимида ишлайди. (Азон.уз)
Изоҳ: Президентни қарши олишдаги кўзбўямачиликлар Ўзбекистонда айб иш саналмайдиган аҳволга келганига анча вақтлар бўлган. Фарғонадаги воқеанинг шов-шувга айланишига эса, матбуот хизматларининг бу ишни ёритишга эътибор қаратгани сабаб бўлди. Ваҳоланки, ижтимоий тармоқларда бундан олдин ҳам ҳокимларнинг кўзбўямачиликлари айтилиб, ёзилиб келинган. Бундан ташқари, интернетнинг ўзбек сегментида оддий фуқаролар ва соҳа мутахассислари кўтариб чиқаётган қанчадан-қанча давлат ҳодимларининг жиноятлари борки, уларни ОАВ ёритмагани учун бу қилмишлар омма тарафидан муҳокама қилинмаяпти.
Президентнинг вилоятларга қилган ташрифларига қаралса, кўзбўямачилик ҳолатлари фақат ривожланаётганини кўриш мумкин. Пахтазор ўртасига тош йўлак ётқизилиши, Андижонда вақтинчага дарахт ва гуллар экилгани, Қашқадарёда бу йил палма дарахтлари ўтқазилгани бу кўзбўямачиликлар Мирзиёевнинг ҳокимлардан талаб қилиб келаётган ўзига нисбатан садоқатнинг бир қисми эмасмикан, деган саволни пайдо қилади. Чунки қишлоқдаги абгор ҳолатга дуч келган Мирзиёевнинг “нимага буларни мени келишимга тўғрилаб қўймадинг” деб ҳокимни қаттиқ сўроққа тутгани ҳам бу гумонни қувватлайди. Баъзи содда одамлар Фарғонадаги сохтакорликни танқид қилиб “наҳотки президентни алдашса” деб ҳайратларини яширишмаяпти. Шу ўринда табиий савол туғилади. Президент оддий халқ билиб турган ҳокимларнинг бундай кўзбўямачилик қилишига нима сабабдан қўйиб беряпти? Бунга қуйидагича жавоб бериш мумкин: 1. Президентнинг келишига ўзгача тайёргарлик кўрилиши ҳокимият вакилларида ва давлат ходимларида президентга нисбатан ўзгача эҳтиромни пайдо қилади. 2. Телевидение ва матбуотда президентнинг замонавий бинолар ва чиройли манзараларда кўриниш бериши халқда “биз ҳеч кимдан кам эмасмиз” деган тушунчани парваришлайди. 3. Бу кўзбўямачиликларнинг турли шаклда фош бўлиши “ҳокимлар ҳақиқий аҳволни яшириб президентни алдашяпти” деган халқдаги мавжуд тушунчани мустаҳкамлашга хизмат қилади.
Президентнинг ҳар қандай саёз ва тайини йўқ “ташаббус”ларини ҳам ҳаётга жорий қилишни зиммасига олаётган ҳокимлар ўша ташаббусларни воқеда амалга ошира олмагач, уларни қоғозда бажаришга ва шогирд ушлашга қурби етмаётган “намунали” устага ўзининг хизматдан бўшамайдиган шофёрини шогирд сифатида кўрсатишга мажбур бўляпти. Фарғонадаги кўзбўямачиликнинг энг қайғули жиҳати шуки, мактаб ўқувчилари ахлоқан тубанлашаётган бугунги кунда уларнинг маънавий-маърифий камол топишига жавобгар бўлган директор ўринбосарининг қўшимча ишда ишлашга ва ҳокимлик тарафидан президентни кутиб олиш ва бошқа ишларга мажбурланаётганидир.
Ўзбекистон ҳукумати ва вилоят ҳокимларининг сиёсати кўзбўямачилик, алдов ва ҳиёнатдан иборатлиги ҳаммага аён бўлган ҳақиқатдир. Шунга қарамай, халқнинг бу сиёсатга бўйин эгиб яшаётгани барча муаммоларнинг бошланиш нуқтаси ҳисобланади. Аслида, ёлғон ва сохтакорлик ҳар қандай жамиятда қораланади. Бундай иллатга эга кишилар энг паст, разил кимсалар ҳисобланади. Мусулмонлар эса, бу иллатга мунофиқлик, деб қарайди ва ундан қаттиқ жирканишади. Аввалги ва ҳозирги ҳукуматнинг алдов ва ҳиёнатларини кўра била туриб халқимизнинг уларга бўйин эгиб келаётганининг иккита муҳим сабаби бор. Биринчиси: XX асрдан бошлаб рус мустамлакачилиги таъсирида халқимизда шакллантирилган менталитет. Бу менталитет ҳукумат ҳар қандай сиёсат юритса ҳам халқ унга бўйин эгишга бурчли деган тушунчани сингдиради. Иккинчиси: халқнинг давлатга 5 жиҳатдан боғлиқ бўлган яшашидан келиб чиқади. Улар таълим-тарбия, жиноят-жазо, иқтисод, ижтимо ва сиёсат борасидаги боғлиқлик. Хулоса қилиб айтадиган бўлсак, халқимиз Исломдан бошқа тузумлар адолатни ва покиза ҳаётни таъминлай олмаслигини билишади. Бироқ Исломни ўзида гавдалантирган сиёсий куч бўлмагани сабабли мавжуд ҳолатдан чиқиш йўлини топа олмаяпти. Бундай вазиятда дин ғамидаги мусулмонлар зиммасига тарихий вазифа юкланади. Улар бугунги техник-технологик имкониятлардан унумли фойдаланган ҳолда Ўзбекистондаги маълумот қамалини енгиб ўтиб, воқеа- ҳодисаларни Ислом нуқтаи назаридан ёритишлари ҳамда муаммоларга Қуръон ва Суннатдан келиб чиққан ижтиҳод асосида ечим беришлари зарур. Шунда Ўзбекистон давлатчилигининг асоси ҳисобланган демократиянинг динимизга мутлақо зид эканлиги, бу тузум ва у асосида бошқарадиган ҳар қандай ҳукумат иккиюзламачилик ва зулм билангина сиёсат юритиши оммага аниқ-равшан бўлиб қолади. Шунингдек, халқимиз инсон, жамият ва давлат ишларига тааллуқли барча масалаларга Аллоҳ Таоло ҳукмлар нозил қилганлигини, агар мазкур ягона тўғри ҳукмларни қабул қилиб у асосида яшалмаса, у халқнинг аксарини обидлар, зоҳидлар, зокирлар ташкил қилса ҳам Аллоҳ Ўзининг тарк қилинган ҳар бир ҳукми учун бу жамиятни қаттиқ жазолашини англаб етади.
Ҳизб ут-Таҳрирнинг Ўзбекистондаги матбуот бўлими аъзоси Абдураҳмон
28.05.2022й
