Умматнинг уйғонишида илм аҳлининг ўрни
Умматнинг уйғонишида илм аҳлининг ўрни
بِسْمِ اللهِ الرَّحْمٰنِ الرَّحِيم
Бундан ўн тўрт аср муқаддам Пайғамбаримиз Муҳаммад с.а.в. инсониятни хорликдан азизликка олиб чиқувчи буюк Ислом динини инсонларга олиб келдилар. Аллоҳнинг рисолатини бутун инсониятга етказиб, Ислом оламида биринчи имом ва йўлбошчи бўлдилар. Пайғамбар с.а.в. ўз Роббиси томонидан юкланган масъулиятни чиройли, сўзсиз адо этдилар. Натижада, у киши томонидан бошланган Ислом бутун ер юзига ёйилди. Зулм ва адолатсизликка бурканган буюк империялар қулади, зулмат қаърида ётган инсоният Ислом билан азизликка, адолатга, ҳақиқий инсонийликка эришди.
У кишидан сўнг ушбу масъулиятли вазифани халифалар давом эттирдилар. Ушбу саодатли давр сал кам ўн тўрт аср, яъни мустамлакачилар малайи Мустафо Камол томонидан (1924 йил 3-март) ағдарилгунига қадар давом этди. Шу давр мобайнида 92 нафар халифалар келган бўлса, уларнинг аввали Абу Бакр (Аллоҳ у кишидан рози бўлсин) бўлса, энг сўнгги мусулмонлар халифаси Абдулмажид иккинчи (1922-1924) эди. Исломий бошқарув соясидаги Ислом диёрлари мисли кўрилмаган даражадаги ютуқларни қўлга киритиб, оз фурсатда бутун дунёни ларзага солувчи бир кучга айландилар. Инсоният юксалиши учун зарур бўлган барча соҳалар (сиёсат, таълим, иқтисод, ижтимо, ҳарбий соҳа) тўғри тартибга солинди. Буларнинг барчасида инсоният келажаги учун жон куйдирган, уммат манфаатини ўз манфаатидан устун кўрган, холис, тақводор халифаларнинг, олимларнинг буюк хизматлари бор эди.
Бундан кўриниб турибдики, уммат етакчиларининг холислиги, йўлбошчиликка лойиқлиги жамиятни юксакликка, фаровонликка етакловчи асосий омил экан. Бу ҳолатни қуйидаги битта мисол билан тушуниб олишимиз мумкин: агар узоқ сафарга йўл олсагу, аммо манзилга қандай етиб боришни билмасак, ўзимизга бир йўлбошчини тайин қиламиз ҳамда то манзилга етиб олгунга қадар унинг кўрсатмаларига риоя қиламиз. Агар йўлбошчи тўғри йўл кўрсатса, манзилга тинч-омон етиб оламиз. Агар йўлбошчи адашса, барча сафар аҳли ҳам ўз йўлидан адашадилар.
Юқоридаги фикрларни мулоҳаза қилар эканмиз, ўринли бир савол туғилади, мусулмонларнинг йўлбошчилари ҳисобланадиган диний раҳнамоларимиз адашсаларчи? Минг афсуслар бўлсинки, бугунги кунимизда Пайғамбар с.а.в. “Олимлар менинг меросхўрларим”, деб тарифлаган шундай буюк, шарафли вазифа кишиларининг аксари кимларнидир чизган чизиғидан юрадиган қўғирчоқ олим ва имомларга айланиб қолдилар. Шундай ҳолатларда беихтиёр ўйга толаман, хаёлан илм аҳлига савол бераман:
Ислом умматининг келажаги, фаровонлиги, юксалиши йўлида сиз олим ва имомларимиз, йўлбошчиларимиз нималар ҳақида бош қотирмоқдасизлар? Ҳар куни мустамлакачиларнинг ўқлари остида жон таслим қилаётган, денгизларда сарсон бўлаётган муҳожирлар ғами билан лоақал бирор кеча тунларингизни бедор қила оляпсизларми? Сиз уммат йўлбошчилари асл вазифангиз умматга ёруғ юлдуз бўлишдир. Қасдданми, ожизлик қилибми мустамлакачилар фойдасига сўзингиз, ишорангиз, фатволарингиз билан ёрдам бериб қўйишингиздан огоҳ этамиз!
Хулоса ўрнида шуни алоҳида таъкид билан айтамизки, сиз илм аҳли бўлган йўлбошчилар шу уммат вакилисизлар, эртага борадиган жойимиз бир, қибламиз бир, бир сўз билан айтсак, бир Ислом умматимиз. Барча қилаётган ҳатти-ҳаракатларингиз Ислом ва мусулмонлар фойдасига бўлсин, асло унинг зиддига эмас! Сизларга бу илм ва мартабани Аллоҳ берди, сизлар унга хиёнат қилманглар! Биз Ислом уммати, сизларни яхши кўрамиз, Қиёмат кунида пешонангизда “мунофиқ” тамғаси билан қайта тирилишингизни асло хоҳламаймиз!
إِنَّ الَّذِينَ يَكْتُمُونَ مَا أَنزَلْنَا مِنَ الْبَيِّنَاتِ وَالْهُدَى مِن بَعْدِ مَا بَيَّنَّاهُ لِلنَّاسِ فِي الْكِتَابِ أُولَـئِكَ يَلعَنُهُمُ اللّهُ وَيَلْعَنُهُمُ اللَّاعِنُونَ
– “Биз нозил қилган ҳужжатлар ва ҳидоятдан иборат нарсаларни одамларга Китобда равшан қилиб берганимиздан кейин яширган кимсаларга Аллоҳнинг лаънати бўлсин ва лаънатловчи зотлар (фаришталар ва мўминлар)нинг ҳам лаънати бўлсин”. (Бақара:159)
Ҳизб ут-Таҳрирнинг Ўзбекистондаги медиа офиси. Зайниддин
08.11.2019й
