Судандаги конституцион ўзгартиш очиқ илмонийлик сари ташланган қадамдир
بِسْمِ اللَّـهِ الرَّحْمَـٰنِ الرَّحِيمِ
Роя газетаси:
Судандаги конституцион ўзгартиш очиқ илмонийлик сари ташланган қадамдир
Иброҳим Усмон Абу Халил қаламига мансуб
Судан парламентидан кутилганидек, ўтган сешанба депутатлар «эркинликлар иловаси», деб аталган конституцион ўзгартиришлар лойиҳасини таҳлилу такбирлар ва қарсаклар остида тасдиқлашди. Бу ўзгартишлар қуйидаги уч моддага оид бўлди:
Биринчи: «15» модда, (1) банд: «Оила жамиятнинг табиий ва асосий бирлигидир, у қонунни ҳимоя қилишга ҳақли, қонунда белгиланган ёшга етилганда эркак ва аёл ўзаро розилик билан турмуш қуришларига ижозат берилган, оила томонларнинг динига мувофиқ, агар динсиз бўлса, урф-одатига мувофиқ ташкил топади, моллар, васиятлар, мерослар ва бошқалар манфаатдор томонларга оид қонунга мувофиқ бошқарилади. (2) банд: Давлат оналикни ҳимоя қилиш, аёлни зулмдан сақлаш ва икки жинс ўртасида адолатли тенглик ҳосил қилиш, аёлнинг оиладаги ўрнини белгилаш ва унга оммавий ҳаётда имконият яратиш билан шуғулланади».
Аҳолисининг 99 %и мусулмон бўлган бир юртдаги бундай конституцион ўзгартишга назар ташлаган киши шуни кўрадики, бу ерда ижтимоий муносабатлар, хусусан, эр-хотин муносабатлари Ислом ақидасидан балқиб чиққан бўлмаслиги керак, деган талаб мавжуд. Балки ҳар томонга бурса бўладиган мазкур матн, Ғарб матнларига жуда ўхшайди. Икки жинс ўртасидаги тенглик ҳақидаги гап, «CEDAW» битими талабларини ижро этишни англатади. Бу битим муслима аёлнинг Ғарбдаги аёл каби бўлишини, чекланадиган ҳеч қандай шариати ҳам, дини ҳам йўқ очиқ-сочиқ юришини истайди. Аслида, аёл она, уй бекаси ва ҳимоя қилиниши вожиб бўлган номус бўлиб келаётган бир пайтда, шундай қилиш кўзланмоқда.
Иккинчи: «38-модда»: «Ҳар бир инсон эътиқод эркинлигига, ўзининг диний маросимлари билан шуғуланишга ҳақли, ҳеч кимнинг уни ишонмаган динига мажбуран киритишга ҳаққи йўқ, у қонунда кўрсатилганидек, ўз дини ва эътиқодини ифода этиш ҳуқуқига эга».
Бу моддани исломий юртлардан бири бўлган Суданда, мана шундай суратда келтириш, мусулмон Исломдан чиқишга ҳақли, деган мазмунни англатади. Моддада бу очиқ айтилмаса-да, буни матндан тушуниб олиш мумкин. Ҳатто конституцион ўзгартиш комиссияси раисаси, миллий кенгаш (парламент) раиси ўринбосари доктор Бадрия Сулаймон хонимнинг сўзлари ҳам бизнинг фикримизни қувватлайди. У конституцион ўзгартишларга рухсат берилиши ортидан берган матбуот конференциясида бундай деди: «Ўзгартишлар 1991 йилдаги жиноий қонундаги мавжуд жиноятларни, яъни муртадлик, бандитлик, номусга тажовуз, бўйдоқнинг зиноси каби жиноятларга жазо-ҳадларни бекор қилди». Ҳасбуналлоҳ ва неъмал вакил, бу нимаси бўлди, ахир, бу Аллоҳнинг динига тажовузку?! Унда жиноятларга оид жазо-ҳадлар бекор қилинди, дейилмоқда-я, Субҳаналлоҳ! Уларни жазо-ҳадлар қилиб белгилаган ким эди, инсонни яратган, унга нима фойдали, нима зарарлилигини яхши биладиган Аллоҳ белгиламаганмиди?! Субҳаналлоҳ, сизлар билувчироқми ё Аллоҳ?! Ёки буни диалог орқали Америка буюрдими?!
Учинчи: «151-1» модда: «Хавфсизлик ва миллий разведка учун бир хизмат тузилади, у миллий режим кучлари бўлиб, вазифаси ички ва ташқи хавфсизликни таъминлашдан иборат бўлади, унинг миссияси, бурч ва вазифаларини ҳамда хизмат шартларини қонун белгилаб беради».
Бу кучларга яширинча қулоқ солиш орқали шахслар дахлсизлигини бузиш ваколати берилган. Бу суд ёки прокуратура ёхуд хавфсизлик ҳокимиятининг миллий хавфсизликка зарар келтирувчи ишларда берадиган рухсати (санкцияси) асосида амалга оширилади. Бу ваколатлар жуда кенг ва ноаниқдир. Чунки миллий хавфсизлик, деган сўз кенг маънода бўлиб, аниқ-тиниқ мазмунга эга эмас, бу эса хавфсизлик хизматига бугунгидан ҳам кўпроқ кенг ҳукмронлик беради.
Бу ўринда фуқаро устидан жосуслик қилиш ва улардан шубҳаланиш вазифасига эга бўлган хизматнинг Исломда бор-йўқлигига оид шаръий ҳукмни баён қилишимиз лозим. Ислом фуқаро устидан жосуслик қилишни ҳаром қилади. Давлат мусулмон ва ғайримусулмон дохил ўз фуқаросига қарши жосуслик қилиши мумкин эмас. Балки амалда ёки ҳукмда уруш ҳолатида бўлган кофирлар устидан ҳамда уларнинг элчихоналари ва жосуслик инларига серқатнов бўлиб қолган шубҳали кимсалар каби шу кофирларнинг гумашталари устидан жосуслик қилиш шаръан рухсат берилган. Аллоҳ Таоло бундай деди:
يَا أَيُّهَا الَّذِينَ آمَنُوا اجْتَنِبُوا كَثِيرًا مِّنَ الظَّنِّ إِنَّ بَعْضَ الظَّنِّ إِثْمٌ ۖ وَلَا تَجَسَّسُوا وَلَا يَغْتَب بَّعْضُكُم بَعْضًا ۚ أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ ۚ وَاتَّقُوا اللَّـهَ ۚ إِنَّ اللَّـهَ تَوَّابٌ رَّحِيمٌ
«Эй мўминлар, кўп гумон(лар)дан четланинглар! Чунки айрим гумон(лар) гуноҳдир! (Ўзгаларнинг айблари ортидан) жосуслик қилиб юрманглар ва айримларингиз айримларни ғийбат қилмасин! Сизлардан бирон киши ўзининг ўлган биродарининг гўштини ейишни яхши кўрурми?! Ана ёмон кўрдингизми?! (Бас, гуноҳи бундан-да ортиқ бўлган ғийбатни ҳам ёмон кўрингиз)! Аллоҳдан қўрқингиз! Албатта Аллоҳ тавбаларни қабул қилгувчи, меҳрибондир» [Ҳужурот 12]
Бироқ Уммат борасида на аҳдга ва на бурчга боқаётган, Ислом ва мусулмонларга қарши урушда душман билан бир хандақда турган ҳукмдорлар, агар ўз хавфсизлик хизматлари бўлмаса, Умматга зулм қилишга ҳам, уни репрессия қилишга ҳам қодир бўлолмас эдилар. Хавфсизлик хизматлари улар учун одамларни бостириб, террор қилиб, жосуслик қилиб бериб туришади.
Бу ва бундан олдинги конституцион ўзгартишлар Исломни (ҳеч бўлмаса, шу жазо чоралари ва оила аҳкомлари борасида бўлса ҳам) четлатишнинг муқаддимасидир. Бундан айни ўзгартишларни очиқдан-очиқ илмонийлаштириш кўзланган. Чунки илгари ўзгартишлар соқолли илмонийлик шаклида, Ислом шиорлари билан ўралган ҳолда бўларди, очиқ бўлмасди.
Судан аҳли ва Умматнинг холис фарзандларига Ислом давлатини барпо этишга ҳаракат қилмоқлари шарт. Чунки Пайғамбарлик минҳожи асосидаги ушбу иккинчи рошид Халифалик давлати Умматни Роббул оламин аҳкомлари остидаги исломий ҳаётга қайтаради, унинг конституцияси (дастури) Аллоҳнинг Китоби ва Росули САВнинг суннати, саҳобалар ижмои ва шаръий қиёсдан истинбот қилинади. Ушбу давлатгина Судандаги мусулмоннинг ҳам, бутун дунёдаги мусулмонларнинг ҳам бирдан-бир халоскоридир. Ҳатто Халифалик давлати бутун башарият учун раҳматдир, чунки уни ҳабибимиз Муҳаммад Мустафо САВ бутун оламга раҳмат қилиб келтирганлар. Аллоҳ Таоло бундай деди:
وَمَا أَرْسَلْنَاكَ إِلَّا رَحْمَةً لِّلْعَالَمِينَ
«(Эй Муҳаммад), дарҳақиқат Биз сизни барча оламларга фақат раҳмат (яъни Аллоҳнинг раҳмати-жаннатига етаклагувчи) қилиб юбордик» [Анбиё 107]
Роя газетасининг 2017 йил 3 май чоршанба кунги 128-сонидан
