Россияда мусулмонлар “арзон жон”га айландими?

بِسْمِ اللهِ الرَّحْمٰنِ الرَّحِيمِ

Хабарларга кўра, 2025 йил 12 декабр куни Хабаровскда Россиянинг кучишлатар тузилмалари вакиллари кафелардан бирига сабабсиз бостириб кириб, у ердаги ўзбекистонликларни аёвсиз калтаклаган. Натижада икки фуқаро бошидан жиддий жароҳат олиб комага тушган, уларнинг қўл-оёқлари синдирилган. Комага тушганлардан бири бир неча кундан кейин вафот этган. Марҳум Самарқанд вилояти Каттақўрғон тумани Жумавой қишлоғидан эканлиги айтилмоқда.

16 декабр куни эрталаб, Москва вилояти, Одинцово шаҳри яқинидаги Горки-2 аҳоли пунктида юз берган фожиали воқеа эса, жамоатчиликни янада ларзага солди. Унда 4-синф ўқувчиси бўлган тожикистонлик 10 ёшли Қобилжон Алиев 15 ёшли Тимофей К. исмли қотил томонидан ваҳшийларча пичоқлаб ўлдирилди.

Россияда мусулмонларга нисбатан содир этилаётган бундай қотилликлар, калтаклашлар ва таҳқирлар тасодифий эмас. Бу ҳолатлар Россиянинг миграция масаласини тизимли босим ричаги сифатида ишлатаётгани ва бу жараёнда мусулмон ҳаётини қадрсиз, ҳимоясиз, арзон жон деб қабул қилаётганининг очиқ ифодасидир.

Россиядаги амалиёт шу ҳақиқатни равшан кўрсатмоқдаки, иқтисодга керак бўлганида мусулмон муҳожирлар “ишчи қўл”, сиёсий жиҳатдан кераксиз бўлганида эса “ортиқча юк”, ҳатто “хавф манбаи”га айлантирилмоқда.

ОМОН томонидан калтаклаб ўлдирилган ўзбекистонлик муҳожир ёки мактабда пичоқлаб ўлдирилган тожикистонлик бола – булар шахсий фожиалар эмас, балки Путин режимининг асл башарасидир. Бу ердаги муҳим жиҳат ўлимнинг ўзи эмас, балки мусулмонлар ҳаётига тажовуз қилишга бўлган муносабатнинг оддийлашиб кетганидир.

Россия учун миграция масаласи фақатгина ишчи кучи билан боғлиқ иқтисодий муаммо эмас, балки Марказий Осиё давлатларига нисбатан қўлланадиган геосиёсий босим воситасидир. Миллионлаб мусулмон муҳожирлар Россия иқтисодиётини ушлаб турган бир пайтда, минтақа режимларининг ҳаракатсизлиги туфайли улар сиёсий жиҳатдан мутлақ ҳимоясиз ҳолда қолмоқдалар.

Россия расман “кўп миллатли ва кўп динли минтақа” деб аталади. Аммо амалда мусулмонларга нисбатан шаклланган нафрат муҳити тизимли равишда озиқлантирилмоқда. Кремл назоратидаги ОАВларда мусулмон муҳожир образи жиноятчи, хавф, ифлослик манбаи сифатида чизилади. Бу эса жамият онггида мусулмонга нисбатан зўравонликни “оддий ҳол”га айлантиради.

Натижада, куч ишлатар тузилмалар ўзини жазосиз ҳис қилади, ёшлар эса нафратни қаҳрамонлик деб қабул қила бошлайди. Мактабдаги бола қотиллиги ва кафеда аёвсиз калтаклаб ўлдирилган ўзбекистонлик ҳодисаси ана шу муҳитда ўсган тафаккурнинг мевасидир.

Россия бугун миграция ричаги орқали мусулмонларни синаб кўряпти. Агар бу зулмга қарши принципиал, сиёсий ва мабдаий жавоб бўлмаса, “арзон жон” тамғаси янада мустаҳкамланади. Бугун калтак, эртага ўқ, индинга эса бутун Умматнинг қадри оёқ ости қилиниши оддий ҳолга айланади ва шундай бўляпти ҳам. Чунки куч ишлатар тузилмалар мусулмонни жазосиз калтаклаётган бир муҳитда, жамиятнинг оддий аъзоси ҳам уни “инсон” сифатида кўрмай қўяди. Шунинг учун ҳам мусулмон халқлари учун бу воқеалар фақат ҳамдардлик билан чекланадиган фожиа эмас, балки сиёсий уйғонишга чақириқдир. Адолат кутиб ўтирилмайди ёки у тилаб олинмайди. У фақат адолатни асос қилган тузумни тиклаш орқалигина қўлга киритилади, бошқача айтганда, Ислом асосида сиёсат юритадиган Рошид Халифалик Давлатини барпо қилиш билангина таъминланади. Шу ҳақиқат англанмагунча, мусулмон қони геосиёсий ўйинларда арзон қурбон бўлиб қолаверади. Набий ﷺ айтганлар:

«إِنَّمَا الْإِمَامُ ‌‏جُنَّةٌ ‏ ‏يُقَاتَلُ مِنْ وَرَائِهِ وَيُتَّقَى بِهِ»

“Албатта, имом-халифа қалқондир, унинг ортида туриб жанг қилинади ва у билан ҳимояланилади”. (Имом Муслим ривояти).

Иззатуллоҳ

02.01.2026й