بِسْمِ اللهِ الرَّحْمٰنِ الرَّحِيمِ

Саудия Арабистони Исломга нусрат бериш ва мусулмонлардан қийинчиликни бартараф этиш учун эмас, балки уларни оғизларни ёпиш учун зўр бериб ҳаракат қилмоқда

Ал-Жазира нет веб-сайтида (ҳижрий 1441 йил 2 жумодул аввал, милодий 2019 йил 28 декабр шанба куни) нашр қилинган хабарда бундай дейилади:

«Шанба куни «Саудия» расмий ахборот агентлиги тарқатган хабарда айтилишича, Саудия Хавфсизлик агентлиги махсус фавқулодда хизмат рақамини жорий қилиш билан диққатга сазовор ўзгариш қилган. У ватандошлардан ва мамлакат ичкарисида яшаётганлардан айни рақамдан фойдаланишни талаб қилган. Яъни, улар айни Хавфсизлик агентлигига «давлатга мухолиф ёки экстремистик фикрга эга шахслар ҳақида етказишлари керак» бўлади.

Мазкур ахборот агентлигига кўра, «давлат Хавфсизлик департаменти хавфсизлик алоқалари маркази ва «990» телефон рақами билан таништириш кампанияси бошлаган» бўлиб, бу «департамент билан ватандошлар ва мамлакатда яшаётганлар ўртасида алоқа кўприги» бўлиб хизмат қилади.

Агентликка кўра, одамлар «террорчилар ёки қидирувда бўлган шахслар бўлиши мумкин бўлган жойлар ҳақида, террорчилар уялари ва гумон туғдирган шахслар ҳақида ҳамда экстремистик ғояларга эга бўлган ва давлатга қарши чиққан шахслар ҳақида дарҳол мазкур рақам билан телефон қилиб, хавфсизлик маркази билан алоқа қилиш билан ушбу муҳим кампанияга ўз ҳиссаларини қўшишлари керак.

Агентлик жумладан бундай дейди: «Марказ кеча-кундуз узлуксиз ишлайди ҳамда маълумотларни профессионал ва яширин тарзда қабул қилиб олиб, уларни ҳал қилишга ваколатли жиҳатга етказади».

Агентлик ўзининг телефон рақамларини ҳамда электрон почта манзилларини ҳам эълон қилиб, шу манзилларга хабар юборилиши лозимлигини билдирди.

Таъкидлаш жоизки, Саудия мамлакатида қатор қамоққа олиш кампанияси кузатилган. Бу кампания валиаҳд Муҳаммад ибн Салмоннинг 2017 йил ёз ойида отаси Салмондан кейин мамлакатнинг иккинчи шахсига айлангандан бери давом этмоқда.

Қирол саройига яқин ахборот воситалари «мамлакатдаги коррупцияга қарши кураш», дея сифатлаган бу қамоққа олишлар тўлқини, амирлар, вазирлар, машҳур бизнесменларни ўз ичига олди.

Кейин бу кампания кўлами кенгайиб, Салмон Авда, Эваз Қарний, Али Умайрий, Сафар Ҳаволий каби адвокатлар, муфаккирлар ва етук уламолар ҳам унинг қурбонига айланди… Сўнг кампания эркак ва аёллар дохил машҳур инсон ҳуқуқлари фаолларига ҳам етиб борди.

Бу кампаниядан ташқари, Ғарб хабарларида айтилишича, Риёз мамлакат ташқарисидаги мухолафатчиларга қарши жосуслик қилади, ҳатто бундан минглаб «Твиттер» хизмати фойдаланувчилари ҳам омон қолмаган. Бунинг устига, телефон рақамларини, электрон почта манзилларини ва интернет манзиллари (IP)ни рухсатсиз кузатиш билан ҳам шуғулланади.

Роя газетасининг 2020 йил 8 январ чоршанба кунги 268-сонидан