Қонун Яратувчи тарафидан бўлсагина унга итоат қилиш кучли бўлади

بِسْمِ اللهِ الرَّحْمٰنِ الرَّحِيم

Ҳозир кўпчилик ҳокимлар ва раҳбарларнинг ўзлари қонунни бузаётганлигидан кўп шикоят қиляпти. Қонунларнинг ишламаётганлигидан, фақат хўжакўрсинга ёки муайян шахслар ва гуруҳлар манфаатлари учун қабул қилинаётганлигидан арз қилмоқда. Аслида, бу бугун бошланмаган, балки жуда кўп йиллардан бери юз бераётган ҳолат. Бугунга келиб ҳамма биладиган нарса тилларга чиқиб, очиқ-ойдин гапириладиган, муҳокама қилинадиган бўлиб қолди. Чунки одамлар бундан ниҳоят даражада чарчади. Ҳақиқатдан ҳам, қонун қабул қилинаверса-ю, амалда татбиқ бўлмаса, уни қабул қилишдан ҳеч қандай маъно қолмайди.

Албатта, қонунларга фуқародан тортиб ҳокимгача амал қилинсагина адолат қарор топади. Бироқ бу қонунларнинг манбаси инсон ақли бўлиши мумкин эмас. Чунки, аввало, инсон ақлидан келиб чиққан қонунлар инсон фитрати-табиатига зид бўлиб, инсониятни бахтсизликка олиб боради. Бундан ташқари, инсон ўйлаб топган қонунларга риоя қилиниши ҳам талаб қилинганидек бўлмайди. Чунки бундай қонунларни бузилиши ортидан нари борса фақат бу дунё ҳаёти доирасида жазо берилиши мумкин. Яна инсон ақлининг маҳсули бўлган қонунларни айланиб ўтиш ҳолатлари ҳеч қачон йўқолмайди. Балки бироз камайиши мумкиндир, бироқ бутунлай йўқотишнинг иложи йўқ. Ўзингиз ўйлаб кўринг, сиздан инсонлар ўйлаб топган қонунга бўйсуниш талаб қилинса, сизда бу қонунга нисбатан тўлиқ итоат ҳосил бўлмайди. Чунки бу ерда инсон хато қилиши мумкин, деган шубҳа бор. Шунингдек, бундай қонунни ўзингизга ўхшаган инсонлар ўйлаб топганлиги, яъни сиздан жисмонан ва ақлан ҳеч қандай фарқ қилмайдиган одамлар тарафидан қабул қилинганлиги ҳам ушбу қонунга ўзингиз хоҳлаб ва итоат қилиб амал қилишингизни таъминлай олмайди. Бу борада фуқаро ҳам, ҳоким ҳам бир хил. Шунинг учун ҳам ҳозир одамларни мавжуд қонунларга бўйсундиришда қонун қаттиққўллиги ва армия кучига таянишдан бошқа йўл қолмаган.

Энди сизга Аллоҳ Таоло тарафидан келган қонунга бўйсуниш талаб қилинса, сиз ҳеч иккиланмай, биров сизни мажбурлашини кутиб ўтирмай, ўз хоҳишингизга кўра итоат қиласиз. Чунки бундай қонун сиздан куч-қудратда ва илмда буюкроқ бўлган Зот тарафидан келган. Табиатингиздаги ожизликни тан олиб, Яратувчингиз тарафидан келган қонунни ҳеч шак-шубҳасиз тўғри, дея тан оласиз, чунки У хато қилиши мумкин эмас. У мукаммал Зотдир. Шунингдек, агар бу қонунни бузгудек бўлсангиз, Аллоҳ Таолонинг ғазабига учраб, нафақат бу дунё ҳаётида, балки Охират ҳаётида ҳам жазоланишдан қўрқасиз. Буларнинг барчаси сизда ўз Яратувчингиз тарафидан келган қонунларга итоат қилишни вужудга келтиради. Ҳеч ким кўрмаган тақдирда ҳам, Аллоҳ кўриб турганини ҳис қилган ҳолда ёлғиз ўзингиз бўлсангиз ҳам Аллоҳнинг буйруқ ва тақиқларига ўз хоҳишингизга кўра амал қиласиз. Мана энди айтингчи, бугун татбиқ қилинаётган қайси тузумда бундай нарса бор?

Аллоҳ Таоло тарафидан келган қонунлар – бу Ислом тузумидир. Ислом тузуми татбиқ қилинсагина – фуқародан тортиб ҳокимгача – ўз хоҳишлари билан қонунларга риоя қиладиган ҳолат юзага келиши мумкин. Бундай тузумда асосий таянч қонун қаттиққўллиги ва армия кучи эмас, балки одамларнинг Аллоҳга бўлган тақвоси бўлади. Бу эса, қонунларга риоя қилинишини шу даражада осон қилиб қўядики, давлат катта қийинчиликларсиз тузумни татбиқ қилишга эришади. Аллоҳ Таоло айтади:

أَفَحُكْمَ الْجَاهِلِيَّةِ يَبْغُونَ وَمَنْ أَحْسَنُ مِنَ اللّهِ حُكْمًا لِّقَوْمٍ يُوقِنُونَ

– “Жоҳилият ҳукмини истайдиларми?! Ишончи комил қавмлар учун Аллоҳдан ҳукми яхшироқ ким бор?!”                      (Моида:50)

Ҳизб ут-Таҳрирнинг Ўзбекистондаги матбуот бўлими аъзоси Салоҳиддин

22.04.2021й