بِسْمِ اللهِ الرَّحْمٰنِ الرَّحِيم

Роя газетаси:

Шом қўзғолони тил бириктирувлар ва ёрдамсиз ташлаб қўйишларга қарамай давом этади

Устоз Аҳмад Муоз қаламига мансуб

Пайшанба куни АҚШ ташқи ишлар вазирлиги «Остона музокаралари»да иштирок этиш борасидаги ўз позициясини маълум қилди. Маълумки, Суриядаги сиёсатни мувофиқлаштиришга қаратилган ушбу «Остона музокаралари» Россиянинг Сочи шаҳрида бўлиб ўтиши белгиланган эди. АҚШ ташқи ишлар вазирлигидаги бир мансабдор шахснинг «Спутник» ахборот агентлигига айтишича, Америка Сурия масаласи билан боғлиқ «Остона музокаралари»да кузатувчи сифатида ҳам, бошқа бирор расмий сифатда ҳам қатнашмайди. У – Биз асосий диққатни БМТ раҳнамолигида Женевада бўлиб ўтган музокарага ва бу музокараларда қўлга киритилган улкан ютуқларга қаратамиз, деди. Сўнг – Биз Суриядаги зўравонликни реал тарзда юмшатадиган ҳар қандай ҳаракатни олқишлаймиз, чунки бу ҳаракат сиёсий ўтиш даврини ишонч билан амалга ошириш учун замин яратишга ёрдам беради, зеро, зўравонликни юмшатиш Хавфсизлик Кенгашининг 2254 сонли қарорида ҳам таъкидланган, деди. Шунингдек, ташқи ишлар масъули Остона амалиётидаги томонларни барча ҳаракатларини Женева амалиётига қаратишга чақирди ҳамда БМТнинг Суриядаги вакили Стеффан де Мистуранинг саъй-ҳаракатларини тўла қўллаб-қувватлади.

Америкалик масъул зўравонликни юмшатиш, деганда жинояткор рус самолётлари бомбардимонларини ва қонхўр режим кучлари ҳужумларини юмшатишни назарда тутмайди. Балки қўзғолончиларнинг режимга қарши ҳарбий амалиётларини тўхтатишни ҳамда режим назоратидан чиқиб кетган ерларни унга қайтариб беришни, Суриядаги вазиятга америкача ечим берилишини кутишни англатади. Сурияда қўли баланд келаётган ва режим орқали нуфуз эгаси бўлган Америка Остона ва Сочи учрашувларида қатнашмайди. Нима учун, рози эмасми? Йўқ, аксинча, у Дамашқдаги малайи Асад режими хавфсизлигини таъминлаш йўлида руслар қўли билан эришилган барча ишларга рози. Бироқ у, пойтахтни хавфсиз ҳолатга келтиргач, ўз одатига кўра, «БМТ қарорлари»ни дастак қилиб, ишни руслардан тортиб олишга уриняпти ва «ишончли» сиёсий ўтиш даври босқичини амалга оширишга ҳаракат қиляпти.

Дарҳақиқат, Американинг русларга белгилаб берган роли пухта ва ўйлаб қилинган роль бўлди. Бу нарса коалиция ва музокара ҳайъатидаги хоинлар орқали Женева ва Остонадаги сиёсий амалиёт билан параллел равишда олиб борилди. Зеро, Американинг режимни қайта жонлантиришида коалиция ва ҳайъатнинг ёрдами катта бўлди. Агар «кафил» Туркия бўлмаганида, на руслар муваффақиятга эриша оларди, на уларнинг ортида турган Америка. Чунки Туркия сиёсий мақсадда берилган ифлос пуллар ёрдамида гуруҳлар етакчиларини боғлаб олишга муваффақ бўлди. Бу пулларга учган етакчилар қўзғолонни йўқ қилиш режасини амалга ошириш йўлида ёлғон ярашув орқали жабҳаларни тинчлантириб, ички низода бир-бири билан қирпичоқ бўлишди. Бу низо Суриядаги шариат пешволари кўз ўнгида юз берди. Айни шу шариат пешволари хоин етакчилар содир этган ҳар бир мусибатга ямоқ солиб, унга шаръий асосларни топиб беришди.

Барчанинг зеҳнида қуйидагича саволлар айланмоқда: Шом қўзғолони, хусусан, бугун шундай аҳволда экан, қайта чуқур нафас олиши ва режимни ағдаришга қаратилган йўлини янгилаб олиши учун қандай ечим бор, бугун турли шаклда ва ранг-баранг босқинчиликлар бор бир пайтда, боши берк кўчадан чиқишнинг йўли қандай, Идлибда унинг холис фарзандлари тўпланиб турган бир пайтда бу қўзғолон вайронага ва фанога юз тутадими?

Шубҳасиз, тоғутдан қутулишни ва Исломсиз ҳаргиз амалга ошмайдиган адолатни истаётган Суриянинг жасоратли халқидан бугун ҳар қачонгидан кўра кўп нарса талаб қилинмоқда. Энди ушбу халқ, айниқса, Даръа ва Шарқий Ғутада яқинда юз берган мағлубиятдан сўнг, бўлиб ўтган ишларни англаб олмоғи даркор. Бунинг учун шу аҳволга олиб келган сабабларни ўрганмоғи лозим. Сабабларнинг асосийси, ўз атрофига холис инсонларни тўплайдиган ва қўзғолонни режимни ағдаришдек мақсади сари етаклаб борадиган онгли холис сиёсий етакчиликнинг танланмаганидир. Уммат қўзғолончи гуруҳлар етакчиларига сукут қилди, уларнинг Туркия, Саудия ва Қатарга чиқиб, қўзғолонни қўллаб-қувватлаш баҳонасида ифлос пулларни ташишларига, бу пуллар эса, сафларни бўлиш, битта қуролдошларни бир-бири билан уриштириш, қизил чизиқдан чиқмаслик, қурбонликларни зое кетказиб, қонларни беҳуда оқизиш каби қилмишларга сабаб бўлганига ўз кўзлари билан гувоҳ бўлди. Мана, бугун Уммат шу қўзғолонга ёрдам бермаган, озод этилган ерларни сақлаб қолмаган етакчиларга сукут қилгани бадалини тўламоқда… Биз Умматга мурожаат қилар эканмиз, уни айблаш оҳангида мурожаат қилмаймиз. Ахир, у ўзидаги молию жонини, барча нарсаларини фидо қилди ҳамда уни мана шундай ҳалокатларга гирифтор этган етакчиларга шунча йиллардан бери ушбу хорлик чодирларида сабр қилиб келди. Балки, мурожаатимиз, унга ўзининг Аллоҳ Таоло фарз қилган маъруфга буюриб, мункардан қайтариш вазифасини эслатиш мурожаатидир. Чунки золим давлатлар қарорларини ўз Уммати ва халқига қарши ижро этган, улар томонга қайтмаган бу етакчилар пасткашликда, разилликда, ички ва ташқи душманлар билан тил бириктиришда рекорд қўйишди… Барча инсонлар билишмоқда – агар бу етакчилар бўлмаганда, режим Даръа, Ғута, Шимолий Хомсга киролмасди, у ердаги сабр қилиб турган аҳлини кўчира олмасди. Шунингдек, у зўравонликда давом этмаган ҳамда Идлибга ҳам бошқа шаҳарлар тақдирига юз тутиши билан таҳдид қилмаган бўларди! Буларнинг барчаси ниманинг муқобилига бўлди? Дунёнинг ўткинчи матоси учун шундай бўлди, бошқа нарса учун эмас!

Ушбу қўзғолонда Шом аҳли ғоят буюк сабрни, тоғлар ҳам кўтаролмайдиган бардошни намоён қилди… Мана шунинг ўзи, режимни ағдаришга кифоя қилар эди ва ҳозир ҳам шундай. Қўзғолон аҳли ўз етакчилигингизни Ҳизб ут-Таҳрирдаги онгли ва холис ака-укаларига топширмоғи лозим. Чунки улар қўзғолон бошланган кундан бери ўз насиҳатларини аямай, тил бириктирувни ҳали содир этилмасидан олдин фош этдилар. Қўлларида буюк лойиҳа-рошид Халифалик лойиҳаси бўлган бу эр кишиларни Ислом тарбиялаб етиштирди, регионал ва маҳаллий разведка етиштиргани йўқ. Ҳали ҳам кеч эмас, қўлдан бой берган имкониятни қайта олишимиз мумкин. Чунки қонхўр режим ликиллаб турибди, тасвирлаб бўлмас даражада заиф. Агар сотқин мухолафат ва хоин етакчилар бўлмаганида, режим ҳеч қандай ютуққа эришолмас эди. Шом аҳли буни жуда яхши билиб турибди. Билибгина қолмай, ҳатто бу каттаю кичикда ёрқин тушунчага айланган. Агар – тенглик бутунлай ўзгарган, руслар бор кучлари билан мавжуд, дегувчилар бўлса, уларга айтар сўзим, 2015 йилдаги Шимолий Ҳама яқинидаги Куфрнабуда ва Мурик жангларини эсланг… Ахир, мужоҳид қўзғолончилар Россияни самолётлари билан қўшиб, Эронни жангарилари билан бирга бурунларини ерга ишқаб қўймадими, улар бир қарич ҳам олдинга босолмай қолишганди-ку?! Бироқ ундан кейин юз берган ўзгариш шу бўлдики, Туркия билан Саудия иккаласи Россияга ёрдам бериб, унга минтақаларни топширишди, жангчи гуруҳларни шимолга олиб чиқиб кетишди. Яна бир ўзгариш шу етакчилар қабул қилган қарорлар бўлди. Бу қарорлар қўллаб-қувватловчи давлатлар манфаатига, яъни, режимни ҳолдан тойдириб, емирилиш жарлиги ёқасига олиб келиб қўйган қўзғолон олови ва алангасини ўчириш ниятларига хизмат қилади.

Эй Шомдаги аҳлимиз!

Бир қўлида Россия ва унинг самолётлари, Эрон ва унинг жангариларидан иборат фигуралари бўлган, иккинчи қўлида хорижий мухолафат, гуруҳ етакчилари, уларнинг Туркия, Саудия ва Қатар сингари қўллаб-қувватловчилари бор бўлган Америка сизга яхшилик истамайди. Йўқ, аксинча, у сиздан ўч олмоқчи. Чунки сиз унинг малайи Асадга қарши қўзғалгансиз… Шу боис ўч олиш орқали сизни бутун мусулмон халқларга ибрат қилиб кўрсатмоқчи. Токи, улар ҳам қайтиб шундай қилишмасин. Аҳволимизнинг ечими кундек маълум, биз уни сизга ҳамон тақдим этиб келаётган эканмиз, Аллоҳ Азза ва Жалла ризосидан ўзга ниятимиз йўқ. Зотан, Аллоҳнинг розилиги Унинг ҳукмларини барпо этиш ва бизни бу дунёю охиратда азиз қилувчи шариатини татбиқ этиш билан бўлади. Агар Аллоҳ буюргандек йўлдан юриб, йўлдаги синовларига сабр қилсак, Унинг ер юзида халифа қилиш ва ғолиблик бериш тўғрисидаги ваъдаси ҳамон биз учун мавжуд бўлиб турибди… Аллоҳ нақадар ажойиб дўст, нақадар гўзал нусрат берувчидир.

﴿وَمَن يَتَوَكَّلْ عَلَى اللهِ فَهُوَ حَسْبُهُ إِنَّ اللهَ بَالِغُ أَمْرِهِ قَدْ جَعَلَ اللهُ لِكُلِّ شَيْءٍ قَدْرًا﴾

«Ким Аллоҳга таваккул қилса, бас, (Аллоҳнинг) Ўзи унга етарлидир. Албатта, Аллоҳ Ўзи (хоҳлаган) ишига етгувчидир. Дарҳақиқат Аллоҳ барча нарса учун миқдор-ўлчов қилиб қўйгандир»  [Талоқ 3]

Роя газетасининг 2018 йил 8 август чоршанба кунги 194-сонидан