Ўзингизга яхшиликни раво кўрсангиз, Исломни танланг!

بِسْمِ اللهِ الرَّحْمٰنِ الرَّحِيم

Инсон табиатида ҳамма нарсани яхшисини хоҳлайдиган бир хусусияти бор. Ўзига қўйиб берилса, у ҳеч қачон ёмонроқ нарсани танламайди. Нарсаларни бир-бирига солиштириб, уларнинг ичидан ўзи яхши деб билганни танлайди. Масалан, эски кийимдан кўра янгисини, нархи қиммату сифати пастроқ бўлган автомобилдан кўра нархи арзонроқ сифати яхшироқ автомобилни, тор ва хоналари кам бўлган уйдан кўра кенг ва хоналари кўп уйни афзал кўради. Фақат нимани афзал кўриш – баъзи ўринларда – инсондаги ўша нарсалар тўғрисида етарли маълумотларнинг бўлишига боғлиқ бўлади. Чунки, масалан, қайси автомобил арзон ва сифатли эканлигини шу соҳани тушунадиган одам яхшироқ билади. 

Бугун инсонлар устидан татбиқ қилинаётган тузумларни ҳам одамлар ўзидаги муайян тушунчаларга кўра яхши ёки ёмон, демоқдалар. Бироқ татбиқ қилинаётган тузум ҳақида яхши ёки ёмон, деб хулоса чиқаришдан аввал уни текшириш керак. Чунки одамларга ҳозирги мавжуд тузум ҳақида нотўғри маълумот бериляпти, соддароқ қилиб айтганда, ёмон нарса яхши, деб кўрсатиляпти. Буни шундай тушуниш керакки, масалан, сизга аталган бир мукофот бор. Лекин сиз уни нималигини билмайсиз. Сизга бу мукофот эскироқ машина эканлигини айтишиб, тантанавор равишда уни сизга топширишди. Сиз йўқдан кўра ҳарқалай бир машинага эга бўлдим, деб хурсанд бўлиб, мукофотни берганларга рахмат айтасиз. Шундан сўнг, сиз аслида мукофот эски машина эмас, балки янги, ҳали ёғини ҳиди кетмаган, айнан сизга ёқадиган маркадаги машина эканлигини билиб қолдингиз. Яъни сизни алдаб, яхши нарсани ўрнига анча паст бўлган нарсани беришганини тушуниб қолдингиз. Шундай ҳолатда нима қиласиз, индамай кетаверасизми ёки манави эски машинани қайтариб олиб, ўша машинани беришларини талаб қиласизми? Албатта, энг камида бу ишга рози бўлмайсиз. Қайтанга сизни алдаган одамларнинг ҳақиқий юзини кўриб, улар сизга нисбатан зулм ва адолатсизлик қилганидан норози ҳам бўласиз. Сиздаги олдинги хурсандчилик ўрнини нафрат ва алам эгаллаб олади.

Ҳозирги ҳолат ҳам шунга ўхшаб кетади. Одамлар ҳали ҳам шалоғи чиқиб кетган демократик ёки демократикка ўхшаш тузумларни яхши, деб ўйлаб, у билан яшашни тўғри, деб ўйламоқдалар. Фақат янги қонунлар қабул қилиш ёки эскиларини такомиллаштириш, бошқарувчиларни алмаштириш, уларни қонунларга амал қилишларини назорат қилиш… билан тузумни ислоҳ қилиш керак, дея яна шу бадбахт тузумдан умидларини узишмаяпти. Ушбу тузумдан манфаатдор одамлар эса, одамларга уни яхши деб таърифлаб, фақат сизлар озгина сабр қилинглар, ислоҳотлар қиляпмиз, уларнинг натижаси яқинда кўринади, деб ишонтирмоқдалар. Бироқ бу вақтни чўзиш ва мавжуд тузумнинг умрини узайтиришдан бошқа нарса эмас. Бу худди – юқоридаги мисолда келтирилганидек – янги машинани ўрнига эски машинани тиқиштириб юборишга ўхшайди.

Аслида, инсон учун ҳақиқатда яхши бўлган нарса қасддан одамлардан яшириляпти, худди янги машина яширилиб, эскиси берилганидек. Бу яширилаётган нарса, яъни одамларни ҳақиқий маънода бахтли яшашларини таъминлайдиган тузум эса, Исломдир. Уни ҳақиқатда яхши эканлигини билиш учун уни ўрганиш ва ҳаётда татбиқ қилишга ҳаракат қилиш лозим. Агар Ислом ҳаётда татбиқ қилинганда эди, одамлар ҳозирги тузумларнинг нақадар ёмон ва адолатсиз, Ислом тузумининг қай даражада яхши ва адолатли эканлигини кўриб, демократиядан ва бошқа ҳар қандай бошқарувдан воз кечиб юборган ҳамда Исломий бошқарув остида яшашни хоҳлаган бўлардилар. Ҳатто бутун дунёдан одамларнинг Ислом билан бошқарилаётган ерга оқиб келишларига гувоҳ бўлар эдик.

Бас, ҳеч бўлмаганда ўзингизнинг инсоний табиатингизга мос равишда ўзингиз учун яхшилик олиб келадиган нарсани танланг.

Ҳизб ут-Таҳрирнинг Ўзбекистон вилояти матбуот бўлими. Салоҳиддин    

09.04.2021й