بِسْمِ اللهِ الرَّحْمنِ الرَّحِيمِ

Терроризм Уммат қўзғолонига душман, омадсиз ҳукмдорларга ниқобдир, бас, уни ҳақиқий исломий лойиҳа сари ҳаракат қилиш билан тўхтатиб қолинг, бу лойиҳада ҳаром қон тўкиш ва энг асосий масалалардан чалғиш жиноят ҳисобланади

Сўнгги кунларда Тунисда шафқатсиз ҳужумларнинг кети узилмай қолди. Улардан энг даҳшатлиси Қасрин вилояти Сабитла минтақасидаги ҳарбий патрулнинг нишонга олиниши бўлди. 2015 йил 7 апрел куни содир этилган бу ҳужумда қуролли кучлар сафидаги ўғлонларимиздан беш нафари қурбон бўлди. Бундан олдин Бардо миллий музейига ҳужум қилинган ва унинг қурбонлари хавфсизлик ходимлари ва сайёҳлар бўлган эди. Бу ҳужумлардан сўнг юрт ва унинг аҳли учун тўла хавфсизлик билан таъминланишнинг белгилари ҳам қолмади. Аксинча, таҳлилчилар «террорист»лар томонидан бундан ҳам даҳшатли ҳужумлар содир этилиши мумкинлигини айтишди. Шаҳар ичкарисида бомба ўрнатилган машиналар пайдо бўлиши мумкинлигини таъкидлаганлар ҳам шундай таҳлилчилар жумласидан.

Дарҳақиқат, бу ҳодисалар ҳукуматнинг ғоят бепарволигини жамоатчиликка фош этди ва буни куйдирувчи саволлар босими остида унинг ўзи ҳам тан олди. Айниқса, Бардо ҳодисаси ортидан бир-бирига тескари расмий баёнотлар ҳам одамларнинг жонига тегди. Айни ҳодисада жиноятчиларнинг ҳарбий формада бўлгани ҳамда ҳодисадан бир кун олдин бир неча хавфсизлик ходимлари вазирликка фожеадан огоҳлантирувчи мактуб юборишгани тўғрисидаги хабарга ҳукуматнинг расмий изоҳ бермагани одамлар учун бу баёнотларнинг энг ёмони бўлган кўринади!!

Бироқ, бундай жиноятларнинг оммавий қораланиши, фикрий ва сиёсий йиғинлар орқали қарши чиқишнинг давом этиши ҳамда «терроризм» ҳар жиҳатдан Уммат қўзғолонига душман деган тушунчанинг ортиши холис онгли кишилар қалбига таскин беради. Терроризмнинг душманлиги шундаки:

Биринчидан: хавфсизлик ходимлари, ҳарбийлар ва оддий одамлардан иборат юрт аҳли қонини тўкиш ҳамда хориждан келган фуқароларга юртга кириш хавфсизлиги берилгандан сўнг уларнинг қонини тўкиш ҳаромдир. Росулуллоҳ САВ бундай деганлар:

«مَنْ خَرَجَ عَلَى أُمَّتِي يَضْرِبُ بِرَّهَا وَفَاجِرَهَا وَلاَ يَتَحَاشَى مِنْ مُؤْمِنِهَا وَلاَ يَفِي لِذَي عَهْدٍ عَهْدَهُ فَلَيْسَ مِنِّي وَلَسْتُ مِنْهُ»

«Ким Умматимга қарши чиқиб, унинг яхшисини ҳам, фожирини ҳам урса, мўминидан ҳам ўзини тиймаса ҳамда аҳдлашилган киши (зиммий)га берган аҳдига вафо қилмаса, бас, у мендан эмас, мен ундан эмасман»  (Муслим ривояти).

Иккинчидан: Терроризм хорижий давлатлар учун – терговлар олиб бориш, босимлар ўтказиш, кўрсатмалар бериш орқали – юртга бурун суқишларига қулай шароит яратади ва имкониятлар очиб беради. Масалан, Бардога қилинган ҳужумдан бир кун кейин, яъни 2015 йил 19 март куни Франция матбуотида терроризм бўйича махсус судья ва франциялик судьялар хавфсизлик зобитларининг Тунисга келишга тайёргарлик кўришаётгани таъкидланди. Америка ташқи ишлар вазирлиги матбуот воизи Жош Эрнстга кўра, Қўшма Штатлар Тунисга Бардо музейига қилинган ҳужум ҳолатларини текшириш бўйича ёрдам кўрсатишни таклиф қилган. НАТО бош котибидан, Европа Иттифоқи ташқи ишлари вазирлигидан, Европа кенгаши раисидан ва бошқалардан ҳам хавфсизлик соҳасида келишувлар кучайтирилиши зарурлиги тўғрисида қатор баёнотлар келган… Бу баёнотлар омма томонидан ёмон кутиб олинди, омма уларни ҳар қандай хорижий аралашувга чек қўйган ҳолда ҳамда ҳукуматнинг бундай баёнотларга нисбатан шубҳали сукути учун ундан ҳисоб талаб қилган ҳолда доим ҳушёр туришга қарор қилиш билан кутиб олди.

Учинчидан: Терроризм ҳукуматларнинг омадсиз сиёсатларини ёпмоқда, инсон ҳуқуқларини тиклаш, бойликларни қайтариш ва коррупциячиларни жазолаш каби реал масалаларни яширмоқда. Масалан, Бардо фожеасидан икки кун аввал Тунисдаги ҳукумат раҳбари қилган шаклан ва мазмунан заиф маъруза борасида жанжал-тортишув кучайди. Чунки у «биз ҳукумат эмасмиз ва қўлимизда бирорта лойиҳа ҳам йўқ, биз жуда борса, бир статистик агентликмиз, холос», деган сўзларни айтганди. Ўшанда у реал омадсизликни сифатлаб, ҳамма яхши биладиган рақамларни келтириб ўтган ва одамлардан бирор қарашнинг йўқлигига ҳамда ожизликка сабр қилишни илтимос қилган эди!!

Ҳодисадан илгариги ўтган кунлар Тунисдаги «лоббилар» курашини, жумладан, ҳукмрон партия ичидаги курашларни фош қилди ҳамда реал сиёсий ҳаёт қанчалик даражада сохталиги, коррупция қонунчилик, сиёсат ва иқтисод жиҳатидан юртда қандай чуқур томир отгани жамоатчиликка очилиб қолди.

Тўртинчидан: Терроризмдан одамларни бостириш, қўрқитиш, Умматнинг ўз лойиҳасидан адаштириш ва Росулуллоҳ САВнинг «Пайғамбарлик минҳожи асосидаги Халифалик» бўлиши тўғрисидаги башоратларидан чалғитиш учун омадсиз бахтсиз уринишда фойдаланилмоқда. Ҳақиқатдан ҳам, бу бахтсиз ҳукуматга айни ҳодисалар кўр-кўрона ҳибсга олиш кампаниясини ўтказишда қўл келди. Ҳолбуки, у бўлаётган ишларни батафсил яхши билишини ва энг ашаддий жиноятчиларни йўқ қилмоқчилигини даъво қилиб келган!! Бу ҳукумат ҳатто Ислом маросимларига алоқадор ҳар бир нарсага тазйиқ ўтказишга уринмоқда. Қайсарлик ва кибри уни аста секин обод «Зайтуна» университетини ҳам нишонга олиб, зайтуний (сара) таълимга босим ўтказиш даражасигача олиб борди, худди илгари илмонийлик босим ўтказгани каби. Бугун бу ҳукумат Ғарбга ўзини Исломни ҳаётдан ажратиш куйчиси, юртдаги исломий ўсишни тугатувчиси сифатида тақдим қилмоқда. Мана, давлат президенти Бардо ҳодисаси ортидан бизни мустамлака қилган Францияга қарашли бир ахборот воситасига бевосита «ҳеч қачон шариат билан ҳукм юритмаймиз», деди. Бу билан ғарблик сиёсатчиларга тақлид қилиб, бўлаётган жиноятларни покиза шариатимизга ёпиштиришга уринди. Зеро, ғарблик сиёсатчилар хато амалиётлардан фойдаланади, Уммат лойиҳасини ҳамда илмонийлик ва капитализмнинг бирдан-бир альтернативи бўлган шариат ва Халифалик тўғрисидаги Росулуллоҳ САВнинг башоратларини ёмонотлиқ қилиш учун ҳодисаларни нотўғри талқин қилади.

Эй хавфсизлик хизмати ва ҳарбий бўлинмалардаги азиз-ҳурматли инсонлар!

Юрт аҳли ва фуқарони нишонга олган террористик амалиёт, унинг қилувчиси ким бўлишидан қатъий назар, бир кун ҳам Исломга мансуб бўлган эмас. Балки у илмонийларга ва Уммат душманларига мансубдир. Масалан, Ироқ, Покистон ва Афғонистонда мустамлакачилар ўзларига қарши жиҳодни фуқаролар урушига айлантириб, ўзларининг мақсадларини амалга оширишди. Жазоир, Сурия, Яман, Ливия, Тунис ва бошқа юртларимизда террористик амалиёт, доим қўзғолонга душманлик қилди, қўзғолон ва унинг аҳлига нисбатан ғилли-ғаш туювчи эски раҳбарларнинг ҳамда муфаккирлар, хавфсизлик ходимлари ва ҳарбийлар каби тарафдорларининг қайта қудратга келишларига имкон яратди. Ушбу хавфсизлик хизмати ва армияни террор нишонига айлантиришдан кўзланган манфур мақсад уларни Умматларидан узиш ва аввалги ансорий РАлар каби уларни динга нусрат-ёрдам беришдан ман қилишдан бошқа нарса эмас. Бас, шундай экан, сиз хатокорлар амалиётларига, бу омадсиз сиёсатчилар адаштирувига алданиб қолманг, уларга Умматга чамбарчас боғланишингиз билан ҳамда унинг қўзғолони сафида туриб, ҳақиқий лойиҳасига нусрат беришингиз билан жавоб қайтаринг.

Эй Тунис аҳли, эй золимларни саросимага солган қўзғолон бошловчилари!

Улар сизнинг қўзғолишингиздан қўрқишяпти, онгингиздан хавфсирашяпти. Уларнинг бир-бирига зид баёнотларидан сиз ўзингизнинг куйдирувчи саволларингизни кўрдингиз. Чунки сиз мана шундай олий ҳимматингиз ва буюк ғояларингиз билан Ислом асосидаги бошқарувга лойиқсиз, рувайбиза ҳукмдорларга эмас, балки буюк ҳукмдорлар ва етакчиларга ҳақлисиз. Зотан, улар умрларини зиёнга тикишмоқда, лойиҳаларимизни бузиш, масалаларимизни зое кетказиш, коррупция ва мустамлакачиликни мустаҳкамлаш учун қулай фурсат кутиб туришибди. Шунинг учун биз Ҳизб ут-Таҳрир аъзолари сизга ваъда берамиз, биз уларгагина эмас, уларга буйруқ берувчиларга ҳам душман бўламиз ва ниҳоят, ажнабийлар манфаати ва амалпарастликдан бошқа ташвиши бўлмаган анавилардек эмас, балки Умматдан ва Роббимиз ризосидан ўзга ташвишни билмайдиган ростгўй ва одил ҳукмдорлар бўлиб етишамиз. Шундай бўлгач, сиз бизга таянч ва қувват бўлинг, етакчилигингизни ўзингизга қарши тил бириктирувчиларга эмас, онгли холис зотларга топширинг, улардан қўрқманг, чунки уларнинг аҳволи ўзларидан аввалгилар аҳволи каби албатта заволга юз тутади.

وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَكِنَّ الْمُنَافِقِينَ لَا يَعْلَمُونَ

«Куч-қудрат Аллоҳники, Унинг Росулиники ва мўминларникидир, лекин мунофиқлар (буни) билмаслар»    [Мунофиқун 8]

Ҳизб ут-Таҳрир                                                      23 жумодус-соний 1436ҳ

Тунис                                                                        12 апрел 2015м