Биз нақадар ожизмиз
Биз нақадар ожизмиз
بِسْمِ اللهِ الرَّحْمٰنِ الرَّحِيم
Биз инсонлар нақадар ожизмиз-а! Ожизликларимиз шунчалик кўпки, санаб адоғига етиб бўлмайди. Кундалик ҳаётимизга эътибор берсак, ожизликларимиз тўлиб-тошиб ётганини кўрамиз. Ҳатто энг содда амалларни бажариш учун ҳам танамизнинг қайсидир қисмини ҳаракатга келтиришга мажбур бўламиз. Оддий ва одатда биз эътибор бермайдиган нарсалар борки, агар улар ҳақида ўйлаб кўрилса, нақадар ожиз эканлигимизни ҳис қиламиз. Масалан, биз ҳар куни еймиз, ичамиз. Ейиш ёки ичишни ўзи учун ҳам қанчадан-қанча ҳаракатларни бажаришимизга тўғри келади. Ейиш ва ичишдаги энг муҳим ҳаракатлардан бири бу ютинишдир. Инсоннинг егани ёки ичгани ошқозонга етиб бориши учун у ютиниши керак. Агар мана шу оддий амални бажармасангиз – олдингизда тўкин дастурхон турган бўлса ҳам – сиз ё оч қоласиз ё чанқайсиз. Ютмасдан бирор егуликни еб кўринг ёки ичимликни ичиб кўринг, оғиздан нарига ўтмайди. Ёки томоғингиз оғриб қолгандаги ҳолатингизни эслаб кўринг. Ҳар ютинганингизда оғриб, қанчалар азоб беришини тасаввур қилиб кўринг. Танамиздаги биргина оддий амалнинг бажарилмаслиги ёки қийинчилик билан бажарилиши ортидан қанчалар азоб чекамиз. Шу биргина содда амалнинг ўзи ҳам ҳаётимизга катта хавф пайдо бўлиши учун етарли бўларкан. Ахир бу бизнинг қанчалар даражада ожиз эканлигимиздан дарак бермайдими?!
Инсон ўзининг ожизлигини ҳис қилиши лозим. Шундай ҳолатларда у ўзидан қудратлироқ кучга муҳтожлигини сезади. Бу дунё ҳаётида ўз Яратувчисига қанчалар даражада муҳтож эканлигини фақат ўзининг табиий ожизлигини ҳис қилгандагина идрок қилади. Бироқ инсон унутувчан ва хато қилишга мойил бўлган махлуқот эканки, бугун ожизлигини тан олиб, Яратувчисидан ёрдам сўрайди-да, эртасига худди ҳеч нима бўлмагандек яна ўша ўзи билганидек ҳаёт кечираверади. Кечаги ожиз аҳволи ёдидан кўтарилади, кеча Роббисидан ёлвориб ёрдам сўрагани худди тушдек ўтиб кетади. Шу зайлда Роббисига берган ваъдалари ва қилган тавбалари унутилади, Ундан бўлган қўрқуви, тақвоси ва иймони заифлашади. Агар Аллоҳ Таоло кечиримли бўлишда, раҳм-шафқатда тенгсиз бўлмаганида бизнинг аҳволимиз нақадар ёмон бўлишини тасаввур қилишга ҳам қўрқади одам. Яратувчимиз Ўзининг раҳмати билан бизнинг ожиз ҳолимизда қилган дуоларимизни, сўровларимизни доимо ижобат қилади. Биздек унутувчи ва хатокор бандаларининг тасаввурга сиғмайдиган даражадаги гуноҳларини кечиб ҳам юборади. Буларнинг барчаси ўзимизни ожиз ва Яратувчимизни куч-қудратда тенгсиз эканлигини ҳис қилиб, Ундан нажот ва ёрдам сўраганимиз учун амалга ошади.
Эй мусулмон биродарим, ўзингизни инсоний жиҳатдан ожизликларингизни тез-тез ёдга олиб туринг. Зеро, бунинг учун катта илм керак эмас. Ўзингизга озгина эътибор беришингизни ўзи кифоя қилади. Шунда сиз ўзингизни ожизликларга тўла эканлигингизни ҳис қиласиз. Ва мана шу ҳис қилиш орқали Аллоҳ Таолога қанчалик муҳтож эканлигингизни, У Зотнинг эса, ҳамма нарсага қодир ва куч-қудратда тенгсиз эканлигини идрок қиласиз. Бундай идрок сизни Аллоҳдан қўрқувингизни мустаҳкамлайди, ўз амалларингиз борасида доимо хушёр бўлишингизни, тақво-ю иймонингиз бақувват бўлишини таъминлайди. Демакки, Аллоҳга итоатингизни кучайтиради. Ҳар бир мўмин учун эса, ўз Яратувчисига итоат қилишдан муҳимроқ иш йўқ.
Ҳизб ут-Таҳрирнинг Ўзбекистондаги медиа офиси. Фаррух
26.11.2019й
